အမျိုးသမီးနှင့် လူ့စွမ်းအားအရင်းအနှီး (Human Capital)

ဒီမိုကရက်တစ် မြန်မာ့အသံ ပရိသတ်များရှင်။

အခုတပတ် အမျိုးသမီးအခွင့်အလမ်း အစီအစဉ်မှာ အမျိုးသမီးနဲ့ လူ့စွမ်းအား အရင်းအနှီး တို့အကြားက ပတ်သက်ဆက်နွယ်မှုတွေကို တင်ပြမှာ ဖြစ်ပါတယ်။ လူ့စွမ်းအား အရင်းအနှီးဆိုတာ လူသားတွေရဲ့ စံနှုန်းမြင့်တဲ့ အရည်အချင်းတွေနဲ့ အတွေးအခေါ်တွေဖြစ်ပါတယ်။ စီးပွားရေးလုပ်ငန်းတွေမှာ ရေရှည်ရရှိလာမယ့် အကျိုးစီးပွားအတွက် ငွေအရင်းအနှီး မြှုပ်နှံရပါတယ်။ ဒီလိုပါပဲ။ နိုင်ငံတော်နဲ့ မိသားစုတွေမှာလဲ လူတယောက်ရဲ့ ထုတ်လုပ်မှု စွမ်းအားနဲ့ ၀င်ငွေတိုးတက်မြင့်မားလာဖို့ လူ့စွမ်းအား အရင်းအနှီး မြှုပ်နှံရပါတယ်။ လူ့စွမ်းအားအရင်းအနှီး မြှုပ်နှံမှုမှာ ပညာရေးရင်းနှီးမြှုပ်နှံမှု၊ လုပ်ငန်းခွင် လေ့ကျင့်သင်ကြားရေး မြှုပ်နှံမှုနဲ့ ဘ၀တသက်တာ သင်ယူလေ့လာမှုတွေ ပါဝင်ပါတယ်။


လူတယောက်ရဲ့ အရည်အချင်းဟာ ပညာရေး တခုတည်းပေါ်မှာပဲ မူတည်တာ မဟုတ်ပါဘူး။ ဒါပေမယ့် အလုပ်အကိုင် အခွင့်အလမ်းမှာကျတော့ ပညာအရည်အချင်းကိုပဲ စံနှုန်းသတ်မှတ် တိုင်းတာလေ့ရှိပါတယ်။ ဘာကြောင့်လဲ ဆိုတော့ ပညာရေးဟာ လုပ်ငန်းခွင်အတွက် လိုအပ်မယ့် ကျွမ်းကျင်မှု အရည်အချင်းတွေကို ဖြည့်ဆည်းပေးနိုင်လို့ပါပဲ။ ဆောက်လုပ်ရေးလုပ်ငန်းခွင် အင်ဂျင်နီယာတယောက်ကို အင်ဂျင်နီယာ ဘွဲ့တွေ၊ အောင်လက်မှတ်တွေ ရထားသူကိုပဲ ခန့်အပ်လေ့ရှိပါတယ်။ စာရင်းကိုင်အလုပ်ကို စာရင်းကိုင်ဘွဲ့တွေ၊ အောင်လက်မှတ်တွေ ရထားသူတွေကိုပဲ ခန့်အပ်လေ့ရှိပါတယ်။ ဒီလို ကျွမ်းကျင်မှု အရည်အချင်းတွေကိုသာမက ယေဘူယျ အရည်အချင်းတွေ ဖြစ်တဲ့ ဆက်စပ်တွေးခေါ်နိုင်စွမ်း၊ စာရေး၊ စာဖတ်စွမ်းရည်တွေကိုလဲ စာသင်ကျောင်းတွေ၊ ကောလိပ်၊ တက္ကသိုလ်တွေက လေ့ကျင့်သင်ကြားပေးပါတယ်။ ဒါတင်မကပဲ အလုပ်အကိုင်ထဲမှာ လိုအပ်တဲ့ အပြုအမူတွေဖြစ်တဲ့ အချိန်လေးစားမှု၊ ညွန်ကြားချက်တွေကို လိုက်နာဆောင်ရွက်မှု၊ ဝေဖန်ပိုင်းခြားနိုင်မှု တွေကို ပညာရေးအဆောက်အအုံက လေ့ကျင့်ပေးပါတယ်။ လုပ်ငန်းခွင်ထဲရောက်တဲ့အခါမှာလဲ လုပ်ငန်းခွင်နဲ့ ပတ်သက်တဲ့ စွမ်းရည်တွေ မြင့်မားဖို့ လုပ်ငန်းခွင် လေ့ကျင့်သင်ကြားပေးမှုတွေ လိုအပ်ပါတယ်။ ဒါတင်မကသေးပါဘူး။ အသိဥာဏ်ကို အခြေပြုတဲ့ စီးပွားရေးအဆောက်အအုံ၊ လူမှုရေးအဆောက်အအုံကို တည်ဆောက်နိုင်ဖို့အတွက် ဒီအဆောက်အအုံတွင်းက လူသားတွေရဲ့ ဘ၀တသက်တာ သင်ယူလေ့လာမှုတွေကလဲ အရေးကြီးပါတယ်။ ပညာသင်ယူလေ့လာမှုဆိုတာ ဘွဲ့ရတာလေးနဲ့တင် ပြီးဆုံးတာ မဟုတ်ပါဘူး။ မိမိကျွမ်းကျင်ရာ ပညာရပ်တွေရဲ့ တိုးတက်ပြောင်းလဲမှုတွေကိုလဲ မျက်ချေမပြတ် စောင့်ကြည့်လေ့လာနေရမှာဖြစ်ပါတယ်။

ဒါကြောင့်လဲ လူ့အဖွဲ့အစည်း တိုးတက်ဖွံ့ဖြိုးရေးမှာ လူ့စွမ်းအား အရင်းအနှီး မြှုပ်နှံမှုဟာ အရေးပါတဲ့ အခန်းကဏ္ဍတခု ဖြစ်လာပါတယ်။ မကြာသေးခင်ကာလက နိုင်ငံပေါင်း (၁၉၂) နိုင်ငံရဲ့ ငွေကြေးနဲ့ လူ့စွမ်းအား အရင်းအနှီး ပိုင်ဆိုင်မှုတွေကို ပညာရှင်များက သုံးသပ်လေ့လာခဲ့ကြပါတယ်။ အဲဒီအခါမှာ လူ့စွမ်းအား အရင်းအနှီးဟာ (၆၄%) ကျော် ပါဝင်နေတာ တွေ့ရှိရပါတယ်။ ခေတ်မီဖွံ့ဖြိုးတဲ့ နိုင်ငံတော်တော်များများမှာ လူ့စွမ်းအား အရင်းအနှီး အများအပြား ရှိနေတာ တွေ့ရှိရပါတယ်။ ဖွံဖြိုးဆဲတိုင်းပြည်တော်တော်များများမှာကျတော့ ပညာတတ်တွေ နည်းပါးတာ၊ ရှိတဲ့ပညာတတ်တွေကို အသုံးမပြုနိုင်တာ၊ နိုင်ငံရေး၊ စီးပွားရေးမတည်ငြိမ်မှုတွေကြောင့် ဦးနှောက်ယိုစီးမှု ပြဿနာဖြစ်နေတာ စတာတွေကြောင့် လူ့စွမ်းအားအရင်းအနှီးတွေ နည်းပါးနေတတ်ပါတယ်။ ဒီလိုလူ့စွမ်းအား အရင်းအနှီး နည်းပါးတာဟာ လူ့အဖွဲ့အစည်းရဲ့ ရေရှည်ဖွံ့ဖြိုးတိုးတက်ရေးကို ထိခိုက်စေနိုင်ပါတယ်။ လူ့စွမ်းအား အရင်းအနှီး အများအပြားရှိတဲ့ လူ့အဖွဲ့အစည်းတွေကသာ ရေရှည်မှာ တိုးတက်ဖွံ့ဖြိုးလာမှာ ဖြစ်ပါတယ်။ ဒီနေရာမှာ လူ့အဖွဲ့အစည်းဆိုတာကလဲ အမျိုးသားနဲ့ အမျိုးသမီး အားလုံးကို ကိုယ်စားပြုတာမို့ အမျိုးသမီးတွေရဲ့ လူ့စွမ်းအားအရင်းအနှီး တိုးတက်မြင့်မားဖို့ကလဲ အရေးကြီးပါတယ်။

အမျိုးသမီးတွေရဲ့ လူ့စွမ်းအားအရင်းအနှီးတိုးတက်ရေးကို ပိတ်ပင်တားဆီးနေတဲ့ အရာတွေ အများအပြား ရှိပါတယ်။ အရေးကြီးဆုံး တခုကတော့ အမျိုးသမီးတွေရဲ့ လူမှုဘ၀ဖြစ်စဉ်ပဲ ဖြစ်ပါတယ်။ လူတယောက်ရဲ့ အတွေးအခေါ်၊ အပြုအမူတွေကို သူနေထိုင်ကြီးပြင်းခဲ့တဲ့ ပတ်ဝန်းကျင်၊ မိသားစု၊ မိတ်ဆွေအပေါင်းအသင်း၊ ဆရာသမားတွေက အနည်းနဲ့ အများ လွှမ်းမိုးမှုရှိပါတယ်။ တချို့လူ့အဖွဲ့အစည်းတွေမှာဆိုရင် အမျိုးသမီးတွေရဲ့ ပညာရေးကို လူ့အဖွဲ့အစည်း၊ မိဘ၊ ဆွေမျိုးတွေကိုယ်တိုင်ကိုက တားဆီး ပိတ်ပင်လေ့ရှိပါတယ်။ မိန်းကလေးပဲ။ သေစာ၊ ရှင်စာ ဖတ်တတ်ရင်တော်ရောပေါ့။ မိန်းကလေးပဲ။ ဘွဲ့တခုရရင် တော်ရောပေါ့။ အချိန်တန်တော့လဲ ယောက်ျားယူပြီး အိမ်မှုကိစ္စတွေ စီမံရမှာ။ ပညာတွေအများကြီး တတ်ထားတော့လဲ ဘာလုပ်မှာလဲ။ ပညာတွေ သိပ်သင်မနေနဲ့။ ယောက်ျားတွေက မယူရဲပဲ နေဦးမယ် စတဲ့ စကားသံတွေဟာ တချို့သော လူ့အဖွဲ့အစည်းတွေအတွင်းမှာ ပေါ်ထွက်နေတတ်ပါတယ်။ ဒီစကားသံတွေဟာ အမျိုးသမီးတွေရဲ့ လူမှုဘ၀ဖြစ်စဉ်ကို လွှမ်းမိုးလာတဲ့အခါ အမျိုးသမီးတွေရဲ့ လူ့စွမ်းအားအရင်းအနှီး တိုးတက်ရေးကို ထိခိုက်စေပါတယ်။ အမျိုးသမီးတွေဟာ သူတို့ဘ၀ရဲ့ တိုးတက်နိုင်မယ့် အခွင့်အလမ်းတွေ၊ ပညာရေးရင်းနှီးမြှုပ်နှံမှုတွေ၊ ဘ၀အာမခံချက်ရရှိဖို့တွေကို စိတ်မ၀င်စားပဲ ဖြစ်သွားတတ်ပါတယ်။ ဒီအခါမှာ အမျိုးသမီးတွေရဲ့ အနာဂတ် ကုန်ထုတ်လုပ်မှုစွမ်းအားနဲ့ ၀င်ငွေတိုးတက်မှု တွေ လျော့ကျသွားပါတယ်။

ဒါတင်မကသေးပါဘူး။ အမျိုးသမီးသဘောသဘာဝနဲ့ အမျိုးသားသဘောသဘာဝကို ခွဲခြားသတ်မှတ်မှုတွေကလဲ အမျိုးသမီးတွေရဲ့ ရွေးချယ်ပိုင်ခွင့်ကို ကန့်သတ်ထားပြီး လူ့စွမ်းအားအရင်းအနှီး တိုးတက်ရေးကို နှောင့်နှေးစေပါတယ်။ အမျိုးသမီးတွေရဲ့ ကိုယ်ရည်ကိုယ်သွေးဟာ နောက်လိုက်သဘောသဘာဝသာ ရှိပြီး၊ အမျိုးသားတွေလို ဦးဆောင်မှု အရည်အချင်း မရှိဘူးလို့ တချို့က သတ်မှတ်တတ်ကြပါတယ်။ အမျိုးသမီးတွေဟာ အလွယ်တကူ အားလျှော့ အရှုံးပေးတတ်ပြီး၊ အမျိုးသားတွေလို အားသွန်ခွန်စိုက် အရှုံးမပေးစတမ်း လုပ်ကိုင်နိုင်မှာ မဟုတ်ဘူးလို့လဲ ယူဆတတ်ကြပါတယ်။ အမျိုးသမီးတွေဟာ စိတ်လှုပ်ရှားလွယ်တာကြောင့်၊ စဉ်းစားချင့်ချိန်ပြီး လုပ်ရတဲ့ အလုပ်အကိုင်တွေမှာ အမျိုးသားတွေလို အောင်မြင်မှာ မဟုတ်ဘူးလို့လဲ ခြုံငုံပြောဆိုတတ်ကြပါတယ်။ ဒီလိုအပြောအဆိုတွေဟာ ကိုယ်ပိုင်အရည်အချင်းတွေ၊ ကိုယ်ရည်ကိုယ်သွေးကို ကာယကံရှင်တွေ ကိုယ်တိုင်က မသိသေးခင်မှာပဲ လူ့အဖွဲ့အစည်းက သတ်မှတ်ပေး လိုက်တာ ဖြစ်ပါတယ်။ ဒီလိုသတ်မှတ်လိုက်ခြင်းအားဖြင့် အမျိုးသမီးတွေရဲ့ မိမိကိုယ်မိမိ ယုံကြည်မှုတွေ၊ ကိုယ်ပိုင်ရပ်တည်ချက်တွေ လျော့ကျသွားစေပါတယ်။ အမျိုးသားတွေ အပေါ်မှာ မှီခိုအားကိုးလိုစိတ်တွေ ဖြစ်ပေါ်လာပါတယ်။ အမျိုးသားတွေ ရဲ့ ဦးဆောင်မှုကိုပဲ ဝေဖန်သုံးသပ်မှု မပြုပဲ လိုက်နာ ဆောင်ရွက်တာတွေ ဖြစ်လာပါတယ်။ လုပ်ငန်းခွင် ပြိုင်ဘက်ဟာ အမျိုးသားဖြစ်နေတဲ့အခါ ပြိုင်ဆိုင်ဖို့ မ၀ံ့မရဲ ဖြစ်ကြတဲ့ အမျိုးသမီးတွေလဲ ရှိလာပါတယ်။ ဒီလို သဘောသဘာဝ ရှိနေတဲ့ လူ့အဖွဲ့အစည်းတွေမှာ ဆိုရင် အမျိုးသမီးတွေရဲ့ လူ့စွမ်းအား အရင်းအနှီး တိုးမြင့်မှု နှောင့်နှေးတာကြောင့် လူ့အဖွဲ့အစည်းရဲ့ ခေတ်မှီတိုးတက်မှုလဲ နှေးကွေးနေတတ်ပါတယ်။

ဒီမိုကရက်တစ် မြန်မာ့အသံ ပရိသတ်များရှင်။

လူ့အဖွဲ့အစည်း တိုးတက်မြင့်မားဖို့အတွက် လူ့စွမ်းအား အရင်းအနှီးဟာ ပဓာနကျပါတယ်။ လူ့စွမ်းအား အရင်းအနှီး တိုးမြှင့်ဖို့မှာကလဲ အမျိုးသားများသာမက အမျိုးသမီးများရဲ့ လူ့စွမ်းအားအရင်းအနှီးတွေကိုပါ တိုးမြင့်လာအောင် ရင်းနှီးမြှုပ်နှံရမှာ ဖြစ်ပါတယ်။ ဒီလိုရင်းနှီး မြှုပ်နှံရမှာ အတားအဆီးတွေ ရှိလာတဲ့အခါ အမျိုးသမီးတွေရဲ့ လူ့စွမ်းအား အရင်းအနှီးတွေတင် လျော့နည်းသွားမှာ မဟုတ်ပါဘူး။ လူ့အဖွဲ့အစည်းတခုလုံးရဲ့ အနာဂတ် တိုးတက်မြင့်မားမှုကိုပါ ထိခိုက်စေမှာ ဖြစ်ပါတယ်။ ဒါကြောင့် အမျိုးသမီးများရဲ့ လူ့စွမ်းအား တိုးမြင့်ရေးကို ၀ိုင်းဝန်း လုပ်ဆောင်ကြပါစို့လို့ တိုက်တွန်းပြောကြားလိုပါတယ်။

ခင်မမမျိုး (၂၀၀၉)