အမျိုးသမီးနှင့် မိသားစုအခွင့်အလမ်း

ဒီမိုကရက်တစ်မြန်မာ့အသံ ပရိသတ်များရှင်။

အခုတပတ် အမျိုးသမီးအခွင့်အလမ်းအစီအစဉ်မှာ အမျိုးသမီးနဲ့ မိသားစု အခွင့်အလမ်းများကို ရေးသားတင်ပြမှာ ဖြစ်ပါတယ်။ မိသားစုဆိုတာ လူမှုအဆောက်အအုံကို တည်ဆောက်ထားတဲ့ အခြေခံ ယူနစ်လေးတွေ ဖြစ်ပါတယ်။ လူမှုရေးသိပ္ပံပညာရှင်များကတော့ မိသားစုဆိုတာကို လက်ထပ်ထားတဲ့ စုံတွဲ၊ ဒါမှမဟုတ်ရင် အတူနေတဲ့ စုံတွဲလို့ ပုံဖော်သတ်မှတ်ကြပါတယ်။ ဒီစုံတွဲမှာ ကလေးတွေ ရှိရင်လဲ ရှိမယ်။ ကလေးမရှိတဲ့ စုံတွဲလဲ ဖြစ်ချင်ဖြစ်နေမှာပဲ။ ဒီလိုပဲ လင်ယောက်ျား၊ ဇနီးမယားနဲ့ လမ်းခွဲထားပြီး၊ ကလေးနဲ့ အတူနေတဲ့ မိခင်၊ ဖခင်တွေကိုလဲ မိသားစုအနေနဲ့ သတ်မှတ်ကြပါတယ်။



၂၀၀၀ခုနှစ်နောက်ပိုင်း လူမှုရေးရာ သုံးသပ်ချက်တွေမှာ မိသားစု တွေကို စုံတွဲမိသားစု၊ မိခင်တဦးတည်းရှိတဲ့ မိသားစုနဲ့ ဖခင်တဦးတည်းရှိတဲ့ မိသားစု အနေနဲ့ သုံးမျိုးခွဲ ပြောဆိုကြပါတယ်။ မိသားစုနေထိုင်ရာ အိမ်ထောင်စုတွေမှာလဲ မိသားစုတခုတည်း နေထိုင်တဲ့ အိမ်ထောင်စုနဲ့ မိသားစုများစွာ စုပေါင်းနေထိုင်တဲ့ အိမ်ထောင်စု အနေနဲ့ ခွဲခြားသတ်မှတ်ကြပါတယ်။ ဒီလိုစနစ်တကျခွဲခြားသုံးသပ်မှုတွေဟာ လူသားတွေရဲ့ ပြုမူဆောင်ရွက်ပုံ၊ စိတ်ခံစားမှု၊ အခွင့်အလမ်းဆိုင်ရာ လေ့လာမှုတွေကို အထောက်အကူတွေ အများကြီး ပေးပါတယ်။ လူတယောက်ရဲ့ လူအများကို ပြောဆိုဆက်ဆံတာ၊ ဆုံးဖြတ်ချက်ချမှတ်လုပ်ကိုင်တာ၊ လူနေမှုအဆင့်အတန်းနဲ့ ပတ်သက်တဲ့ စံနှုန်းတွေ တိုင်းတာသတ်မှတ်တာ တွေမှာ သူကြီးပြင်းပေါက်ဖွားခဲ့တဲ့ မိသားစု၊ ပတ်ဝန်းကျင်၊ အသိုင်းအ၀ိုင်းရဲ့ ပုံသဏ္ဍာန်တွေကလဲ အများကြီး လွှမ်းမိုးနေတတ်ပါတယ်။

လူမှုရေးသတ်မှတ်ချက်များအရ မိသားစုတွင်းမှာ အမျိုးသမီးတွေဟာ သမီးဘ၀၊ ညီမဘ၀၊ အစ်မ ဘ၀၊ ဇနီးသည်ဘ၀၊ မိခင်ဘ၀ ဆိုတဲ့ အခန်းကဏ္ဍတွေမှာ အရွယ်နဲ့ အချိန်အခါနဲ့ အညီ ပါဝင်ကြရပါတယ်။ ကျောက်ခေတ်ကာလ လူ့အဖွဲ့အစည်းတွေက အစပြုလို့၊ အခုလို တိုးတက်ခေတ်မှီနေတဲ့ ကာလ လူ့အဖွဲ့အစည်းတွေအထိ လုံးဝမပြောင်းလဲသေးတဲ့ စံနှုန်းတခုကတော့ မိသားစုတိုင်းမှာ ကလေးငယ်ပြုစုပျိုးထောင်မှု၊ အိမ်မှုကိစ္စအလုပ်တာဝန်တွေ လုပ်ဆောင်မှုပါပဲ။ အစဉ်အလာ ဓလေ့ထုံးစံတွေကတော့ ဒီတာဝန်တွေကို အမျိုးသမီးများရဲ့ တာဝန်တွေလို့ပဲ သတ်မှတ်ထားခဲ့ပါတယ်။ မိသားစုတွင်းမှာ အမျိုးသမီးတွေ ပြုမူနေထိုင်ရမယ့် ပုံစံတွေကိုလဲ ချမှတ်ထားလေ့ရှိပါတယ်။ အမျိုးသမီးအခွင့်အလမ်း လှုံဆော်သူ ပညာရှင်တွေက ဒါတွေဟာ သဘာဝအတိုင်းဖြစ်နေတာ မဟုတ်ပဲ လူ့အဖွဲ့အစည်းရဲ့ ပုံသွင်းသတ်မှတ်ချက်တွေသာဖြစ်တယ်ဆိုတာ ထောက်ပြပြောဆိုလာကြပါတယ်။

အစဉ်အလာ၊ ဓလေ့ထုံးစံတွေက သမီးတွေဟာ ဖခင်တွေ ပြောတဲ့စကားတွေကို နားထောင်ရမယ်။ ပြန်ပြီး ဆွေးနွေးပြောဆိုတာတွေ မလုပ်ရဘူး၊ ဘယ်လိုအကြောင်းအရာပဲဖြစ်ဖြစ် အိမ်ထောင်စုအကြီးအကဲရဲ့ ပြောဆိုဆုံးဖြတ်မှုကသာ အတည်ဖြစ်တယ်။ ညီမ၊ အစ်မတွေဟာ အစ်ကိုတွေ၊ မောင်တွေနဲ့ ပတ်သက်လာရင် အစစအရာရာ အနစ်နာခံရမယ်။ ပြုစုစောင့်ရှောက်ရမယ်။ အမေတွေအားလုံးဟာ သားသမီးတွေကို ချစ်ရမယ်။ ဇနီးသည်တွေအားလုံးဟာ လင်ယောက်ျားကို မှီခိုရမယ် စတဲ့ လူမှုရေး မျှော်မှန်းချက်တွေကို ချမှတ်ထားလေ့ရှိပါတယ်။ အမျိုးသမီးတွေကလဲ ငယ်စဉ်ကတည်းက ဒါတွေကိုပဲ နားရည်ဝအောင် သင်ယူခဲ့ရတာမို့ ဒီဓလေ့ထုံးစံတွေကို လိုက်နာကြရပါတယ်။ ဒါတွေဟာ မိသားစုအတွင်းမှာ အမျိုးသမီးတွေရဲ့ အခန်းကဏ္ဍကို အမျိုးသမီးတွေကိုယ်တိုင်က ရွေးချယ်ဆုံးဖြတ်ရတာ မဟုတ်ပဲ လူအဖွဲ့အစည်းရဲ့ ပုံသွင်းသတ်မှတ်ချက်တွေကို လိုက်နာလိုက်ရတာပဲ ဖြစ်ပါတယ်။

မိသားစုထဲက သမီးတွေရဲ့ အခန်းကဏ္ဍကို ကြည့်ကြရအောင်ပါ။ တကယ်တော့ မိသားစုထဲကို ကလေးငယ်လေးတယောက်ရောက်လာတယ်ဆိုတာ အင်မတန်ပျော်ရွင်စရာကောင်းတဲ့ အဖြစ်အပျက် လေးပါ။ ဒါပေမယ့် တချို့သော ခေတ်နောက်ပြန်ဆွဲနေတဲ့ လူ့အဖွဲ့အစည်းတွေ၊ စိတ်သဘောထား သေးသိမ်တဲ့ ယောက်ျာ့းတွေကတာ့ မွေးလာတဲ့ကလေးဟာ ယောက်ျားလေးမဟုတ်ပဲ မိန်းကလေးဖြစ်နေခဲ့ရင် ကလေးငယ်လေးကို လက်မခံပဲ စွန့်ပစ်တာ၊ သူများကို ပေးပစ်တာ၊ လက်ခံမွေးထားရင်တောင် ဇနီးသည်ကို နောက်ထပ်ယောက်ျားလေးတယောက် ထပ်မွေးဖို့ တောင်းဆိုတာတွေ ပြုလုပ်တတ်ပါတယ်။ တချို့သောအစွန်းရောက်လူ့အဖွဲ့အစည်းတွေမှာဆို ကလေးငယ်လေးကို ဂရုမစိုက်တာ၊ သတ်ပစ်တာတွေအထိတောင် ဖြစ်တတ်ပါသေးတယ်။ ဒါကြောင့်လဲ မွေးကင်းစမိန်းကလေးသေဆုံးမှုဟာ မွေးကင်းစ ယောက်ျားလေးသေဆုံးမှုထက် ပိုများပါတယ်။ တိုးတက်ပါတယ်ဆိုတဲ့ လူ့အဖွဲ့အစည်းတချို့မှာတောင် မိန်းကလေးမမွေးပဲ ယောက်ျားလေးမွေးလာတာဟာ အလွန်ကံကောင်းသယောင် ပြောဆိုတိုင်းတာမှုတွေ ရှိနေတတ်ပါသေးတယ်။ ပညာရှင်များရဲ့ လေ့လာသုံးသပ်မှုအရ သားငယ်လေးများအပေါ် ဖခင်တွေက ပေးတဲ့ အချိန်ဟာ သမီးငယ်လေးများအပေါ် ဖခင်တွေက ပေးတဲ့ အချိန်ထက် ပိုများတာကို တွေ့ရှိရပါတယ်။ အိမ်ထောင်ကွဲမှုနှုန်းတွေမှာလဲ သားမွေးထားတဲ့ အိမ်ထောင်ထက် သမီးမွေးထားတဲ့ အိမ်ထောင်တွေရဲ့ အိမ်ထောင်ကွဲမှုနှုန်းက ပိုများပါတယ်။ တချို့သော ယောက်ျားတွေက သားမမွေးပဲ သမီးပဲ မွေးတဲ့ အိမ်ထောင်ဘက်တွေအပေါ် အမြင်တမျိုးနဲ့ မြင်တတ်တဲ့ စိတ်ထားတွေ ရှိနေတာကြောင့်လို့ ပညာရှင်များက လေ့လာသုံးသပ်ကြပါတယ်။

ဒီလိုနဲ့ မိသားစုထဲမှာ သမီးငယ်လေးတွေ လူလားမြောက်လာတဲ့အခါမှာကျတော့ မိခင်ဖြစ်သူတွေက နောင်တချိန် ဇနီးသည်၊ မိခင်ဖြစ်လာမယ့် သမီးတွေကို သူနားလည်ထားတဲ့ အစဉ်အလာတွေအတိုင်း ပုံပြန်သွင်းပါတယ်။ သမီးနဲ့ အမေကြားက ဆက်ဆံရေးကို ပညာရှင်တွေက ငယ်ရွယ်တဲ့ မိခင်၊ ဇနီးသည်အဖြစ် ပုံဖော်ပေးတဲ့ ဆက်ဆံရေးလို့ သတ်မှတ်ပြောဆိုကြပါတယ်။ အိမ်တွင်းမှုလုပ်ငန်း တာဝန်တွေနဲ့ ပတ်သက်ရင်သမီးနဲ့သားတွေမှာ သမီးကိုသာ ရွေးချယ်စေခိုင်းလေ့ရှိပြီး၊ သားတွေကိုကျတော့ ပညာတတ်အောင်၊ လူမှုဆက်ဆံရေး ကျွမ်းကျင်လာအောင် လေ့ကျင့်ပေးတဲ့ မိသားစုပုံသွင်းမှုတွေ အများကြီး ရှိပါတယ်။ မိခင်တွေကတင် မဟုတ်ပါဘူး။ ဖခင်တွေကလဲ သူတို့ရဲ့ သမီးငယ်တွေကို ငယ်ရွယ်တဲ့ အမျိုးသမီးလေးတွေအဖြစ် ရှုမြင်ပါတယ်။ သမီးငယ်လေးတွေအပေါ်မှာ စိတ်ပိုင်းဆိုင်ရာ၊ ရုပ်ပိုင်းဆိုင်ရာ လွှမ်းမိုးလို့ရနိုင်အောင် ကြိုးစားဆက်ဆံကြပါတယ်။ တချို့ ဖခင်တွေဆိုရင် မိသားစုထဲမှာ ယောက်ျားတွေက အကြီးအကဲတွေဖြစ်ပြီး၊ မိန်းမတွေက ယောက်ျားတွေကို ပြုစုကျွေးမွေးဖို့၊ လိုအပ်တာ ဖြည့်ဆည်းပေးဖို့ လုပ်ရမယ်ဆိုပြီး သမီးငယ်လေးတွေကို နှိမ့်ချဆက်ဆံမှုတွေ ပြုလုပ်တတ်လေ့ရှိပါတယ်။

အခုဆက်လက်ပြီး၊ မိသားစုထဲမှာ ညီမတွေ၊ အစ်မတွေအဖြစ် နေထိုင်ရတဲ့ အမျိုးသမီးများရဲ့ အခန်းကဏ္ဍကို တင်ပြပေးပါမယ်။ တချို့ မိသားစုတွေမှာဆိုရင် သားတွေက နေရာပိုပေးခံရပြီး၊ သမီးတွေကို နှိမ့်ချဆက်ဆံတာတွေ ရှိတတ်ပါတယ်။ သားတွေရဲ့ ပညာရေးအောင်မြင်မှုတွေ၊ အစွမ်းအစတွေကို သမီးတွေရဲ့ အောင်မြင်မှုတွေထက် ပိုမို တန်ဖိုးထားတတ်ကြပါတယ်။ မောင်နှမဆက်ဆံရေးမှာကျတော့ မိဘတွေရဲ့ ဆက်ဆံမှုပုံစံကို ပုံတူကူးယူပြီး၊ မောင်တွေ၊ အစ်ကိုတွေက ညီမ၊ အစ်မတွေကို အားနွဲ့တဲ့ အမျိုးသမီးများအဖြစ် ခွဲခြားဆက်ဆံမှုတွေ ရှိလာတတ်ပါတယ်။ တချို့လူ့အဖွဲ့အစည်းတွေမှာကျတော့ အစ်မတွေ၊ ညီမတွေဟာ သဘာဝအရ အားနည်းသူတွေ၊ ၀င်ငွေနည်းသူတွေ၊ လင်ယောက်ျားအပေါ်မှာ မှီခိုရမယ့်သူတွေ၊ မိမိကိုယ်ကို ယုံကြည်မှုအားနည်းသူတွေဖြစ်တာကြောင့် ကာကွယ်စောင့်ရှောက်ပေးဖို့ တာဝန်ရှိတယ်လို့ ထင်မြင်ယူဆတဲ့ အစ်ကိုတွေ၊ မောင်တွေလဲ ရှိပါတယ်။

အမျိုးသမီးများရဲ့ မိသားစုအခန်းကဏ္ဍ နောက်တမျိုးကတော့ ဇနီးသည်ဘ၀ဖြစ်ပါတယ်။ အစဉ်အလာတွေကတော့ လင်ယောက်ျားကို အကြီးအကဲ အိမ်ဦးနတ်အဖြစ် သတ်မှတ်ခိုင်းလေ့ရှိပါတယ်။ ဒီအစဉ်အလာတွေကို အမျိုးသားတွေက ပုံဖော်ခဲ့တာလား၊ အမျိုးသမီးတွေက ပုံဖော်ခဲ့တာလား သေချာ မသိနိုင်ပေမယ့် အမျိုးသားများအပေါ် အလေးသာမှုပေးပြီး၊ အမျိုးသမီးများရဲ့ တန်းတူရည်တူ လူသားအခွင့်အရေးတွေကို ကန့်သတ်ချုပ်ချယ်ထားပါတယ်။ အမျိုးသမီးတွေ ဇနီးသည်ဘ၀ ရောက်ရတဲ့ အကြောင်းရင်းတွေ အများအပြားရှိပါတယ်။ တချို့ကကျတော့ ဆွေစဉ်မျိုးဆက် ထုံးစံတွေအရ ဆွေမျိုးအချင်းချင်း ပြန်လည်ပေါင်းစပ်ပေးတာကြောင့်ဖြစ်ပါတယ်။ တချို့ကျတော့ မိဘအသိုင်းအ၀ိုင်းက ရွေးချယ် ဆုံးဖြတ်ပေးတာဖြစ်ပါတယ်။ တချို့ကျတော့ ကိုယ်ပိုင်ဆုံးဖြတ်ချက်နဲ့ ဘ၀လက်တွဲဖော် ရွေးချယ်တာဖြစ်ပါတယ်။ တချို့ကျတော့လဲ အမျိုးသားတွေရဲ့ ထောင်ချောက်ထဲ မတော်တဆ ကျရောက်သွားလို့ အခြေအနေအရ ဇနီးသည်ဖြစ်လာတာဖြစ်ပါတယ်။ ဘယ်လိုပဲဖြစ်ဖြစ် ဇနီးသည်ဘ၀ရောက်လာတဲ့ အမျိုးသမီးတွေမှာ မိမိကံကြမ္မာကို မိမိရွေးချယ်ဆုံးဖြတ်နိုင်တဲ့ အခွင့်အရေးတွေ ရှိရမှာ ဖြစ်ပါတယ်။ တချို့သော အိမ်ထောင်ဘက်တွေက အမျိုးသမီးတွေရဲ့ ပညာရေးနဲ့ အလုပ်အကိုင် တိုးတက်မှု အခွင့်အလမ်းတွေကို ကန့်သတ်ထားတတ်ကြပါတယ်။ အမျိုးသမီးတွေရဲ့ ကလေးယူတာ၊ မယူတာတွေအပေါ်မှာလဲ လင်ယောက်ျားကသာ ဆုံးဖြတ်တတ်ကြပါတယ်။ ကလေးမွေးဖွားခြင်း၊ သားဆက်ခြားခြင်း ကိစ္စတွေမှာ အမျိုးသမီးများက ဆုံးဖြတ်နိုင်တဲ့ အခွင့်အရေးတွေ ရှိလာဖို့ လိုအပ်ပါတယ်။

မိခင်ဘ၀မှာလဲ ဒီအတိုင်းပါပဲ။ လူ့အဖွဲ့အစည်းက မိခင်တွေရဲ့ အခန်းကဏ္ဍကို ကန့်သတ်တာတွေ လုပ်တတ်လေ့ရှိပါတယ်။ ကလေးအမေဖြစ်နေပြီ။ အလည်အပတ်မသွားနဲ့။ အိမ်မှာပဲနေ။ ကလေးကို စောင့်ရှောက်ဆိုတဲ့ ဆုံးမသံလိုလို သြ၀ါဒတွေကို တချို့လူ့အဖွဲ့အစည်းမှာ ပြောလေ့ရှိပါတယ်။ တိုးတက်တဲ့ လူ့အဖွဲ့အစည်းတွေမှာကျတော့ ကလေးရဲ့ ကျန်းမာရေးအတွက် လေကောင်းလေသန့်ရဖို့ ကလေးငယ်လေးတွေကို မိခင်က နေ့စဉ်ခေါ်ထုတ်လမ်းလျှောက်ပေးရမယ်၊ တွန်းလှည်းလေးတွေနဲ့ ပန်းခြံကို ခေါ်သွားသင့်တယ်လို့ အကြံပေးပြီး မွေးကင်းစကလေးငယ်လေးတွေအတွက် လိုအပ်တဲ့ တွန်းလှည်း၊ အသုံးအဆောင်၊ ပြင်ပကို ခေါ်ဆောင်သွားရင် လိုအပ်မယ့် အရာတွေ ၀ယ်ယူဖြည့်ဆည်းဖို့ နိုင်ငံတော်ကနေ ကလေးမွေးပြီးစ မိသားစုတွေကို စရိတ်ထုတ်ပေးပါတယ်။ ငယ်စဉ်ကတည်းက ပြင်ပလူ့အဖွဲ့အစည်းနဲ့ ထိတွေ့ဆက်ဆံမှုရှိတဲ့ကလေးနဲ့ သီးခြား မိသားစုဝန်းကျင်မှာ ကြီးလာရတဲ့ ကလေးတွေရဲ့ လူ့အဖွဲ့အစည်းနဲ့ ဆက်နွယ်မှုပုံစံတွေဟာ ကွာခြားတတ်ပါတယ်။ ဒါတွင် မကသေးပါဘူး။ တချို့သော လူ့အဖွဲ့အစည်းတွေမှာဆိုရင် ဖခင်ဖြစ်သူတွေက မိခင်ဖြစ်သူကို သားသမီးများရှေ့မှာ နှိမ့်ချဆက်ဆံပြတာတွေကြောင့် မိခင်အပေါ်မှာ သားသမီးများရဲ့ လေးစားမှုလျော့သွားတာတွေလဲ ဖြစ်တတ်ပါတယ်။ သားသမီးတွေကို မိခင်တဦးတည်းက စောင့်ရှောက်ရတဲ့ မိသားစုတွေရဲ့ မိခင်တွေအပေါ်မှာလဲ တယောက်တည်း ထိန်းသိမ်းစောင့်ရှောက်လို့ အောင်မြင်မှာ မဟုတ်ကြောင်း နှိမ့်ချပြောဆိုတတ်တဲ့ လူ့အဖွဲ့အစည်းတွေ ရှိနေတတ်ပါသေးတယ်။ မိသားစုထဲမှာ မိခင်တွေအားလုံး တန်းတူညီတူ အခွင့်အရေးတွေရဖို့၊ အပြန်အလှန်လေးစားမှုတွေ ရှိဖို့ အထူးပဲလိုအပ်လှပါတယ်။

ဒီမိုကရက်တစ်မြန်မာ့အသံ ပရိသတ်များရှင်။

တကယ်တော့ မိသားစုတခုအတွင်းမှာ အပြန်အလှန်လေးစားမှု၊ တန်းတူညီမျှအခွင့်အရေးရှိမှုတွေဟာ အလွန်ပဲ အရေးကြီးပါတယ်။ အမျိုးသမီးတွေအနေနဲ့ သမီးဘ၀မှာပဲဖြစ်ဖြစ်၊ မိခင်ဘ၀မှာပဲဖြစ်ဖြစ်၊ ဇနီးသည်ဘ၀မှာပဲဖြစ်ဖြစ်၊ အစ်မ၊ ညီမဘ၀မှာပဲဖြစ်ဖြစ် ဘယ်လိုအခန်းကဏ္ဍမျိုးမှာပဲ ရှိနေရှိနေ၊ သက်ဆိုင်ရာ မိသားစုဝင်တွေက အမျိုးသမီးများရဲ့ တန်းတူညီမျှ အခွင့်အရေးတွေကို အသိအမှတ်ပြုပေးဖို့ လိုအပ်လှပါတယ်။ အပြန်အလှန်လေးစားမှုတွေနဲ့ ဆက်ဆံရမှာဖြစ်ပါတယ်။ အကြောက်တရားကင်းတဲ့၊ လွှမ်းမိုးချုပ်ချယ်မှုကင်းတဲ့ လူ့ဘောင်ကသာ လူသားအားလုံးရဲ့ သာယာအေးချမ်း၊ ပျော်ရွှင်မှုတွေကို ဆောင်ကျဉ်းပေးနိုင်မှာဖြစ်ပါတယ်။ လူ့အဖွဲ့အစည်းဆိုတာ မိသားစုဆိုတဲ့ အခြေခံယူနစ်လေးတွေနဲ့ ဖွဲ့စည်းထားတာကြောင့် မိသားစုတွင်းက အမျိုးသားနဲ့ အမျိုးသမီး တန်းတူညီမျှမှုကနေ လူ့အဖွဲ့အစည်းတခုလုံးရဲ့ တန်းတူုညီမျှမှုအထိ တည်ဆောက်ရင်း တိုးတက်သော မြန်မာ့ လူ့ဘောင်ကို ရှေးရှုတည်ဆောက်ကြပါစို့လို့ တိုက်တွန်းလိုက်ရပါတယ်ရှင်။