အမျိုးသမီးနှင့် ငြိမ်းချမ်းရေး

စစ်ပွဲများနဲ့ အမျိုးသမီးများအရေးဟာ ဆက်စပ်နေတာကြောင့် စစ်မက်ရေးရာတွေမှာ အမျိုးသမီးတွေရဲ့ ပြောရေးဆိုခွင့်ရရှိဖို့ဟာ အရေးကြီးသလို၊ ငြိမ်းချမ်းရေးဆောင်ရွက်မှုများမှာလဲ အမျိုးသမီးများရဲ့ ပါဝင်ဆောင်ရွက်ခွင့်၊ ဆွေးနွေးပြောဆိုခွင့်တွေဟာ အရေးကြီးလှပါတယ်။ စစ်နဲ့ ငြိမ်းချမ်းရေးဆိုတာကို တချို့က လုံးဝဆန့်ကျင်ဘက်လို့ ယူဆကြပေမယ့်၊ ဒီနှစ်ခုဟာ အမြဲတမ်း ခြားနားနေတာတော့ မဟုတ်ပါဘူး။ ငြိမ်းချမ်းရေးအတွက် တိုက်ရတဲ့ စစ်ပွဲတွေလဲ ကမ္ဘာတလွှားမှာ အမြောက်အမြား ရှိခဲ့ဖူးပါတယ်။ စစ်ရေး၊ ငြိမ်းချမ်းရေးဆိုင်ရာ နိုင်ငံရေးသိပ္ပံပေါ် အခြေခံပြီး ကွဲပြားခြားနားတဲ့ အမျိုးသမီးဝါဒတွေကို နိုင်ငံရေးပညာရှင် မေရီဘားကူးစ်က သုံးမျိုးခွဲခြားပြီး ဖော်ပြခဲ့ဖူးပါတယ်။ ပစိဖိတ်အမျိုးသမီးဝါဒီများက အမျိုးသမီးတွေရဲ့ ပင်ကိုယ်စိတ်ဖြစ်တဲ့ မိခင်စိတ်ဟာ ငြိမ်းချမ်းရေးဆိုင်ရာ ဆောင်ရွက်မှုများအတွက် သင့်လျော်တယ်လို့ အဆိုပြုခဲ့ကြပြီး၊ ငြိမ်းချမ်းရေးလမ်းစဉ်များအတွက် အမျိုးသမီးများကို အသုံးပြုဖို့ တောင်းဆိုခဲ့ကြပါတယ်။ လစ်ဘရယ်အမျိုးသမီးဝါဒီများကတော့ အမျိုးသမီးများနဲ့ အမျိုးသားများဟာ တန်းတူညီမျှခွင့်ရှိရမှာဖြစ်တဲ့အတွက် စစ်မက်ရေးရာ ဆုံးဖြတ်ချက်များမှာပါ အမျိုးသားများနဲ့ အမျိုးသမီးများ တန်းတူရည်တူ ပါဝင်ဆုံးဖြတ်နိုင်ခွင့်ကို တောင်းဆိုခဲ့ကြပါတယ်။ စစ်မက်ဆန့်ကျင်ရေး အမျိုးသမီးဝါဒီများကတော့ လက်နက်ကိုင်စစ်ပွဲများနဲ့ လုံခြုံရေးကို စစ်ရေးရှုထောင့်က ရှုမြင်သုံးသပ်ချက်အားလုံးကို ဆန့်ကျင်ပြောဆိုခဲ့ကြပါတယ်။ အခုတပတ် “အမျိုးသမီးနဲ့ နိုင်ငံရေး” အစီအစဉ်မှာ အမျိုးသမီးနဲ့ ငြိမ်းချမ်းရေးကဏ္ဍကို ဆွေးနွေးတင်ပြသွားပါမယ်။



အစဉ်အလာ ဓလေ့ထုံးစံတွေအရ အမျိုးသားတွေဟာ အမျိုးသမီးတွေကို ငြိမ်းချမ်းရေးဆွေးနွေးပွဲတွေ၊ စေ့စပ်ညှိနှိုင်းပွဲတွေကနေ ဖယ်ရှားထားတတ်ကြပါတယ်။ ဒါပေမယ့် အမျိုးသမီးတွေရဲ့ အသံတွေဟာ ငြိမ်းချမ်းရေးဆွေးနွေးပွဲတွေဆီကို တစထက်တစ ရွေ့လျားနေရာယူလာခဲ့ပါတယ်။ (၁၈၇၀) ခုနှစ်မှာတုန်းက ဖရန်ကို-ပါရှန်းစစ်ပွဲနဲ့ အမေရိကန် ပြည်တွင်းစစ်တွေကို ဆန့်ကျင်ပြီး၊ မိခင်တွေဟာ တခြားမိခင်တွေရဲ့ သားတွေကို သတ်ဖြတ်ဖို့အတွက် သူတို့သားတွေကို ပြုစုပျိုးထောင်ခဲ့တာ မဟုတ်ဘူး လို့ အဆိုပြုခဲ့တဲ့ Julia Howe ဆိုတဲ့ အမျိုးသမီးကြီးဟာ အမျိုးသမီးနဲ့ ငြိမ်းချမ်းရေးဆိုင်ရာ လေ့လာမှုတွေမှာ နာမည်ကျော်ကြားလှပါတယ်။ ဆယ့်ကိုးရာစုနှောင်းပိုင်းနဲ့ နှစ်ဆယ်ရာစုအစပိုင်း ကာလများရောက်တဲ့အခါကျတော့ အမျိုးသမီးများဦးဆောင်တဲ့ ကလေးသူငယ်အခွင့်အရေး ဆိုင်ရာလှုပ်ရှားမှုတွေ၊ ပညာရေး၊ ကျန်းမာရေးပြုပြင်ပြောင်းလဲမှုဆိုင်ရာ လှုပ်ရှားမှုတွေ အများအပြား ပေါ်ပေါက်လာပါတယ်။ ၁၉၁၅ ခုနှစ်မှာ ကျင်းပတဲ့ Hague ငြိမ်းချမ်းရေးကွန်ဖရင့်မှာ အမျိုးသမီး တစ်ထောင်ကျော်တက်ရောက်ခဲ့ပြီး၊ စစ်ပွဲတွေမှာ အမျိုးသမီးတွေကို ကာကွယ်ပေးရမယ်ဆိုတဲ့ အချက်ကို တညီတညွတ်တည်း ငြင်းဆိုခဲ့ကြပါတယ်။ စစ်ပွဲဖြစ်မှ အမျိုးသမီးတွေကို ကာကွယ်တာထက် စစ်မဖြစ်အောင် ငြိမ်းချမ်းရေးလုပ်ရမယ်ဆိုတာကို လက်ခံအတည်ပြုခဲ့တာကြောင့် အစိုးရ ဆယ့်လေးခုဆီကို ငြိမ်းချမ်းရေးစကားပြောဆိုဖို့ အမျိုးသမီးကိုယ်စားလှယ်များ ရွေးချယ်စေလွှတ် ခဲ့ကြပါတယ်။ အဲဒီအချိန်ကာလကစပြီး အမျိုးသမီးငြိမ်းချမ်းရေးလှုပ်ရှားမှုများ စတင်ခဲ့ရာက ၁၉၈၀ပြည့်လွန် ကာလများရောက်တော့ ကမ္ဘာ့ငြိမ်းချမ်းရေး လှုပ်ရှားမှုများအတွက် အမျိုးသမီးများ ဦးဆောင်ဖွဲ့စည်းခဲ့ကြတဲ့ အစိုးရမဟုတ်သော အဖွဲ့အစည်းတွေ ပေါ်ပေါက်လာခဲ့ပါတယ်။

အာရှတိုက်မှာဆိုရင် ဖိလစ်ပိုင်အမျိုးသမီးများဟာ ကလေးငယ်တွေကို အကာအကွယ်ပေးမယ့် ငြိမ်းချမ်းရေးဇုန်တွေကို ပြုလုပ်ပေးနိုင်ခဲ့ပါတယ်။ အထင်ရှားဆုံးဥပမာတခုကတော့ အိုင်ယာလန်မြောက်ပိုင်းက အမျိုးသမီးမဟာမိတ်အဖွဲ့ပါ။ ပညာရေး၊ ကျန်းမာရေး၊ ကလေးသူငယ်ပြုစုပျိုးထောင်ရေး၊ မိုင်ခရိုအင်တာပရိုက်စ်စတဲ့ ရေးရာလေးတွေဟာ တဘက်နဲ့တဘက်ရန်သူလို တိုက်ခိုက်နေကြတဲ့ ကက်သလစ်နဲ့ ပရိုတက်စတင့် ဘာသာဝင်အမျိုးသမီးတွေကို ညီညွတ်စွာပြဿနာဖြေရှင်းရေးအတွက် ပူးပေါင်းမိစေခဲ့ပါတယ်။ အဲဒီကစတင်ပြီး အိုင်းရစ်အမျိုးသမီးတွေဟာ ငြိမ်းချမ်းရေးလှုပ်ရှားမှုများကို အကောင်အထည်ဖော် ဆောင်ရွက်ပြီး၊ အိုင်ယာလန်ငြိမ်းချမ်းရေးဖြစ်စဉ်မှာ တက်တက်ကြွကြွ ပါဝင်ခဲ့ကြပါတယ်။

ဒီလိုငြိမ်းချမ်းရေးလှုပ်ရှားမှုများနဲ့ ပတ်သက်ပြီး၊ နိုင်ငံရေးပညာရှင် ဘားဂစ်ဘရော့ခ်က အမျိုးသမီးတွေရဲ့ ငြိမ်းချမ်းရေးလှုပ်ရှားမှုများဟာ အကြမ်းမဖက်လှုပ်ရှားမှု၊ ပါတီနိုင်ငံရေးမဟုတ်တဲ့ နိုင်ငံရေးလှုပ်ရှားမှုနဲ့ လူသားတွေရဲ့ အသက်တွေ၊ ဘ၀တွေကို ကယ်တင်မှုစတဲ့ အချက်သုံးချက်ပေါ်မှာ အခြေခံတယ်လို့ အဆိုပြုခဲ့တယ်။ သူ့အဆိုကို အချို့ကလက်ခံခဲ့ကြပေမယ့် အကြမ်းမဖက်လှုပ်ရှားမှုဆိုတာနဲ့ ပတ်သက်လို့ကတော့ သက်ဆိုင်ရာနိုင်ငံတွေရဲ့ အုပ်ချုပ်ရေးစနစ်တွေပေါ်မှာ မူတည်ကြောင်း ငြင်းဆိုမှုတွေ ပေါ်ထွက်လာခဲ့တယ်။ တကယ်တော့ နိုင်ငံတနိုင်ငံမှာ ငြိမ်းချမ်းရေး၊ တရားဥပဒေစိုးမိုးမှုရှိရေး၊ နိုင်ငံသူနိုင်ငံသားများရဲ့ ဘ၀လုံခြုံတိုးတက်မှုရှိရေးဆိုတာက အဲဒီနိုင်ငံရဲ့ နိုင်ငံရေးစနစ်ပေါ်မှာလဲ အများကြီး မူတည်နေတာကြောင့်၊ အချို့သော အမျိုးသမီးများဟာ ဖောက်ပြန်တဲ့နိုင်ငံရေးစနစ်တွေ၊ ဖိနှိပ်ချုပ်ချယ်တဲ့ နိုင်ငံရေးစနစ်တွေ၊ နိုင်ငံတော်အကြမ်းဖက်မှု ပြုလုပ်နေတဲ့ အာဏာရှင်တွေကို တော်လှန်ဖို့ လက်နက်ကိုင်တော်လှန်ရေး ဆင်နွှဲရတာဖြစ်ကြောင်း ပြောဆိုသူတွေလဲ ပေါ်ပေါက်လာခဲ့တယ်။ နိုင်ငံရေးပညာရှင် ကော့ခ်ကတော့ အမျိုးသမီး တော်လှန်ရေးသမားများဟာ မိခင်စိတ်ရှိတဲ့ ငြိမ်းချမ်းရေးလိုလားသူများ ဖြစ်တာအတွက်ကြောင့် မတရားမှုတွေတွေ့လာတဲ့အခါမှာ လက်ပိုက်ကြည့်မနေနိုင်တော့ပဲ တော်လှန်ရေးသမားတွေ ဖြစ်လာရတာလို့ ဆိုခဲ့ပါတယ်။ ဘယ်လိုပဲဖြစ်ဖြစ် ငြိမ်းချမ်းရေးအတွက် တော်လှန်ရေးလုပ်တဲ့ အမျိုးသမီး လှုပ်ရှားမှုများအပါအ၀င်၊ အမျိုးသမီးငြိမ်းချမ်းရေးလှုပ်ရှားမှု လှိုင်းလုံးကြီးဟာ ကမ္ဘာတ၀ှမ်းလုံးမှာ တစတစ မြင့်တက်လာခဲ့ပါတယ်။

အခုဆိုရင် ကမ္ဘာတလွှားက ငြိမ်းချမ်းရေးအတွက် စေ့စပ်ဆွေးနွေးပွဲတွေ၊ ငြိမ်းချမ်းရေးတည်ဆောက်မှု လုပ်ငန်းစဉ်တွေမှာ အမျိုးသမီးတွေရဲ့ အခန်းကဏ္ဍဟာ တစတစ ကြီးမားလာခဲ့ပါပြီ။ ကမ္ဘာ့ကုလသမဂ္ဂက ဦးစီးကျင်းပတဲ့ အမျိုးသမီးရေးရာကွန်ဖရင့်ကြီးတွေမှာ ကမ္ဘာတ၀ှမ်းက အမျိုးသမီးအခွင့်အရေး လှုပ်ရှားသူများဟာ သူတို့ရဲ့ အတွေ့အကြုံတွေကို နှီးနှောဖလှယ်ခွင့်ရကြပြီး၊ အမျိုးသမီးများ ချိတ်ဆက်လှုပ်ရှားကြတဲ့ ကွန်ယက်များကလဲ တစတစ ကျယ်ပြန့်လာခဲ့ပါပြီ။ အမျိုးသမီးအခွင့်အရေးဟာ လူ့အခွင့်အရေးဖြစ်တယ်ဆိုတဲ့ အခြေခံသဘောတရားကိုလဲ နိုင်ငံတကာအစိုးရအများစုက သဘောတူလက်ခံခဲ့ကြရပါပြီ။ ၂၀၀၈ခုနှစ်၊ အောက်တိုဘာလ (၂၉) ရက်နေ့မှာ ကျင်းပခဲ့တဲ့ ကုလသမဂ္ဂလုံခြုံရေးကောင်စီရဲ့ ခြောက်ထောင့် ငါးကြိမ်မြောက် အစည်းအဝေးမှာ ကမ္ဘာ့ကုလသမဂ္ဂအမျိုးသမီးများ ဖွံ့ဖြိုးတိုးတက်ရေးရံပုံငွေအဖွဲ့မှ အမှုဆောင်ဒါရိုက်တာ အိုင်ရင်းအယ်လ်ဘာတီက အမျိုးသမီးများဟာ ပဋ္ဋိပက္ခဖြေရှင်းရေး၊ ငြိမ်းချမ်းရေးနဲ့ လုံခြုံရေး လုပ်ငန်းစဉ်များမှာ ပါဝင်ဆောင်ရွက်ရမှာဖြစ်ကြောင်း တိုက်တွန်းပြောဆိုခဲ့ပါတယ်။ ကျား၊မရေးရာနဲ့ အမျိုးသမီးများ ဘ၀တိုးတက်မြင့်မားမှုဆိုင်ရာမှာ ကုလသမဂ္ဂအထွေထွေအတွင်းရေးမှူးချုပ်ရဲ့ အထူးအကြံပေး ပုဂ္ဂိုလ်ဖြစ်တဲ့ ရေချယ်မေရန်ဂျာကလည်း ငြိမ်းချမ်းရေးနဲ့ လုံခြုံရေးဆိုင်ရာကိစ္စရပ်တွေမှာ အမျိုးသမီးများမှ အမျိုးသားများနည်းတူ တန်းတူရည်တူ ပါဝင်ခွင့်ရရေးနဲ့ ဆုံးဖြတ်ချက်များ ချမှတ်ဆောင်ရွက်ခွင့်ရရေးဟာ ပဋ္ဋိပက္ခဖြေရှင်းရေးအတွက် အရေးပါသော အချက်တချက်ဖြစ်ကြောင်း ပြောကြားခဲ့ပါတယ်။

ကမ္ဘာတ၀ှမ်းမှာ ဒီလိုပြောင်းလဲမှုတွေ ဖြစ်ပေါ်နေဆဲမှာပဲ ကျွန်မတို့မြန်မာပြည်မှာတော့ အမျိုးသမီးများကနေ ငြိမ်းချမ်းရေးဆောင်ကျဉ်းပေးနိုင်ခွင့် အခွင့်အရေးများကို ကန့်သတ် ခံထားရပါတယ်။ စစ်အာဏာပိုင်များဟာ လူထုခေါင်းဆောင် ဒေါ်အောင်ဆန်းစုကြည်ကို ကမ္ဘာက ငြိမ်းချမ်းရေးနိုဘယ်ဆု ပေးအပ်တာကိုတောင် အသိအမှတ်မပြုခဲ့ပါဘူး။ ငြိမ်းချမ်းရေးအတွက် တွေ့ဆုံဆွေးနွေးပွဲများကိုလဲ ထပ်ခါတလဲလဲ လျစ်လျူရှုထားခဲ့ပါတယ်။ ငြိမ်းချမ်းစွာဆန္ဒပြခဲ့ကြတဲ့ အမျိုးသမီးကျောင်းသူခေါင်းဆောင် မနီလာသိန်း၊ မမီးမီးစတဲ့ အမျိုးသမီးများစွာကိုလည်း နှစ်ရှည်ထောင်ဒဏ်များ ချမှတ်ထားခဲ့ပါတယ်။ စစ်အုပ်စုမှ ရေးဆွဲထားတဲ့ ဖွဲ့စည်းပုံအခြေခံဥပေဒေမှာလည်း နိုင်ငံတော်ကာကွယ်ရေး၊ လုံခြုံရေးကိစ္စရပ်များတွေမှာ အမျိုးသားများနဲ့ပဲ ဖွဲ့စည်းထားတဲ့ တပ်မတော်ကသာ ဦးဆောင်နိုင်ရေး ထည့်သွင်းထားတာကြောင့် အမျိုးသမီးများရဲ့ အခန်းကဏ္ဍကို ကန့်သတ်ထားသလို ဖြစ်နေတယ်။ မြန်မာအမျိုးသမီးများ အတွက်တော့ နိုင်ငံတကာအမျိုးသမီးများနည်းတူ ပဋ္ဋိပက္ခဖြေရှင်းရေး၊ အမျိုးသားပြန်လည်သင့်မြတ်ရေး၊ တိုင်းပြည်ထူထောင်ရေးနဲ့ ငြိမ်းချမ်းရေးရေရှည်တည်တံ့ခိုင်မြဲရေး လုပ်ငန်းစဉ်တွေကို ဖော်ဆောင်နိုင်မယ့် အခွင့်အလမ်းများဟာ အလွန်ပင်ရှားပါးနေဆဲပဲဖြစ်ပါတယ်။ ဒါကြောင့် မြန်မာအမျိုးသမီးများရဲ့ ပြည်တွင်းပြည်ပ ငြိမ်းချမ်းရေးဖြစ်စဉ်များမှာ တက်တက်ကြွကြွ ပါဝင်ဆောင်ရွက်နိုင်မှု အခွင့်အရေးများကို ထိန်းချုပ်ထားတဲ့ စစ်အုပ်စုကို ဖယ်ရှားပစ်ဖို့ လိုအပ်လှပါကြောင်း တိုက်တွန်းပြောကြားလိုက်ပါတယ်။

ခင်မမမျိုး (၂၀၀၉)