အမျိုးသမီးနှင့် ပညာရေး၊ ကျန်းမာရေးအခွင့်အလမ်း

ခေတ်မီတိုးတက်သော နိုင်ငံသစ်တခုတည်ဆောက်ရာမှာ လူ့စွမ်းအားအရင်းအမြစ် ဖွံ့ဖြိုးတိုးတက်မှုဟာ အဓိကကျပါတယ်။ ရှေးယခင်ကတော့ လူ့အဖွဲ့အစည်းရဲ့ စီးပွားရေးဖွံ့ဖြိုးတိုးတက်ဖို့ ဥစ္စာအရင်းအနှီးကိုပဲ ထည့်သွင်းပြောဆိုခဲ့ကြပေမယ့်၊ တစတစနဲ့တချို့သော ကြွယ်ဝတဲ့တိုင်း ပြည်တွေဟာ ဥစ္စာဓန အများအပြားမရှိပဲ အချိန်နဲ့ငွေကိုပညာရေးမှာ မြှုပ်နှံရာကနေ အသိပညာ အရင်းအနှီး ရလာပြီး တိုင်းပြည်ဖွံ့ဖြိုးတိုးတက်ရေး ဖြစ်လာကြတာကို ပညာရှင်တွေ သတိပြုမိလာကြပါတယ်။ အဲဒီကနေစလို့ လူ့စွမ်းအားအရင်းအမြစ် တိုးတက်မှုဆိုတဲ့ စကားလုံးတွေဟာ ကမ္ဘာ့နိုင်ငံ တော်တော်များများရဲ့ မူဝါဒတွေမှာ လွှမ်းမိုးနေရာယူလာပါတော့တယ်။ ဒီလိုလူသားအရင်းအမြစ် ဖွံ့ဖြိုးဖို့ဆိုတာမှာ ပညာရေးအခွင့်အလမ်းများမှာသာမက ကျန်းမာရေး အခွင့်အလမ်းများ အပြည့်အ၀ ခံစားခွင့်ရရှိဖို့လဲ လိုအပ်လှပါတယ်။ တကယ်တော့ “ကျန်းမာရေး ဆိုတာကလဲ လာဘ်ကြီးတပါးပဲ” မဟုတ်ပါလားရှင်။



ဒါကြောင့်လဲ လူသားတိုင်း ပညာရေး၊ ကျန်းမာရေး အခွင့်အလမ်းတွေ အပြည့်အ၀ ရရှိလာနိုင်ဖို့ကို ကမ္ဘာနဲ့အ၀ှမ်း ဆောင်ရွက်နေကြတာ ဖြစ်ပါတယ်။ ဒီလိုဆောင်ရွက်ရာမှာ လူဦးရေရဲ့ တ၀က်ကျော်ဖြစ်တဲ့ အမျိုးသမီးတွေရဲ့ ပညာရည် တိုးတက်မြင့်မားလာခြင်း၊ ကျန်းမာကြံ့ခိုင်လာခြင်းဟာ လူ့အဖွဲ့အစည်းတခုလုံး တိုးတက်မြင့်မားလာရေးအတွက် အရေးကြီးတာကြောင့်၊ “အမျိုးသမီးတွေ အတွက် ပညာရေး၊ ကျန်းမာရေး အခွင့်အလမ်းများ ရရှိရေး” လှုပ်ရှားမှုတွေဟာလဲ ပေါ်ပေါက်လာခဲ့ပါတယ်။

အမျိုးသမီးရေးရာ လှုပ်ရှားမှုတိုင်းလိုလိုမှာ ဦးစားပေးဆောင်ရွက်ကြတဲ့ အပိုင်းကတော့ အမျိုးသမီးများ ပညာသင်ကြားနိုင်ခွင့်ပဲ ဖြစ်ပါတယ်။ ဥရောပနဲ့ အမေရိကန်ပြည်ထောင်စုတို့မှာ ၁၈၀၀ပြည့်နှစ်များအထိ အမျိုးသမီးများ မူလတန်းပညာသင်ကြားခွင့်ကို ကန့်သတ်ထားခဲ့ပါတယ်။ နိုင်ငံအများစုမှာ အမျိုးသမီးများ တက္ကသိုလ်ပညာတက်ရောက်သင်ကြားခွင့် အခွင့်အရေးဟာ ဒုတိယကမ္ဘာစစ်ပြီး နောက်ပိုင်းမှာမှ အရှိန်အဟုန်နဲ့ တိုးမြင့်လာခဲ့တာဖြစ်ပါတယ်။ အမျိုးသမီးတွေကို ပညာသင်ကြားနိုင်တဲ့ အခွင့်အလမ်းတွေ ပေးလိုက်ခြင်းဟာ လူ့ဘောင်တခုလုံးအတွက် ကြီးစွာသော တိုးတက်ပြောင်းလဲမှု ခြေလှမ်းတွေဖြစ်ကြောင်း တတ်သိပညာရှင်များက ထောက်ပြပြောဆိုကြပါတယ်။ ၂၀၀၄ခုနှစ်က အရှေ့အလယ်ပိုင်းဒေသ ရုပ်မြင်သံကြားအစီအစဉ်တခုနဲ့ တွေ့ဆုံဆွေးနွေးခန်းမှာ အမေရိကန်သမ္မတ ကတော် လော်ရာဘွတ်ရ်ှက အမျိုးသမီးတွေကို ပညာသင်ကြားခွင့် ရရှိစေခြင်းဟာ စီးပွားရေးတိုးတက်မှု အကျိုးစီးပွားတခုကိုတင် ဖြစ်ထွန်းစေတာ မဟုတ်ပဲ၊ ကလေးသူငယ်များ ဖွံ့ဖြိုးတိုးတက်မှု အကျိုးကျေးဇူးကိုပါ ရရှိစေကြောင်း၊ ပညာတတ်အမျိုးသမီးတွေဟာ သားဆက်ခြားခြင်း၊ ကလေးငယ်များ အစာအာဟာရ ပြည့်မှီအောင် တွက်ချကျွေးမွေးပြုစုခြင်း၊ ကလေးပြုစုပျိုးထောင်ခြင်း၊ ကလေးပညာရေး စတာတွေမှာ ဗဟုသုတ ပိုများတာကြောင့် ကလေးသူငယ်ဖွံ့ဖြိုးတိုးတက်ရေးကို အထောက်အကူ ပြုတယ်လို့ ထောက်ပြပြောဆိုခဲ့ပါတယ်။

၂၁ရာစုကာလမှာကျတော့ အမျိုးသမီးများရဲ့ ပညာသင်ကြားနိုင်ခွင့် အခွင့်အလမ်းဟာ အာရှတိုက်နဲ့ အာဖရိကတိုက် နိုင်ငံအချို့ကလွဲရင် နိုင်ငံတော်တော်များများမှာ ရရှိနေပါပြီ။ ၂၀၀၇ခုနှစ် အာရှပစိဖိတ်ဒေသ စီးပွားရေး၊ လူမှုရေးစစ်တမ်းအရ အာရှပစဖိတ်ဒေသမှာ အမျိုးသားနဲ့ အမျိုးသမီးတွေကြားက ပညာသင်ကြားခွင့် အခွင့်အလမ်းတွေ ခြားနာမှုကြောင့် ဒေသစီးပွားရေးမှာ နှစ်စဉ်အမေရိကန်ဒေါ်လာ သန်းသုံးဆယ် ဆုံးရှုံးနေကြောင်း တွေ့ရှိရပါတယ်။ ကျွန်မတို့ မြန်မာနိုင်ငံမှာဆိုရင် အမျိုးသမီးငယ်တွေရဲ့ အထက်တန်းကျောင်းတက်ရောက်မှုနှုန်းဟာ ရာခိုင်နှုန်းလေးဆယ်ဝန်းကျင်မှာပဲ ရှိနေပါသေးတယ်။ မူလတန်းတက်ရောက်မှုနှုန်းဟာလဲ ရာနှုန်းပြည့်မဟုတ်သေးပါဘူး။ ဓလေ့ထုံးစံအရ ကန့်သတ်ချက်တွေ၊ နိုင်ငံရဲ့ စီးပွားရေးဆုတ်ယုတ်မှုတွေ၊ အစိုးရရဲ့ ပညာရေးဘတ်ဂျက်ခွဲဝေမှု အားနည်းချက်တွေနဲ့ ပညာရေးမူဝါဒ ချို့ယွင်းချက်တွေဟာ မြန်မာအမျိုးသမီးတွေရဲ့ ပညာသင်ကြားနိုင်ခွင့် အခွင့်အရေးကို ထိခိုက်စေခဲ့ပြီး၊ ဆက်လက်ထိခိုက်နေဆဲပဲဖြစ်ပါတယ်။ ဒီလိုထိခိုက်မှုတွေဟာ လူ့အဖွဲ့အစည်းတခုလုံးရဲ့ စွမ်းဆောင်ရည်ကို ကျဆင်းစေတာ ဖြစ်တဲ့အတွက်ကြောင့် တိုင်းပြည်ဖွံ့ဖြိုးတိုးတက်ရေးကို နှောင့်နှေးကြန့်ကြာစေပါတယ်။

ပညာရေးအခွင့်အလမ်းလိုပဲ ကျန်းမာရေးအခွင့်အလမ်းတွေဖြစ်တဲ့ ကျန်းမာရေးစောင့်ရှောက်မှုခံစားခွင့်၊ ကိုယ်ဝန်ဖျက်ချမှု အခွင့်အရေး၊ အမျိုးသမီးများအား အကြမ်းဖက်မှု စတဲ့အချက်တွေဟာလဲ လူ့အဖွဲ့အစည်း ဖွံ့ဖြိုးတိုးတက်မှုအတွက် အရေးကြီးပါတယ်။ ဒါကြောင့်လဲ ၁၉၉၀ နှောင်းပိုင်း အမျိုးသမီးအခွင့်အရေး လှုပ်ရှားမှုများဟာ ကျန်းမာရေးဆိုင်ရာ အခွင့်အလမ်းတွေကို ဦးစားပေးလာခဲ့ကြပါတယ်။ ကျန်းမာရေးစောင့်ရှောက်မှုဆိုတာမှာ အခြေခံကျန်းမာရေး စောင့်ရှောက်မှုတွေဖြစ်တဲ့ ကာကွယ်ဆေးထိုးတာ၊ ကိုယ်ဝန်ရှိမရှိစစ်ဆေးတာ၊ လိင်နှင့်ပတ်သက်သော ကူးစက်ရောဂါတွေရှိမရှိ စစ်ဆေးတာ စတဲ့အချက်တွေကနေ ရှုပ်ထွေးနက်နဲလှတဲ့ ဆေးစစ်ချက်တွေဖြစ်တဲ့ နှလုံးရောဂါ၊ ရင်သားကင်ဆာ စတဲ့ ရောဂါများအား ကုသရန် စစ်ဆေးချက်များပါ ပါဝင်ပါတယ်။ အမျိုးသမီးများ ကျန်းမာရေးစောင့်ရှောက်မှုကို ခံစားနိုင်ခွင့် အခွင့်အလမ်းများ နည်းပါးမှုကြောင့် ကမ္ဘာတ၀ှမ်းမှာ ဆိုးကျိုးဖြစ်ပွားနေရပါတယ်။ ၂၀၀၅ခုနှစ် မှတ်တမ်းများအရ ကမ္ဘာတ၀ှမ်းက အိတ်ခ်ျအိုင်ဗီကူးစက်ခံရသူ ၃၈.၆ သန်းအနက် ၁၇.၃ သန်းဟာ အမျိုးသမီးများ ဖြစ်ကြပါတယ်။ ဒီပြဿနာတွေရဲ့ နောက်ဆက်တွဲကတော့ ကမ္ဘာပေါ်မှာ မိဘမဲ့ကလေးငယ်တွေ အများကြီး ပေါ်ထွက်လာခဲ့ရတာပါ။

ယူနီဆက်စာရင်းဇယားများအရ ကျွန်မတို့မြန်မာနိုင်ငံမှာ အိတ်ခ်ျအိုင်ဗီပိုးကူးစက်ခံရသူ အမျိုးသမီး တသိန်းကျော်ရှိနေပါတယ်။ စီးပွားရေးအခြေအနေ ဆုတ်ယုတ်မှုရဲ့ နောက်ဆက်တွဲပြဿနာတွေဖြစ်တဲ့ လူကုန်ကူးမှု၊ လိင်ကျွန်အဖြစ်သွတ်သွင်းခံရမှု၊ ပြည့်တန်ဆာအလုပ်ဖြင့် အသက်မွေးမှု စတာတွေအပြင်၊ လုံလောက်တဲ့ ကျန်းမာရေးအသိပညာပေးခြင်း မရှိတာတွေ၊ အခြေခံကျန်းမာရေးစောင့်ရှောက်မှု ဆောင်ရွက်ခြင်း အားနည်းချက်တွေရယ်ဟာ ဒီလိုအဖြစ်ဆိုးတွေရဲ့ အရင်းခံအချက်တွေပါပဲ။ ဒီလို လုံလောက်တဲ့ ကျန်းမာရေးအသိပညာပေးမှု မရှိတာတွေနဲ့ အခြေခံကျန်းမာရေးစောင့်ရှောက်မှု အားနည်းချက်တွေဟာ အေအိုင်ဒီအက်စ်ရောဂါပိုး ပျံ့ပွားမှုတွေသာမက ကိုယ်ဝန်ဆောင်မိခင် သေဆုံးမှုနှုန်းကိုလဲ တိုးတက်မြင့်မားစေပါတယ်။ ကိုယ်ဝန်ဆောင်အမျိုးသမီးသေဆုံးမှုဟာ နှစ်စဉ် သုံးထောင်နဲ့ ငါးထောင်ကျော်အတွင်းမှာ ရှိနေကြောင်း နိုင်ငံတကာကျန်းမာရေးအဖွဲ့အစည်းများရဲ့ မှတ်တမ်းများမှာ ရေးသားထားပါတယ်။ ကိုယ်ဝန်ဆောင်အမျိုးသမီးများ ဆေးရုံ၊ ဆေးခန်းများမှာ မှတ်ပုံတင်ခွင့်ရရှိရေး၊ လိုအပ်သော ကျန်းမာရေးစောင့်ရှောက်မှုများ ရရှိရေး၊ နိုင်ငံပိုင်ဆေးရုံများမှာ အခမဲ့သားဖွားခွင့်ရရှိရေးဟာ တိုးတက်သော လူ့အဖွဲ့အစည်း ပေါ်ထွန်းလာရေးအတွက် အလွန်ပဲ အရေးကြီးလာပါတယ်။

ဒါတွင်မကသေးပါဘူး။ အမျိုးသမီးများ အကြမ်းဖက်ခံရမှုအရေးဟာလဲ ပြည်သူ့ကျန်းမာရေးဆိုင်ရာမှာ အရေးကြီးတဲ့ အကြောင်းအရာ တရပ်ဖြစ်ပါတယ်။ ကမ္ဘာ့ကျန်းမာရေးအဖွဲ့ကြီး (WHO) ရဲ့ ၁၉၉၆ ခုနှစ် အစီရင်ခံစာမှာ အမျိုးသမီးများ အကြမ်းဖက်ခံရမှုရဲ့ ရေတိုရေရှည် ကျန်းမာရေးဆိုးကျိုးများကို ဖော်ထုတ်ထားခဲ့ပါတယ်။ တကမ္ဘာလုံးမှာ ရှိတဲ့ အမျိုးသမီး ၁၀ ရာခိုင်နှုန်းမှ ၆၉ ရာခိုင်နှုန်းထိဟာ အမျိုးသားအဖော်ရဲ့ အကြမ်းဖက်မှုကို ဘ၀မှာ တကြိမ်တော့ အနည်းဆုံးခံခဲ့ကြရတယ်လို့ ကမ္ဘာ့ကျန်းမာရေးအဖွဲ့ကြီးက မီးမောင်းထိုးပြခဲ့ပါတယ်။ ဒီလို အကြမ်းဖက်မှုတွေဟာ အဓမ္မကျင့်မှု၊ လိင်ပိုင်းဆိုင်ရာ စော်ကားမှု၊ အိမ်တွင်းအကြမ်းဖက် ရိုက်နှက်နှိပ်စက်မှု၊ မိသားစုတွင်းမှ ပြောရေးဆိုခွင့်မရှိပဲ အနှိမ်ခံရမှု စတဲ့ပုံသဏ္ဍာန်အမျိုးမျိုးရှိပါတယ်။ ဒါတွေဟာ အမျိုးသမီးတွေရဲ့ ကျန်းမာရေးကို စိတ်ရောကိုယ်ပါ ထိခိုက်စေတဲ့ အရာတွေဖြစ်တာကြောင့်၊ အမျိုးသမီးများရဲ့ ကျန်းမာရေးဆိုင်ရာ အခွင့်အရေးတွေကို ထိခိုက်စေပါတယ်။ ဒါကြောင့် အမျိုးသမီးများ အကြမ်းဖက်ခံရမှုမှ ကင်းဝေးစေရေးအတွက် သင့်လျော်သော ဥပေဒေများကို သက်ဆိုင်ရာအစိုးရများမှ ချမှတ်ဆောင်ရွက်ရမှာ ဖြစ်ပါတယ်။

ကျွန်မတို့မြန်မာနိုင်ငံမှာတော့ “သားကိုသခင်၊ လင်ကိုဘုရား”၊ “မယားနေစ၊ ကြောင်သေမှ” စတဲ့ အစွန်းရောက် ထုံးတမ်းစဉ်လာ အဆိုအမိန့်တွေရယ်၊ စီးပွားရေးဆုတ်ယုတ်မှုကြောင့် ဖြစ်ပွားရတဲ့ စိတ်ဖိစီးမှုပေါက်ကွဲမှုတွေရယ်၊ စစ်အုပ်စုရဲ့ “အဓမ္မပြုကျင့်တာကို စစ်ဆင်ရေးလက်နက်အဖြစ်” အသုံးပြုမှုတွေရယ်၊ စတာတွေကြောင့် နိုင်ငံတော်အကြမ်းဖက်မှုခံရတဲ့ အမျိုးသမီးတွေ ရှိနေသလို၊ အိမ်တွင်းအကြမ်းဖက်မှုခံနေရတဲ့ အမျိုးသမီးတွေလဲ အများကြီး ရှိနေကြပါတယ်။ ဒီလိုအကြမ်းဖက်မှုတွေဟာ အမျိုးသမီးတွေရဲ့ ကိုယ်ကျန်းမာ၊ စိတ်ချမ်းသာရေးကို ထိခိုက်မှုဖြစ်လာတာနဲ့အမျှ လုပ်အားနဲ့ နိုင်ငံတော်တည်ဆောက်ရေး၊ အသိဥာဏ်စွမ်းပကားနဲ့ လူ့ဘောင်ကို တိုးတက်စေရေး၊ မိခင်မေတ္တာနဲ့ ကလေးသူငယ်ပြုစုပျိုးထောင်ရေး စတဲ့ စွမ်းဆောင်ရည်တွေကို ကျဆင်းစေလာပါတယ်။ ဒါကြောင့် မြန်မာ့လူ့ဘောင် ဖွံ့ဖြိုးတိုးတက်ရေးအတွက် အမျိုးသမီးများပညာရေး၊ ကျန်းမာရေးအခွင့်အလမ်းများ အပြည့်အ၀ခံစားခွင့်ရရှိရေးကို အကောင်အထည်ဖော် ဆောင်ရွက်ကြပါစို့ လို့ပြောကြားရင်း နိဂုံးချုပ်ပါရစေရှင်။

ခင်မမမျိုး (၂၀၀၉)

(ဒီမိုကရက်တစ် မြန်မာ့အသံ၊ အမျိုးသမီး အခွင့်အလမ်း အစီအစဉ်တွင် ထုတ်လွှင့်ခဲ့သော ဆောင်းပါးဖြစ်ပါသည်)