Briefing Paper on Military Intervention by Khin Ma Ma Myo
ခေါင်းဆောင်များနှင့် ဆက်ဆံရေးကွက်လပ်များ
Friday, October 23, 2009
စီးပွားရေးလုပ်ငန်းတွေမှာဖြစ်ဖြစ်၊ နိုင်ငံရေးအဖွဲ့အစည်းတွေမှာဖြစ်ဖြစ်၊ လူမှုရေးလုပ်ငန်းတွေမှာဖြစ်ဖြစ်၊ ဘာသာရေးအဖွဲ့တွေမှာဖြစ်ဖြစ် ခေါင်းဆောင်တွေ အများအပြား ရှိပါတယ်။ ဒီခေါင်းဆောင်တွေထဲမှာ တချို့က လူအများကြားမှာ ရေပန်းစားတာ၊ တချို့က နောက်ကွယ်က ကြိုးကိုင်ခေါင်းဆောင်မှုပေးတာ၊ တချို့က လုပ်နည်းလုပ်ဟန်အရ ခေါင်းဆောင်တာ၊ တချို့က အတွေးအခေါ်အရ ခေါင်းဆောင်တာ ဆိုပြီး ပုံသဏ္ဍာန်အမျိုးမျိုးနဲ့ ခေါင်းဆောင်သူတွေရှိပါတယ်။ ဒီခေါင်းဆောင်တွေထဲမှာမှ ထင်ပေါ်ကျော်ကြားတဲ့ ခေါင်းဆောင်တွေအတွက် ခေါင်းဆောင်မှုအရည်အချင်းတွေ၊ ဆက်ဆံရေး အရည်အချင်းတွေ ပြည့်ဝနေဖို့ အလွန်ပဲ အရေးကြီးပါတယ်။ ဒီအရည်အချင်းတွေမှာ ချို့ယွင်းအားနည်းချက်တွေရှိနေရင် မလိုလားအပ်တဲ့ ဆိုးကျိုးတွေဖြစ်တဲ့ အဖွဲ့အစည်းတွေ ပြိုကွဲတာ၊ လုပ်ငန်းတွေ ပြိုလဲတာ၊ ရည်မှန်းချက် မပြည့်မှီတာတွေ ဖြစ်လေ့ဖြစ်ထရှိပါတယ်။
ဆက်ဆံရေးဆိုတာမှာ အဖွဲ့အစည်းရဲ့ အသွင်သဏ္ဍာန်ပေါ်မှာ မူတည်ပြီး ဆက်ဆံရမယ့် အုပ်စုတွေရှိပါတယ်။ ဥပမာ- စီးပွားရေးလုပ်ငန်းတခုရဲ့ ဦးဆောင်ဒါရိုက်တာတယောက်ဟာ ကုမ္ပဏီရဲ့ ဒါရိုက်တာ ဘုတ်အဖွဲ့နဲ့ ဆက်ဆံရပါတယ်။ ဒီလိုဆက်ဆံတဲ့အခါမှာ အပြန်အလှန်ယုံကြည်မှုကို တည်ဆောက်ယူရပါတယ်။ စနစ်တကျ စီမံခန့်ခွဲမှု၊ လုပ်ငန်းအမြတ်အစွန်းရရှိမှု၊ ပြိုင်ဘက်လုပ်ငန်းတွေကို အနိုင်ယူနိုင်မှု၊ ဈေးကွက်အခြေအနေကို မျက်ခြေမပြတ်သုံးသပ်လေ့လာတတ်မှု၊ ဖောက်သည်တွေနဲ့ ဆက်ဆံရေး စတာတွေက ဒါရိုက်တာဘုတ်အဖွဲ့က လိုလားတဲ့ အရည်အချင်းတွေဖြစ်ပါတယ်။ ဒီအရည်အချင်းတွေကို ဖော်ထုတ်အသုံးပြုနိုင်တဲ့အခါ ဘုတ်အဖွဲ့က လေးစားယုံကြည်မှုတိုးလာပါတယ်။ ဒါက Private company တွေမှာပါ။ Public company ဆိုရင်တော့ ရှယ်ယာထည့်ဝင်ထားသူတွေက အကျိုးအမြတ်ရရှိမှု၊ ဈေးကွက်ထိုးဖောက်နိုင်တဲ့အင်အား၊ လုပ်ငန်းအမည်ကောင်း စတာတွေကို လိုလားကြပါတယ်။ လုပ်ငန်းကြီးတွေမှာ shareholder အစည်းအဝေးတွေလုပ်ကြတာက လုပ်ငန်းကိုဦးဆောင်လုပ်နေသူတွေနဲ့ ရှယ်ယာပိုင်ဆိုင်သူတွေအကြား ကောင်းမွန်တဲ့ ဆက်ဆံရေးတခုကို တည်ဆောက်တာပဲ ဖြစ်ပါတယ်။
ဒီတော့ စီးပွားရေးလုပ်ငန်းခေါင်းဆောင်တယောက်ဟာ ရှယ်ယာပိုင်ဆိုင်သူတွေ၊ ဒါရိုက်တာ ဘုတ်အဖွဲ့တွေနဲ့ပဲ ယုံကြည်မှုဆက်ဆံရေးတည်ဆောက်ရုံနဲ့ ပြီးမလားလို့ မေးစရာရှိပါတယ်။ မပြီးသေးပါဘူး။ အကျိုးတူပူးပေါင်းထားတဲ့ လုပ်ငန်းတွေနဲ့ ဆက်ဆံရေး၊ ပြိုင်ဘက်တွေနဲ့ ဆက်ဆံရေး၊ ဖောက်သည်တွေနဲ့ လုပ်ငန်းအကြား ဆက်ဆံရေး၊ suppliers တွေနဲ့ ဆက်ဆံရေးတွေလဲ ရှိပါသေးတယ်။ ဒါတွေအားလုံးထက် ပိုပြီး အရေးကြီးတဲ့ ဆက်ဆံရေးတခုကတော့ မိမိလုပ်ငန်းထဲက ၀န်ထမ်းတွေနဲ့ ဆက်ဆံရေးပါပဲ။ ပြင်ပလုပ်ငန်းဆောင်တာမှာ သိပ်အလုပ်များသူတွေဟာ ကိုယ်ဦးဆောင်နေတဲ့ လုပ်ငန်းတခုရဲ့ ယန္တရားကို လည်ပတ်နေသူတွေကို မေ့တတ်ကြပါတယ်။ တချို့ကလဲ လက်ထောက်ဒါရိုက်တာတွေ၊ မန်နေဂျာတွေကို ယုံကြည်မှုအရှိလွန်ပြီး လူရင်းတွေအနေနဲ့ လွှတ်ထားလိုက်တာ၊ တချို့ကကျတော့လဲ အလုပ်များလွန်းလို့ ဂရုမစိုက်ဖြစ်တာတွေ ဖြစ်ပါတယ်။ ဒီအခါမှာ ကွက်လပ်တွေ ထွက်လာပါတယ်။ လူတွေရဲ့ စိတ်မှာ အလုပ်နဲ့ ပတ်သက်ပြီး ဖောက်လွဲမှုနှစ်မျိုးရှိတတ်ပါတယ်။ တခုက အလုပ်ကို ကြိုးကြိုးစားစားနဲ့ သစ္စာရှိရှိလုပ်ပေမယ့် အသိအမှတ်ပြုခံလိုတာနဲ့ နောက်တခုကကျတော့ အကြောင်း၊ အကျိုး တိုက်ဆိုင်မှုအခြေအနေတခုမှာ သစ္စာဖောက်တာ ဖြစ်ပါတယ်။ ဘယ်လိုပဲဖြစ်ဖြစ် ဒီကဏ္ဍမှာ ခေါင်းဆောင်ရဲ့ စည်းရုံးရေးကွက်လပ်ဖြစ်နေရင် အလုပ်ခွင်ရဲ့ motivation ကတော့ ကျစမြဲပါပဲ။
အခုပေးထားတဲ့ ဥပမာက လုပ်ခ၊ လစာ အပေါ်တည်မှီမှု ပါဝင်နေတဲ့ စီးပွားရေးလုပ်ငန်းတွေမှာ ဖြစ်တတ်တာလေးတွေပါ။ ဒီလိုလုပ်ငန်းတွေမှာတောင် ဒီအခြေအနေတွေ ဖြစ်တတ်သေးတယ်ဆိုရင် နိုင်ငံရေးအဖွဲ့အစည်း တွေမှာကတော့ ဒီထက် ပိုကြီးမားတဲ့ ခေါင်းဆောင်မှုကွက်လပ်တွေဖြစ်လာ တတ်တယ်လို့ ဆိုရပါမယ်။ နိုင်ငံရေးအဖွဲ့အစည်းဆိုတာမှာ အစိုးရအဖွဲ့၊ ပါတီ၊ တခြားအဖွဲ့အစည်း အသွင်အမျိုးမျိုး ရှိပါတယ်။ အစိုးရအဖွဲ့ခေါင်းဆောင်တယောက် (၀န်ကြီးချုပ်၊ သမ္မတ) ဖြစ်သူဟာ သူ့ရဲ့ ကက်ဘိနက်နဲ့ ဆက်ဆံရေး၊ ပါတီတူ အမတ်တွေနဲ့ ဆက်ဆံရေး၊ အတိုက်အခံပါတီ အမတ်တွေနဲ့ ဆက်ဆံရေး၊ နိုင်ငံခြားဆက်ဆံရေး၊ ပြည်သူလူထုနဲ့ ဆက်ဆံရေး၊ think-tank တွေနဲ့ ဆက်ဆံရေးဆိုပြီး ဆက်ဆံရေးအမျိုးအစားများစွာ ရှိပါလိမ့်မယ်။ ဒီဆက်ဆံရေးတွေမှာ စနစ်တကျဖြစ်ဖို့ အလွန်ပဲ အရေးကြီးပါတယ်။ ပြည်သူလူထုနဲ့ ဆက်ဆံရေး၊ နိုင်ငံခြားဆက်ဆံရေးတွေ ကောင်းမွန်နေပေမယ့် ကိုယ့်ပါတီ၊ ကိုယ့်အဖွဲ့နဲ့ ဆက်ဆံရေးမှာ သတိမမူမိတာလေးတွေကြောင့် ပါတီရဲ့ motivation ကျသွားတာတွေလဲ အများကြီးပဲရှိခဲ့တယ်။ အစိုးရအဖွဲ့မဟုတ်ပဲ နိုင်ငံရေးပါတီတွေမှာလဲ ဒီအတိုင်းပါပဲ။ ဘက်ပေါင်းစုံ ဆက်ဆံရေး မတည်ဆောက်နိုင်တဲ့ ခေါင်းဆောင်တွေရဲ့ ကွက်လပ်တွေကြောင့် ပြိုလဲချိနဲ့သွားတဲ့ ပါတီတွေအများကြီးပဲ။ ဒါက တကမ္ဘာလုံးမှာ ဖြစ်ပျက်နေတာတွေ ဖြစ်ပါတယ်။
မြန်မာပြည်အနေနဲ့ဆိုရင်လဲ ဒီခေါင်းဆောင်မှုကွက်လပ်တွေကို အများအပြားတွေ့မြင်နေရတယ်။ အာဏာရှင်က နိုင်ငံတနိုင်လုံးရဲ့ အုပ်ချုပ်ခွင့်အာဏာနဲ့ စီးပွားရေးအကျိုးအမြတ်ခံစားရယူခွင့်အာဏာတွေကို ရယူထားတာဖြစ်တယ်။ ဒီအတွက် သူ့ဘက်မှာ အာဏာရှင်ဒေါက်တိုင်တွေ အများအပြား တည်ဆောက်ယူထားတယ်။ စစ်တပ်ကို အမိန့်နာခံမှုနဲ့ ထိန်းချုပ်ထားတယ်။ ကြံ့ဖွတ်၊ စွမ်းအားရှင်၊ အရံမီးသတ်တွေကို စီးပွားရေး မက်လုံးနဲ့ မျှားခေါ်ထားတယ်။ နေ့စားပေးပြီး ရမ်းကားခိုင်းလို့ရမယ့် လူမိုက်တွေမွေးထားတယ်။ ရပ်ကွက်ထဲအထိ အာဏာရှင်စနစ်ရောက်အောင် လုပ်ထားတယ်။ ဒါက ပကတိ အခြေအနေမှန်တရပ်ဖြစ်တယ်။ တပြိုင်နက်တည်းမှာပဲ အဖိနှိပ်ခံ ပြည်သူလူထုကနေ တော်လှန်ရေး သမားတွေ ထွက်လာတယ်။ နိုင်ငံရေးအဖွဲ့အစည်းတွေ အများအပြား ထွက်လာတယ်။ ထင်ပေါ်ကျော်ကြားတဲ့ ခေါင်းဆောင်တွေ ထွက်လာတယ်။ ဘယ်ကဘယ်လို အယူအဆတွေနဲ့ အခြေခံမှန်း မသိတဲ့ “တော်လှန်ရေးကြီးအဓွန့်ရှည်ပါစေ“ ဆိုတဲ့ ကြွေးကြော်သံတွေကလဲ ထွက်လာသေးတယ်။ စနစ်တခုကို တော်လှန်တဲ့ တော်လှန်ရေးတိုင်းရဲ့ နောက်ကွယ်မှာ စနစ်သစ်တခု တည်ဆောက်ရေးဆိုတာ ဒွန်တွဲပါနေတာ။ တော်လှန်ရေးကပဲ အဓွန့်ရှည်နေလို့ ဘယ်အချိန်မှာ စနစ်သစ်ကို တည်ဆောက်ကြမှာလဲ လို့ မေးစရာပဲ။
ဒီတော်လှန်ရေးမှာ ရေချိန်အတက်အကျတွေ ဖြစ်တယ်။ အပြောင်းအလဲတွေဖြစ်တယ်။ မပြောင်းလဲတာ နည်းနည်းပဲရှိတယ်။ လုပ်နည်းလုပ်ဟန်တွေ၊ အဖွဲ့အစည်းအပြိုင်အဆိုင်စိတ်တွေ၊ ပုဂ္ဂိုလ်ရေးရှေ့ တန်းတင်တာတွေ၊ ပြီးတော့ ခေါင်းဆောင်မှုကွက်လပ်တွေ။ ဒါတွေမှာတော့ နှစ်ပေါင်းများစွာ ကြာပေမယ့် ပြောင်းလဲခြင်းမရှိဘူး။ လုပ်နည်းလုပ်ဟန်ပြောင်းလဲမှုဆိုတဲ့အခါ ရပ်တည်ချက်၊ ရည်မှန်းချက် ပြောင်းလဲမှုတွေနဲ့ ရောနှောပြောတတ်ကြပြန်တယ်။ လုပ်နည်းလုပ်ဟန်နဲ့ ရည်မှန်းချက်ဆိုတာက မတူညီဘူး။ ဆယ်တန်းကိုသုံးခါကျနေတဲ့ ကျောင်းသားတယောက်က အရင်တုန်းက စာဖတ်တဲ့ပုံစံ၊ စာမေးပွဲအတွက် ပြင်ဆင်တဲ့ ပုံစံတွေကို ပြောင်းလဲတာဟာ ဆယ်တန်းအောင်ရမယ်ဆိုတဲ့ ရည်မှန်းချက် ပြောင်းလဲတာ မဟုတ်ဘူး။ တခါ ဖြတ်သန်းမှုဆိုတာကို ရှေ့တန်းတင်တာတွေလဲ ရှိတယ်။ အတွေ့အကြုံဆိုတာ ဆရာတဆူပဲ။ ဒါဟာအမှန်တရားပဲ။ ဒါပေမယ့် အတွေ့အကြုံနဲ့ အသိဥာဏ်ကို ပေါင်းစပ်ပြီး မှ ဆရာတင်ရတဲ့ အခါတွေလဲရှိတယ်။ အသိဥာဏ်ကိုပဲ ဆရာတင်ရတဲ့ အခါတွေလဲ ရှိတယ်။ အတွေ့အကြုံ၊ အသိဥာဏ်၊ စဉ်းစားတွေးခေါ်မှု၊ လက်ရှိအခြေအနေနဲ့ လိုက်လျောညီထွေရှိမှုစတာတွေ ပေါင်းစပ်မိဖို့ အရေးကြီးဆုံးပဲ။ ဆယ်တန်းသုံးခါကျ ကျောင်းသားက ဆယ်တန်းတက်စကျောင်းသားကို စာဘယ်လိုကျက်လို့ သွားပြောခဲ့ရင် အသိဥာဏ်ရှိတဲ့ ဘယ်ကျောင်းသားမျိုးက လက်ခံမှာတဲ့လဲ။ ဒီမိုကရေစီတော်လှန်ရေးမှာ ကိုယ်က တိုင်မင်ခေါ်တဲ့အချိန် လူထုမလိုက်လာလို့ မဆီမဆိုင် လူထုကြီးကြောက်နေပြီလို့ မှတ်ချက်ပေးတတ်တဲ့ ခေါင်းဆောင်တွေ ဒီအချက်ကို သတိပြန်ပြုဖို့ လိုလိမ့်မယ်။ လူထုနဲ့ ပတ်သက်တဲ့ မှတ်ချက်မပေးခင် လူထုကြီးနဲ့ ကိုယ်နဲ့ ဘယ်လောက်အထိ ဆက်ဆံရေးရှိနေလဲ။ အပြန်အလှန် ယုံကြည်မှုဘယ်လောက်အထိ တည်ဆောက်ပြီးပြီလဲ။ ကိုယ့်အပေါ်ရှိခဲ့ဖူးတဲ့ လူထုသဘောထားဟာ လက်ရှိအခြေအနေမှာအထိ ရှိသေးလား ဆိုတာတွေ အရင်သုံးသပ်ဖို့ လိုလိမ့်မယ်။
အဓိကကတော့ ခေါင်းဆောင်တွေဟာ ဆက်ဆံရေးကွက်လပ်တွေကို စနစ်တကျပြန်ဖြည့်ဆည်းဖို့ လိုအပ်တယ်။ ဘာကြောင့်လဲဆိုတော့ တော်လှန်ရေးမအောင်မြင်သေးတဲ့ အကြောင်းရင်းတွေထဲမှာ ဒီအချက် ပါဝင်နေလို့ပါ။ ဘယ်လိုကွက်လပ်တွေရှိနေသလဲ။
(၁) ခေါင်းဆောင်နှင့်အဖွဲ့အစည်းကြားက ဆက်ဆံရေးကွက်လပ်
ဒီကွက်လပ်မှာ လစ်ဟာရင် အဖွဲ့အစည်းအကွဲအပြဲတွေ၊ အမည်ခံပြီး အလုပ်မလုပ်တဲ့ အဖွဲ့ဝင်တွေ၊ စိတ်ပျက်ဘေးထွက်ထိုင်သူတွေ များလာတတ်တယ်။ ကမ္ဘာအရပ်ရပ်က အင်အားကြီးမားတဲ့ အဖွဲ့အစည်းကြီးတွေမှာ ဗဟိုအလုပ်မှုဆောင်ကော်မတီဝင်အစည်းအဝေးကို အနည်းဆုံး တလတခါ၊ ဒေသဆိုင်ရာကော်မတီဝင်တွေနဲ့ အစည်းအဝေးတွေကို အနည်းဆုံးလေးလတခါ၊ နှစ်ပတ်လည်ညီလာခံ စတာမျိုးတွေ လုပ်နေတာ အချိန်တွေ၊ ငွေတွေကို အားအားယားယား သုံးနေကြတာ မဟုတ်ဘူး။ ဒီဆက်ဆံရေး ကွက်လပ်တွေကို ဖြည့်ဆည်းနေတာ ဖြစ်တယ်။ ဥက္ကဌတွေ၊ အတွင်းရေးမှူးတွေကလဲ သူတို့လုပ်ချင်တာ လုပ်နေလို့ မရဘူး။ ဗဟိုကော်မတီကို တင်ပြကြရတယ်။ အစည်းအဝေး ဆုံးဖြတ်ချက်တွေကို လေးစားလိုက်နာကြရတယ်။ အဖွဲ့တွင်းဆက်ဆံရေးကို စနစ်တကျ တည်ဆောက်ကြရတယ်။ အတွေးအခေါ်၊ အယူအဆ မကြေလည်မှုတွေကို အပြန်အလှန်လေးစားမှုပေါ် အခြေတည်ပြီး ဆွေးနွေးကြရတယ်။ မပြေလည်မှုတွေမှာလဲ အများဆန္ဒနဲ့အညီ မဲခွဲဆုံးဖြတ်မှု လုပ်ကြရတယ်။ ဒီလိုလုပ်တာမှာလဲ မဲရှုံးတဲ့သူတွေက မဲနှိုင်သူတွေကို ရန်ညှိုးမထားရဘူး။
ခေါင်းဆောင်ဟာ ကိုယ့်အဖွဲ့ထဲမှာ ဘာတွေဖြစ်နေသလဲ၊ ပြင်ပက ဘာတွေ ဝေဖန်နေသလဲ စတာတွေ မျက်စိ၊ နားစွင့်ထားရတယ်။ အစုအဖွဲ့လေးတွေဆီက အစီရင်ခံစာတွေကို သုံးသပ်ရတယ်။ ဆုံးဖြတ်ချက်ပေးသင့်တာတွေကို ဆုံးဖြတ်ချက်ပေးရတယ်။ အဖွဲ့ဝင်တွေရဲ့အလားအလာ၊ အရည်အသွေး တွေကို အကဲဖြတ်ရတယ်။ ထိရောက်တဲ့ လုပ်ဆောင်ချက်တွေကို အသိအမှတ်ပြုရတယ်။ အဖွဲ့အစည်းတွေအတွင်းမှာ ရှိရမယ့် ခေါင်းဆောင်နဲ့ ဗဟိုကော်မတီဝင်တွေအကြား၊ ဗဟိုနဲ့ အဖွဲ့ဝင်တွေအကြား ဆက်ဆံရေးတွေမှာ ကွင်းဆက်ပြတ်လာတဲ့အခါ ဂိုဏ်းခွဲထောင်တာတွေ၊ မလုပ်မရှုပ် ထိုင်နေကြတာတွေ၊ ဗဟိုအစည်းအဝေးကို ကော်မတီဝင်တွေက အလေးမထားတွေ၊ ပွင့်လင်းတဲ့ ဆက်ဆံရေး ပျက်ပြယ်ပြီး ရှေ့မှာ ခေါင်းညိတ်၊ နောက်မှာ လုပ်ချင်ရာလုပ်၊ အတင်းတုပ်၊ အပုပ်ချ တာတွေ ဖြစ်လာတော့တာပဲ။ ပိုဆိုးရင်တော့ ကိုယ့်လူသူ့လူတွေမွေးပြီး အဖွဲ့အစည်းတွေ နှစ်ခြမ်း၊ သုံးခြမ်းတွေကွဲကြ၊ တဖွဲ့နဲ့တဖွဲ့ ပြိုင်ကြတာတွေ ဖြစ်ကုန်ပါလေရော။ အဖွဲ့ဝင်တွေမှာလဲ ဘယ်ခေါင်းဆောင်နောက် လိုက်လို့လိုက်ရမသိပဲ အကွဲကွဲ၊ အပြဲပြဲနဲ့ နောက်ဆုံး အဖွဲ့လဲ အစိတ်စိတ်ဖြစ်ပြီး ချိနဲ့သွားတာပဲ။ ဒါက ခေါင်းဆောင်နဲ့ အဖွဲ့ကြား ဆက်ဆံရေးကွက်လပ်ကြောင့် ဖြစ်လေ့ရှိတာတွေပါ။
နောက်တချက်က ခေါင်းဆောင်နဲ့အဖွဲ့ကြားမှာ ဆက်ဆံရေးကွက်လပ်ကြီးရင် ဘေးက သပ်လျှိုဝင်လို့ လွယ်ပါတယ်။ ဆက်ဆံရေးကွက်လပ်ကြောင့် ခေါင်းဆောင်နဲ့အဖွဲ့ဝင်ကြားမှာ နားလည်မှုလွဲစေနိုင်တာတွေ အများကြီးရှိပါတယ်။ ဒါတွေကို ပြိုင်ဘက်အဖွဲ့ကဖြစ်စေ၊ ရန်သူကဖြစ်စေ အသုံးချသွားတတ်တာမျိုးတွေ ရှိနိုင်ပါတယ်။ ပြင်ပမှာ မဟာမိတ်ဆက်ဆံရေးတာဝန်တွေ၊ လူထုဆက်ဆံရေးတာဝန်တွေ သိပ်များတဲ့ ခေါင်းဆောင်တွေနဲ့ အဖွဲ့ဝင်တွေအကြားမှာ ဒီဆက်ဆံရေးကွက်လပ်တွေ ပိုကြီးတတ်ပါတယ်။ စနစ်တကျနဲ့ မျှမျှတတ ပြန်ချိန်ညှိယူဖို့လိုအပ်ပါတယ်။ မိသားစုမှာတောင် ဖခင်ဖြစ်စေ၊ မိခင်ဖြစ်စေ ဦးဆောင်နေသူတယောက်ဟာ ပြင်ပအလုပ်တာဝန်တွေများပြီး၊ ပြင်ပမှာပဲ အချိန်တွေ ပေးနေရလဲ အချိန်ကြာလာတဲ့အခါ မိသားစုထဲမှာ ဖရိုဖရဲဖြစ်တာလေးတွေ ရှိပါတယ်။ အဖွဲ့အစည်းတွေမှာလဲ အဲဒီအတိုင်းပါပဲ။ ခေါင်းဆောင်တွေဟာ ဒီကွက်လပ်ကို ဖြည့်နိုင်ဖို့ ကြိုးစားကြရမှာဖြစ်ပါတယ်။
(၂) ခေါင်းဆောင်နှင့် မဟာမိတ်ဆက်ဆံရေးကွက်လပ်
ထင်ပေါ်ကျော်ကြားတဲ့ ခေါင်းဆောင်တွေဟာ မဟာမိတ်အဖွဲ့အစည်းတွေအကြားမှာလဲ ရေပန်းစားပါတယ်။ ဒါကို အသုံးပြုပြီး မဟာမိတ်ဆက်ဆံရေးကို စနစ်တကျ ထူထောင်ရမှာ ဖြစ်ပါတယ်။ မဟာမိတ်ဆက်ဆံရေးဆိုတာ အဖွဲ့တွေပေါင်းပြီး တပ်ပေါင်းစုတွေဖွဲ့လိုက်၊ နားလည်မှုစာချွန်လွှာတွေ လက်မှတ်ထိုးလိုက်၊ ဟိုကနေဒီ ကူးလူးသွားလာလိုက် လုပ်နေတာနဲ့တင် ပြီးတာ မဟုတ်ပါဘူး။ တဖွဲ့နဲ့ တဖွဲ့ ကိုယ်ပိုင်အကျိုးစီးပွားတွေကို မထိခိုက်သရွေ့ အပြန်အလှန်နားလည်မှုနဲ့ တဖွဲ့ရဲ့ လုပ်ဆောင်ချက်ကို တဖွဲ့က ပူးပေါင်းဆောင်ရွက်တာ၊ လိုအပ်တဲ့အကူအညီတွေ အပြန်အလှန်ပေးတာ၊ တူညီတဲ့ လုပ်ငန်းဆောင်တာတွေကို အတူတကွ ပူးပေါင်းဆောင်ရွက်တာတွေ ဖြစ်ပါတယ်။ ဒီနေရာမှာ အဖွဲ့အစည်းတွေအကြား မဟာမိတ်ဆက်ဆံရေးတည်ဆောက်မှုကို ဧည့်သည်အနေနဲ့ တခြား ခေါင်းဆောင်ရဲ့ အဖွဲ့ဝင်တွေနဲ့ သွားရောက်တွေ့ဆုံမှုတွေနဲ့ မကွဲမပြား ဖြစ်တတ်တာတွေ ရှိပါတယ်။
နာမည်ရှိနေတဲ့ ခေါင်းဆောင်ကို တခြားအဖွဲ့အစည်း ခေါင်းဆောင်တွေက ဖိတ်ခေါ်ချက်တွေရှိပါတယ်။ ဒါတွေဟာ မဟာမိတ်ဆက်ဆံရေးရဲ့ ကနဦးမို့ ဖိတ်ကြားချက်ကို လက်ခံရပါမယ်။ ဒီလိုနဲ့ သွားတွေ့တဲ့အခါ အဲဒီခေါင်းဆောင်တွေရဲ့ အဖွဲ့အစည်းတွေက အဖွဲ့ဝင်တွေနဲ့ တွေ့ပါတယ်။ အိမ်ရှင်တွေက ဧည့်သည်ကို ဧည့်ဝတ်ကျေတာဟာ သဘာဝပါပဲ။ ဒါကို လွန်ကဲစွာ မသာယာမိဖို့ အထူးလိုအပ်ပါတယ်။ အဲဒီအခြေအနေကိုကြည့်ပြီး ကိုယ့်ကိုတော့ ထောက်ခံနေသူတွေများလှချည်ရဲ့လို့ ထင်သွားရင် ပြဿနာစတက် ပါတော့တယ်။ တပ်ပေါင်းစု မဟုတ်ပဲ ဘယ်ခေါင်းဆောင်ကမှ ကိုယ့်အဖွဲ့ဝင်တွေကို ဦးဆောင်ပါတော့လို့ဆိုပြီး ထိုးအပ်မှာ မဟုတ်ပါ။ တပ်ပေါင်းစုအဆင့်ရောက်ဖို့ဆိုတာကလဲ အဆင့်ဆင့်အများကြီး လိုအပ်သေးတာပါ။ ဒီအချက်ကို မမြင်ပဲ သူတပါးအဖွဲ့က လူတွေကို ကိုယ့်လူတွေလို့ မြင်မိရင် ရှော့ခ်ဖြစ်တတ်ပါတယ်။ အဖွဲ့တခုနဲ့ တခုအကြား မဟာမိတ်ဆက်ဆံရေး ထူထောင်နိုင်မှု ခြေလှမ်းအထိ မတက်လှမ်းနိုင်ပဲ ကိုယ်နဲ့ တခြားအဖွဲ့ကြားက ဆက်ဆံရေးပဲ ဖြစ်သွားပါတယ်။ တကယ်တမ်း ဒီလူတွေက ကိုယ့်အင်အားစုတွေဖြစ်လာလားဆိုတော့လဲ မဖြစ်လာပါ။ မဟာမိတ်လဲမဖြစ်၊ တပ်ပေါင်းစုလဲ ဖြစ်မလာနဲ့ synergy လဲ မတက်ပဲ ဟိုသွား၊ ဒီသွား ရုပ်ပြပဲ ဖြစ်နေပါတော့တယ်။ ဒီရုပ်ပြအပေါ်မှာ အချိန်ပေးတာတွေ သိပ်များလာတဲ့အခါကျတော့ ကိုယ့်အဖွဲ့နဲ့ကွင်းဆက်ပြတ်မှုကလဲ ပိုများလာပါတယ်။ နောက်ပြန်လှည့်ကြည့်တော့ ဘယ်သူမှ မရှိတော့တာလဲ ဖြစ်တတ်ပါတယ်။ ရုပ်ပြမဟုတ်ပဲ မဟာမိတ်ဆက်ဆံရေးထူထောင်ဖို့၊ အဲဒီကနေမှ တပ်ပေါင်းစုအဆင့်တွေအထိ တက်လှမ်းဖို့ ကြိုးစားသင့်ကြပါတယ်။
အဖွဲ့အစည်းတခုတည်းတင်မကပဲ လှုပ်ရှားမှုတခုရဲ့ နိုင်ငံခြားဆက်ဆံရေးမှာလဲ ဒီအတိုင်းပါပဲ။ နိုင်ငံတကာကင်ပိန်းဆိုပြီး နိုင်ငံတကာအဖွဲ့အစည်းတွေရဲ့ ထောက်ခံမှု၊ ဧည့်ဝတ်ကျေမှုတွေနောက် တကောက်ကောက်လိုက် သာယာရင်း၊ ကိုယ့်လူမျိုးတွေနဲ့ ကွင်းဆက်တွေပြတ်၊ တည်ဆောက်မှုနဲ့ ဆက်ဆံရေး ကွက်လပ်တွေကြီးလာရာက နိုင်ငံခြားဆက်ဆံရေး အခြေအနေပြောင်းသွားလို့ နောက်လှည့်ကြည့်လိုက်တော့ ကျောပဲရှိတဲ့ လှုပ်ရှားမှုတွေလဲ ရှိတတ်ပါတယ်။ ဒါတွေကို အထူးဂရုစိုက်ဖို့ လိုပါတယ်။ ကိုယ်ဘာလဲ၊ ဘာလုပ်မှာလဲ ဆိုတာ သိဖို့က အရေးကြီးဆုံးပါ။
(၃) ခေါင်းဆောင်နဲ့ လူထုဆက်ဆံရေးကွက်လပ်
လူထုစည်းရုံးရေးခရီးစဉ်နဲ့ မဟာမိတ်တည်ဆောက်ရေး ခရီးစဉ်တွေကို တချို့က ကွဲကွဲပြားပြား မမြင်ပါဘူး။ မဟာမိတ်အဖွဲ့တွေနဲ့သွားတွေ့တာ၊ ဒီမိုကရေစီအင်အားစုတွေနဲ့ တွေ့တာဟာ လူထုစည်းရုံးရေးခရီးစဉ်လို့ မခေါ်ဆိုနိုင်ပါဘူး။ မြန်မာလူထုဟာ စစ်အာဏာရှင်စနစ်ကို ရွံ့မုန်းပါတယ်။ ဒါပေမယ့် စစ်အာဏာရှင်ကို မကျေနပ်တာနဲ့ပဲ တော်လှန်ရေးအင်အားစုဖြစ်နေပြီလို့ တွက်ဆလို့မရပါဘူး။ တော်လှန်ရေးကို ထောက်ခံသူတွေဖြစ်နေပြီလို့ သတ်မှတ်လို့မရပါဘူး။ လူထုအကြားမှာ တော်လှန်ရေးအတွေးအခေါ်၊ တော်လှန်ရေးစိတ်ဓာတ်တွေ ရှင်သန်နိုးကြားလာအောင် တည်ဆောက်ယူရပါတယ်။ တော်လှန်ရေး တိုက်ပွဲပြင်းထန်နေချိန်မှာ figure တွေ ထွက်ကိုထွက်လာရမယ်၊ ပေါ်ထွက်လာတဲ့ ခေါင်းဆောင်တွေကို စင်တင်ပေးရမယ် ဆိုတာတွေက အမှန်တွေပါပဲ။ ဒါပေမယ့် figure သုံးပြီး၊ တော်လှန်ရေးလှုပ်ရှားမှုစတော့လို့ လူထုကို တိုင်မင်ပေးလို့တော့ ဘယ်တော့မှ ရမှာ မဟုတ်ပါ။ လူထုထဲမှာ တည်ဆောက်ထားတာ မဟုတ်ပဲ တိုင်မင်ခေါ်တဲ့ တော်လှန်ရေး လှုပ်ရှားမှု ဘယ်တော့မှ အချိန်ကြာကြာ တောင့်မခံနိုင်ပါ။ တည်ဆောက်မှုဟာ အလွန်ပဲ အရေးကြီးပါတယ်။
အခုမြန်မာ့နိုင်ငံရေးလှုပ်ရှားမှုမှာကတော့ နှစ်နေရာမှာ တည်ဆောက်မှုလိုပါတယ်။ ပြည်တွင်းနဲ့ ပြည်ပပါ။ ပြည်ပမှာ မြန်မာတွေ သန်းနဲ့ချီရှိနေပါတယ်။ သူတို့တွေဟာ နေ့စဉ်နဲ့အမျှ ပြည်တွင်းနဲ့ အသွင်အမျိုးမျိုးနဲ့ ဆက်ဆံနေသူတွေပါ။ နှစ်စဉ် သွားလိုက်ပြန်လိုက် လုပ်နေတဲ့ ကျောင်းသားတွေ၊ ပြည်တွင်းနဲ့ ပြည်ပ လှည့်နေတဲ့ အလုပ်သမားလူတန်းစားတွေ သိန်းသန်းနဲ့ချီပြီး ရှိနေတာပါ။ မြန်မာတထောင်မှာ လုပ်ငန်းရှင် တယောက်ပဲရှိပါတယ်။ အားလုံးဟာ ပြည်တွင်းအခြေအနေအရ ပြည်ပနိုင်ငံမှာ အလုပ်လုပ်နေကြရတဲ့ အလုပ်သမားတွေပါ။ ပြည်တွင်းတည်ဆောက်မှုမှာ အခက်အခဲအမျိုးမျိုး ရှိတယ်ထား၊ ပြည်ပမှာကော လူထုထဲမှာ ဘယ်လောက်အထိ တည်ဆောက်ထားသလဲ။ တော်လှန်ရေးအဖွဲ့အစည်းတွေမှာ လူဟောင်းတွေနဲ့လည်နေသလား၊ လူသစ်တွေ ပါလာသလား။ အနည်းဆုံးအဖွဲ့ဝင်မဟုတ်ရင်တောင် ဒေသဆိုင်ရာ မြန်မာ့ဒီမိုကရေစီအင်အားစုတွေအပေါ်မှာကော သူတို့တွေက ထောက်ခံကြသလား။ ဘယ်လို ထင်မြင်ချက်ရှိကြသလဲ။ စည်းရုံးရေးခရီးစဉ်အမည်တပ်ပြီး ခရီးထွက်နေကြတဲ့ ခေါင်းဆောင်တွေကကော နဂိုရှိပြီးသားလူတွေနဲ့ပဲ တွေ့လိုက်ဆုံလိုက်၊ အစည်းအဝေးကျင်းပလိုက်၊ ငြင်းလိုက်ခုန်လိုက်တွေ လုပ်နေကြသလား (သို့မဟုတ်) သက်ဆိုင်ရာနယ်မြေက ကျောင်းသားခေါင်းဆောင်တွေ၊ လူ့အဖွဲ့ အစည်းခေါင်းဆောင်တွေ၊ ဘာသာရေးခေါင်းဆောင်တွေ၊ လူအများကို သြဇာလွှမ်းမိုးသူတွေနဲ့ တွေ့ဆုံဖို့ကိုကော ကြိုးပမ်းမှုတွေ ရှိသလား ဆိုတာတွေက ပြည်ပလူထုနဲ့ တော်လှန်ရေးအကြားက၊ ခေါင်းဆောင်တွေအကြားက ကွက်လပ်ကြီးငယ်ပမာဏကို ပြသနိုင်ပါတယ်။
ဒီနေရာမှာ လူတွေက ကြောက်နေလို့၊ မဆက်သွယ်ရဲကြဘူးလို့ ဆိုတတ်ကြပါတယ်။ လူတွေဟာ အကြောက်တရားကို အရေးပေါ်အချိန်တွေနဲ့ ခံပြင်းမှုတွေဖြစ်လာချိန်တွေမှာ ကျော်လွှား တတ်လေ့ရှိကြပါတယ်။ အမြင့်ကြောက်သူကလဲ မီးလောင်ချိန်မှာ ထွက်ပေါက်မရှိရင် ခုန်ချတာပဲ။ ကျောင်းစာမေးပွဲကြောက်သူတွေကလဲ အလုပ်ခွင်စာမေးပွဲကို ဖြေကြရတာပဲ။ ဒီလိုပဲ လူတွေဟာ ယုံကြည်ချက်၊ ရပ်တည်ချက်နဲ့ ခေါင်းဆောင်တွေအပေါ် လေးစားမှုပေါ်မှာ မူုတည်ပြီးတော့လဲ အကြောက်တရားကို ဖယ်ရှားပြီး စွန့်စားလေ့ရှိကြတယ်။ ပြည်ပမှာ ရပ်ကွက်ထဲအထိ အာဏာရှင်စနစ်ရောက်နေတာ မဟုတ်ပါဘူး။ ဆန္ဒမှန်နဲ့ တော်လှန်ရေးအပေါ် ယုံကြည်ချက် ထွက်ပေါ်လာရင် ကျော်လွှားရတဲ့ အကာအရံတွေ သိပ်မများလှပါဘူး။ ဒီတော့ လူတွေကို ကြောက်တယ်ဆိုမယ့်အစား ဒီလူတွေရဲ့ ယုံကြည်မှုနဲ့ လေးစားမှုရအောင်ကော ကိုယ့်ဘက်က ဘယ်လောက်ပြင်ဆင်ထားခဲ့သလဲ၊ လူထုအတွင်းမှာ တော်လှန်ရေးအတွေးအခေါ်တွေ နိုးကြားလာအောင် ဘာတွေ လုပ်ပြီးပြီလဲဆိုတာ ခေါင်းဆောင်တွေ ကိုယ့်ဘာသာကို ပြန်သုံးသပ်ဖို့ လိုပါလိမ့်မယ်။
ပြည်တွင်းလူထုဆက်ဆံရေးအပိုင်းကတော့ ပြည်ပခေါင်းဆောင်နဲ့ ပြည်တွင်းလူထု၊ ပြည်တွင်း ခေါင်းဆောင်တွေနဲ့ ပြည်တွင်းလူထုအကြား ဆက်ဆံရေး တည်ဆောက်မှုတွေ ဖြစ်ပါတယ်။ ပြည်ပခေါင်းဆောင်နဲ့ ပြည်တွင်းလူထုအကြား ဆက်ဆံရေးကတော့ မီဒီယာကို အသုံးပြုပြီး တည်ဆောက်တာ များပါတယ်။ ဒီနေရာမှာ လူထုကို မဖြစ်နိုင်တဲ့ မျှော်လင့်ချက်တွေ မပေးမိဖို့ လိုအပ်ပါတယ်။ မိမိတို့ရဲ့ ယူဂျီများကနေ ရတဲ့ လူထုကြီးရဲ့ အခြေအနေကို သုံးသပ်ချက် စာတမ်းတွေအပေါ် အခြေခံပြီးမှ ကိုက်ညီမယ့်၊ လိုက်လျောညီထွေရှိမယ့် သတင်းစကားကို ပေးနိုင်ဖို့လိုပါတယ်။ မဖြစ်နိုင်တာတွေကို ငါ့စကားနွားရသွားပြောမိရင် လူထုက ယုံကြည်မှုလျော့ပါးသွားပါတယ်။ ဒါဟာ အလွန်ကြီးမားတဲ့ တော်လှန်ရေးအန္တရာယ်ပါပဲ။ မဖြစ်နိုင်တဲ့ မျှော်လင့်ချက်ကို သူတပါးကို သွားပေးတာဟာ အဆိပ်သင့်စေနိုင်ပါတယ်။ မရှိဆင်းရဲသူကို မဟုတ်ကဟုတ်ကတွေရေးထားတဲ့ သိုက်စာသွားပေးတာနဲ့ တူပါတယ်။ စားစရာ မရှိပါဘူးဆိုမှ၊ ရွှေဒင်္ဂါးရမယ်၊ ညသန်းခေါင် တောထဲသွားပြီး သိုက်သွားတူး လို့ ဆိုတာမျိုးလိုပါပဲ။ လူထုကို မကူညီရင်နေပါ။ မနှောင့်ယှက်သင့်ပါ။
ကမ္ဘာ့နိုင်ငံရေးအခြေအနေတွေကို ပြည်ပရောက်ပြီး မသိဘူးဆိုတာတွေက မဖြစ်နိုင်ပါ။ သံတမန် နည်းလမ်းတွေ မထိရောက်နိုင်ဘူးဆိုတာကလဲ စိတ်ဖောက်ပြန်နေတာမဟုတ်တဲ့ နိုင်ငံရေး သမားတိုင်း သိနိုင်ပါတယ်။ ဒါကို အမေရိကန်တပ်တွေပဲ ၀င်လာတော့မလိုလို၊ ကုလသမဂ္ဂက လုံခြုံရေးကောင်စီကြီးကပဲ မြန်မာပြည်ကြီးကို ကယ်တင်တော့မလိုလို၊ အိုင်စီစီကပဲ စစ်အုပ်စု ခေါင်းဆောင်တွေကို နေ့ချင်းညချင်း သေဒဏ်ပေးတော့မလို ပြောနေကြတာက မကောင်းပါ။ လူထုမှာလဲ မျှော်ရင်း၊ မျှော်ရင်းနဲ့ အချိန်တန်လို့ အော်သံတွေစဲသွားပြန်တော့ တော်လှန်ရေး မအောင်မြင်တာပဲ လူထုက ကြောက်နေလို့လိုလိုပြောရင်း နိဂုံးချုပ်သွားကြပြန်ပါတယ်။ မီဒီယာနဲ့ မဟုတ်ပဲ ယူဂျီ၊ ယူဂျီဆိုသူများကလဲ ယူဂျီအလုပ်ကို တကယ်လုပ်ပြီး တည်ဆောက်တဲ့ ယူဂျီအုပ်စုထားရှိဖို့ လိုပါတယ်။ သတင်းသမားယူဂျီနဲ့ တည်ဆောက်ရေးယူဂျီအသွင် သဏ္ဍာန်မတူပါ။ ကွဲကွဲပြားပြားရှိဖို့ လိုပါတယ်။ အချိန်မတန်ပဲ ကိုယ့်လူတွေ ပါမသွားအောင် အထူးဂရုစိုက်သင့်ပါတယ်။ ပြည်တွင်းခေါင်းဆောင်များနဲ့ လူထုအကြားဆက်ဆံရေးကတော့ တည်ဆောက်မှုအပိုင်း၊ ယုံကြည်လေးစားမှုအပိုင်းတွေအပြင် အခြေအနေအချိန်အခါနဲ့အညီ လျှို့ဝှက် ဆက်ဆံရေး အပိုင်းတွေ ပါတာမို့ အကျယ်မချဲ့လိုတော့ပါ။ လူထုရဲ့ အခြေအနေမှန်ကို မှန်မှန်ကန်ကန် အကဲဖြတ်နိုင်ဖို့ကသာ အရေးကြီးဆုံးဖြစ်ပါတယ်။
နိဂုံးချုပ်ဆိုရင် တော်လှန်ရေးတခုမှာ အဆုံးသတ်အောင်ပွဲတွေအတွက် ခေါင်းဆောင်တွေအဓိကကျပါတယ်။ ခေါင်းဆောင်ဆိုတာမှာ ရှိပြီးသားခေါင်းဆောင်တွေ ပါဝင်သလို၊ လှုပ်ရှားမှုမှာမှ ထွက်ပေါ်လာတဲ့ အရေးတော်ပုံ ခေါင်းဆောင်တွေလဲ ရှိပါတယ်။ အခုဆောင်းပါးကတော့ ရှိပြီးသား ခေါင်းဆောင်တွေအနေနဲ့ လိုအပ်နေတဲ့ ဆက်ဆံရေးကွက်လပ်တွေကို ဖြည့်ဆည်းဖို့ လိုအပ်လှပါကြောင်း လေးစားစွာ တိုက်တွန်းခြင်းသာ ဖြစ်ပါတယ်။
ခင်မမမျိုး (၂၃၊ ၁၀၊ ၂၀၀၉)
နိုင်ငံရေးပညာ၊ လေ့လာစရာ (အခန်း ၁၊ အပိုင်း ၃)
Wednesday, October 21, 2009
နိုင်ငံရေးဆိုတာ ပါဝါကျင့်သုံးမှုဖြစ်တယ်
နိုင်ငံရေးနဲ့ ပတ်သက်ပြီး အဓိပ္ပာယ်ဖွင့်ဆိုမှုတွေမှာ ပါဝါကျင့်သုံးမှုအနေနဲ့အဓိပ္ပာယ်ဖွင့်ဆိုချက်ဟာ အကျယ်ပြန့်ဆုံး အဓိပ္ပာယ်ဖွင့်ဆိုချက်ဖြစ်ပါတယ်။ ဒီအမြင်အရဆိုရင် နိုင်ငံရေးဆိုတာ လူမှုရေး လုပ်ငန်းဆောင်တာတွေအားလုံးနဲ့ ပတ်သက်တာကြောင့် လူသားတွေတည်ရှိမှုဖြစ်စဉ်ရဲ့ နေရာစုံ၊ ထောင့်ပေါင်းစုံမှာ နိုင်ငံရေးဆိုတာ တည်ရှိနေပါတယ်။ Adrian Leftwich ရေးသားတဲ့ နိုင်ငံရေးဆိုတာဘာလဲ ဆိုတဲ့စာအုပ်ထဲမှာ နိုင်ငံရေးဆိုတာ စုဝေးမှုအသွင်သဏ္ဍာန်ဆောင်တဲ့ လူမှုလှုပ်ရှားမှုအားလုံးရဲ့ အသည်းနှလုံးဖြစ်တယ်လို့ ဆိုထားပါတယ်။ ဒီရှုထောင့်ကကြည့်မယ်ဆိုရင် နိုင်ငံရေးဆိုတာ နိုင်ငံတကာအဆင့်၊ နိုင်ငံတော်အဆင့်တွေမှာတင်မကပဲ လူမှုရေးဆက်စပ်မှုရှိတဲ့ မိသားစုတွင်းမှာ၊ မိတ်ဆွေသူငယ်ချင်းအုပ်စုတွေအတွင်းမှာပါ ရှိတယ်လို့ ဆိုနိုင်ပါတယ်။ ဒီအခါမှာ နိုင်ငံရေးဆိုတာ လူမှုစနစ် ဖြစ်တည်မှုဖြစ်စဉ်ရဲ့ ထုတ်လုပ်မှု၊ ဖြန့်ဖြူးမှု၊ အရင်းအမြစ်အသုံးပြုမှုအားလုံးနဲ့ သက်ဆိုင်လာပါတယ်။ ဒါပေမယ့် အရင်းအမြစ်ဆိုတာက ရှားပါးပြီး၊ လူသားတွေရဲ့ လိုအပ်ချက်တွေ၊ ဆန္ဒတွေကကျတော့ အဆုံးအစ မရှိပါဘူး။ ဒါကြောင့်လဲ ရှားပါးတဲ့အရင်းအမြစ်တွေကို ရယူပိုင်ဆိုင်မှုတွေအတွက် ရုန်းကန်လှုပ်ရှားမှုတွေ ပေါ်ထွက်လာပါတယ်။ ဒီလိုရုန်းကန်လှုပ်ရှားမှုတွေမှာ အသုံးပြုတဲ့ နည်းလမ်းတွေဟာ ပါဝါ ကျင့်သုံးမှုတွေ ပါဝင်လာပါတယ်။
ဒီနေရာမှာ ပါဝါကျင့်သုံးမှုရဲ့ မျက်နှာစာသုံးခုကို ထည့်သွင်းစဉ်းစားဖို့ လိုလာပါတယ်။ မောင်ခခွေး က သူ့ဘာသာသူ ပြုလုပ်မှာမဟုတ်တဲ့ အလုပ်တစုံတရာကို မောင်ကကြီးက လုပ်စေနိုင်တယ်ဆိုရင် မောင်ကကြီးက မောင်ခခွေးအပေါ် ပါဝါကျင့်သုံးမှု ရှိတယ်လို့ဆိုနိုင်ပါတယ်။ ဒီတော့ မောင်ခခွေးအပေါ် မောင်ကကြီးက ဘယ်လိုသဏ္ဍာန်တွေနဲ့ လွှမ်းမိုးမှု လုပ်နိုင်မလဲ။ ပါဝါကျင့်သုံးမှုရဲ့ မျက်နှာစာသုံးခုဖြစ်တဲ့ ပါဝင်ကျင့်သုံးသူ လိုလားတဲ့ ဆုံးဖြတ်ချက်ချမှတ်စေခြင်း၊ အတွေးအခေါ်အရထိန်းချုပ်ခြင်း၊ agenda ချပေးခြင်း စတာတွေနဲ့ ပြုလုပ်နိုင်ပါတယ်။ ဆုံးဖြတ်ချက်ချမှတ်စေခြင်းဆိုတာက သူတပါးရဲ့ ဆုံးဖြတ်ချက်ချမှတ် လုပ်ကိုင်ဆောင်ရွက်မှုတွေထဲမှာ ကိုယ်လိုချင်တဲ့အကြောင်းအရာတွေ ပါဝင်လာအောင် လွှမ်းမိုး ချုပ်ကိုင်မှုဖြစ်ပါတယ်။ Three Faces of Power (1989) စာအုပ်ထဲမှာ စာရေးသူ Keith Boulding က နိုင်ငံတနိုင်ငံ (သို့) လူတဦးရဲ့ ဆုံးဖြတ်ချက်တွေကို တခြားနိုင်ငံတနိုင်ငံ၊ လူတဦးက လွှမ်းမိုးတဲ့အခါမှာ အင်အားအသုံးပြုခြင်း၊ သစ္စာစောင့်သိစေခြင်း၊ အပြန်အလှန်အကျိုးစီးပွား ဖန်တီးညှိနှိုင်းခြင်း စတဲ့နည်းလမ်းတွေကို အသုံးပြုလေ့ရှိကြကြောင်း ရေးသား တင်ပြခဲ့ပါတယ်။
ပါဝါကျင့်သုံးမှုရဲ့ နောက်ထပ်မျက်နှာစာတခုကတော့ အတွေးအခေါ်အရ ထိန်းချုပ်မှုဖြစ်ပါတယ်။ ဒီမျက်နှာစာမှာ ပါဝါကျင့်သုံးသူဟာ အင်အားအသုံးပြုမှုတွေ၊ သစ္စာစောင့်သိစေရန် ကြိုးပမ်းမှုတွေ ပြုလုပ်တာမဟုတ်ပဲ လူသားတွေရဲ့ တွေးခေါ်စဉ်းစားမှု၊ လိုအင်ဆန္ဒနဲ့ လိုအပ်ချက်တွေကို ပုံဖော်လွှမ်းမိုးတာဖြစ်ပါတယ်။ စစ်ပွဲတွေ၊ နိုင်ငံရေးရာတွေမှာ ၀ါဒဖြန့်ချိရေးပြုလုပ်တာဟာ ဒီမျက်နှာစာကို အသုံးပြုပြီး ပါဝါကျင့်သုံးမှုဖြစ်ပါတယ်။ နိုင်ငံရေးလှုပ်ရှားမှုတွေမှာ ပါဝင်နေတဲ့ လှုပ်ရှားတက်ကြွသူတွေဟာ မိမိရဲ့ရပ်တည်ချက်၊ ရန်သူရဲ့ ၀ါဒဖြန့်ချိရေး သတင်းအချက်အလက် တွေကို အမြဲချိန်ဆပြီး မိမိကိုယ်ကို ဆန်းစစ်ဝေဖန်မှု ပြုလုပ်နေဖို့ လိုအပ်ပါတယ်။ တဘက်ရန်သူရဲ့ ၀ါဒမှိုင်းလုံးတွေ မိမိရဲ့အင်အားစုနဲ့ အမာခံတွေအပေါ်မှာ သက်ရောက်မှုမရှိအောင် တန်ပြန်ဝါဒဖြန့်ချိရေးအစီအစဉ်တွေ ပြုလုပ်ရပါမယ်။
ဒီနေရာမှာ စာနယ်ဇင်းသမားကျင့်ဝတ်နဲ့ ၀ါဒဖြန့်ချိရေးသမားကျင့်ဝတ် မတူပါဘူး။ စာနယ်ဇင်းသမားက ဖြစ်စဉ်တရပ်ပေါ်မှာ ရှုထောင့်မျိုးစုံကနေ တင်ပြရပါတယ်။ ၀ါဒဖြန့်ချိရေးသမားက မိမိရဲ့ ရပ်တည်ချက် ရှုထောင့်ကနေ တင်ပြရပါတယ်။ ဖြစ်ရပ်တွေမှာ တခုထက်ပိုတဲ့ အမှန်တရားတွေ ရှိနေတတ်ပါတယ်။ ဘယ်အမှန်တရားကို ဘယ်သူတွေကို ကိုယ်စားပြုပြီး ဒီဖြစ်စဉ်ကို တင်ပြမှာလဲဆိုတာက ရပ်တည်ချက်နဲ့ ဆိုင်လာပါတယ်။ ဥပမာ- စစ်ခေါင်းဆောင်တွေက အမိန့်ပေးတဲ့အတွက် ဆန္ဒပြတဲ့ ပြည်သူတွေကို ပစ်သတ်မှုဖြစ်စဉ်တခုဖြစ်ပွားပြီဆိုပါစို့။ စစ်သားတွေက စစ်မိန့်ကို နာခံတာ၊ ပြည်သူတွေက သူတို့ရဲ့ ဆန္ဒကို ထုတ်ဖော်တာ၊ ပြည်သူတွေ ဒီကို ဆန္ဒဖော်ထုတ်ရခြင်းရဲ့ အခြေခံအကြောင်းရင်းစတဲ့ အချက်တွေ အများကြီးပါဝင်ပါတယ်။ ဒါကို စစ်အာဏာရှင်ဘက်က ၀ါဒဖြန့်ချိတဲ့အခါ ဆန္ဒပြတဲ့ ပြည်သူတွေကို အဖျက်သမားတွေအနေနဲ့ ပြောမှာဖြစ်ပါတယ်။ ဘာကြောင့်လဲဆိုတော့ သူတို့သာယာယစ်မူးနေတဲ့ ရာထူးစည်းစိမ်တွေ ပျက်စီးသွားမှာကို ပူပန်စိုးရိမ်စိတ်ကြောင့်ပါ။ စစ်မိန့်နာခံတဲ့ စစ်သားတွေကို သစ္စာစောင့်သိတဲ့ သူရဲကောင်းတွေအနေနဲ့ ပုံဖော်မှာ ဖြစ်ပါတယ်။ ဒါမှလဲ သူတို့ရဲ့ အာဏာရှင်စနစ်ကို ကာကွယ်ပေးသူတွေ အများအပြားထွက်ပေါ်လာမှာဖြစ်ပါတယ်။ တပြိုင်နက်တည်းမှာပဲ စစ်မိန့်မနာခံသူတွေ၊ လူထုနဲ့ ပူးပေါင်းသူတွေကို တပ်ပြေးတွေ၊ သစ္စာဖောက်တွေအနေနဲ့ ပုံဖော်မှာဖြစ်ပါတယ်။ ဒါမှလဲ တပ်တွင်းပုန်ကန်မှုတွေ၊ လူထုနဲ့ စစ်တပ် တသားတည်းဖြစ်သွားမှုတွေကို ကာကွယ်နိုင်ပါလိမ့်မယ်။ ဒါက စစ်တပ်ဘက်က ၀ါဒဖြန့်ချိရေးသဏ္ဍာန်ပါ။
ဒါကို လူထုဘက်က ရပ်တည်တဲ့ တော်လှန်ရေးသမားတွေဘက်က ၀ါဒဖြန့်ချိရေးမှာကျတော့ စစ်အာဏာရှင် စနစ်ရဲ့ ဆိုးကျိုးတွေကို ဖော်ထုတ်ပြမှာ ဖြစ်ပါတယ်။ ပြည်သူလူထုကို သစ္စာမခံပဲ လူထုကို ဖိနှိပ်တဲ့ အာဏာရှင်တွေအပေါ် သစ္စာစောင့်သိတာကို ရှုံ့ချပါတယ်။ ဝေဖန်ပြောဆိုပါတယ်။ ပြည်သူလူထုနဲ့ တသားတည်းဖြစ်လာတဲ့ ဘက်ပြောင်း တပ်မတော်သားတွေကို သူရဲကောင်းတွေအဖြစ် ပုံဖော်မှာဖြစ်ပါတယ်။ ဒါမှလဲ လူထုကို ကာကွယ်ပေးတဲ့ တပ်သားတွေ ထွက်ပေါ်လာမှာဖြစ်ပါတယ်။ ဒါက တော်လှန်ရေး သမားတွေဘက်က ၀ါဒဖြန့်ချိရေးသဏ္ဍာန်ပါ။
ဒါကို စာနယ်ဇင်းသမားတွေကကျတော့ ကိုယ်လုပ်နေတဲ့ စာနယ်ဇင်း၊ သတင်းဌာနရဲ့ ရပ်တည်ချက်အပေါ် အခြေခံပြီး တင်ပြပုံ၊ တင်ပြနည်းကွာပြန်ပါတယ်။ တချို့ကဆိုကြပါတယ်။ စာနယ်ဇင်းသမားမို့ ဘက်မလိုက်ဘူးဆိုတဲ့အချက်။ ဘယ်စာနယ်ဇင်း၊ သတင်းမီဒီယာမှာမဆို ရပ်တည်ချက်၊ ကျင့်ဝတ်၊ စည်းကမ်းတွေ ရှိပါတယ်။ ဒီကျင့်ဝတ်၊ စည်းကမ်းတွေက အခြေခံထားတဲ့ စည်းမျဉ်းတွေ၊ အိုင်ဒီရော်လော်ဂျီတွေအားလုံး တပုံစံတည်း မဟုတ်ပါဘူုး။ ဒါကြောင့် လုံးဝ ဘက်လိုက်မှုကင်းတယ်ဆိုတဲ့ အချက်ဟာ ဖြစ်နိုင်စရာ မရှိပါဘူး။ အချက်အလက်ကို ရာနှုန်းပြည့်နီးပါး ဦးစားပေးရတဲ့ သတင်းတွေမှာတောင် သတင်းဌာနတခုနဲ့ တခု တင်ပြပုံ မတူပါဘူး။ ဒီတော့ သတင်းမဟုတ်တဲ့ တခြားအကြောင်းအရာတွေ တင်ပြမှုမှာ ရပ်တည်ချက်ကို ရာခိုင်နှုန်း အတိုင်းအတာတခုအထိ ကိုင်ထားနိုင်ဖို့ လိုအပ်ပါတယ်။ သမိုင်းဆရာအနေနဲ့ တင်ပြမှု၊ သုံးသပ်လေ့လာသူအနေနဲ့ တင်ပြမှု၊ တော်လှန်ရေး ဘက်တော်သား စာနယ်ဇင်းသမားတယောက်အနေနဲ့ တင်ပြမှု၊ အာဏာရှင်ဘက်တော်သား စာနယ်ဇင်း သမား တယောက်အနေနဲ့ တင်ပြမှု၊ ပညာရှင်တယောက်အနေနဲ့ အကြောင်းနဲ့ အကျိုးတင်ပြမှု စတာတွေအားလုံးမှာ ရပ်တည်ချက် ရာခိုင်နှုန်း အနည်းအများကို ဆုပ်ကိုင်ထားဖို့ လိုပါမယ်။ မဟုတ်ရင် ဟိုခုန်ဒီခုန်နဲ့ မျောက်သစ်ကိုင်းလွတ်လို ဖြစ်နေတတ်ပါတယ်။ ဒီလို ရပ်တည်ချက်တွေမှာ ပြည်သူလူထုဘက်က ရပ်တည်မှာလား၊ အာဏာရှင်ဘက်က ရပ်တည်မှာလား၊ အဖိနှိပ်ခံလူတန်းစားတွေ ဘက်က ရပ်တည်မှာလား၊ ဘူဇွာ လူတန်းစားတွေဘက်က ရပ်တည်မှာလား၊ ထမင်းတနပ်အတွက် လှေကြုံစီးမှာလား၊ ရေတပေါက် သောက်ပြီး ရေဆန်ကို လှော်တက်မှာလား ဆိုတာတွေကတော့ လူ့သိက္ခာ၊ လူ့တန်ဖိုးတွေနဲ့ပဲ ဆိုင်တဲ့ ရွေးချယ်မှုတွေပဲ ဖြစ်ပါတယ်။
ပါဝါနဲ့ ပတ်သက်တဲ့ နောက်ထပ်မျက်နှာစာ တခုကတော့ agenda ချမှတ်ပေးမှုပါ။ နိုင်ငံရေး အဖွဲ့အစည်းတခုကိုပဲဖြစ်ဖြစ်၊ နိုင်ငံတနိုင်ငံကိုပဲဖြစ်ဖြစ်၊ လူတယောက်ကိုပဲဖြစ်ဖြစ် ချမှတ်သင့်တဲ့ ဆုံးဖြတ်ချက်တွေ ချမှတ်လို့မရအောင် ပါဝါကျင့်သုံးပြီး လွှမ်းမိုးမှုဖြစ်ပါတယ်။ ဒီနည်းလမ်းကို နိုင်ငံရေး၊ စီးပွားရေး၊ လူမှုရေးကဏ္ဍစုံမှာ အသုံးပြုကြပါတယ်။ political agenda တွေမှာ ကိုယ့်အကျိုးစီးပွားနဲ့ မကိုက်ညီတဲ့ ဆုံးဖြတ်ချက်တွေ ချမှတ်လို့ မရအောင် ထိန်းချုပ်လို့ ရတဲ့ ပါဝါကျင့်သုံးမှုဖြစ်ပါတယ်။ အချိန်မှီဆုံးဖြတ်ရမယ့် ကိစ္စရပ်တွေကို အချိန်မမှီအောင် ပြုလုပ်တာ၊ အရေးကြီးကိစ္စတခုဖြစ်ပွားနေချိန်မှာ တခြားအများစိတ်ဝင်စားဖွယ် အကြောင်းအရာလေးတွေနဲ့ လမ်းလွှဲတာ၊ နိုင်ငံရေးပါတီနဲ့ အဖွဲ့အစည်းတွေရဲ့ ဦးတည်ချက်လမ်းကြောင်းတွေကို လွှဲပေးတာတွေဟာ ဒီပါဝါကျင့်သုံးမှု မျက်နှာစာမှာ အကျုံးဝင်ပါတယ်။
နိုင်ငံရေးဆိုတာ ပါဝါနဲ့ ပတ်သက်တယ်ဆိုတဲ့ ရှူထောင့်ကို အမျိုးသမီးအခွင့်အရေး လှုပ်ရှားသူ အများအပြားက ထောက်ခံကြပါတယ်။ အစဉ်အလာဓလေ့ထုံးစံတွေက အမျိုးသမီးတွေရဲ့ လုပ်ငန်းတာဝန် ဆိုတာ အိမ်မှုကိစ္စတွေအနေနဲ့ သတ်မှတ်ပြီး အမျိုးသမီးတွေရဲ့ နိုင်ငံရေးပါဝင်ပတ်သက်မှုကို ကန့်သတ်ထားတတ်ကြပါတယ်။ အမျိုးသားတွေကသာ ပြင်ပကမ္ဘာမှာ လှုပ်ရှားနေရသူများဖြစ်တဲ့အတွက် နိုင်ငံရေး ပါဝင်ပတ်သက်မှုရှိတယ်ဆိုတဲ့ ဒီထုံးတမ်းစဉ်လာတွေကို အမျိုးသမီးအခွင့်အရေးလှုပ်ရှားသူတွေက ဆန့်ကျင်ပြီး “ကိုယ်ရေးကိုယ်တာဟာလဲ နိုင်ငံရေးဖြစ်တယ်“ လို့ ကြွေးကြော်ခဲ့ကြပါတယ်။ မိသားစုဘ၀၊ တဦးချင်းဘ၀ရဲ့ အခြေအနေဆိုတာတွေဟာ နိုင်ငံရေးစနစ်တွေ၊ လှုပ်ရှားမှုတွေရဲ့ ရိုက်ခတ်မှုကို ခံစားကြရစမြဲဖြစ်တာကြောင့် နိုင်ငံရေးဆိုတာ မိသားစုဘ၀နဲ့ ဆက်စပ်နေတယ်လို့ သူတို့ကဆိုကြပါတယ်။
Sexual Politics (1969) စာအုပ်ထဲမှာ စာရေးသူ Kate Millet က နိုင်ငံရေးဆိုတာ လူအုပ်စုတခုကနေ တခုကို ချုပ်ကိုင်ထားတဲ့ အစီအမံတွေဖြစ်တာကြောင့် မိသားစုဘ၀တွေမှာ အမျိုးသားတွေက အမျိုးသမီးတွေကို ၀င်ငွေအရ၊ ထုံးတမ်းစဉ်လာအရ၊ စာပေအကိုးအကားတွေအရ နိမ့်ကျသူတွေအဖြစ် မိမိကိုယ်မိမိ လက်ခံလာအောင် ပြုလုပ်ထိန်းချုပ်ထားတာတွေကို နိုင်ငံရေးအနေနဲ့ သတ်မှတ်နိုင်ကြောင်း ရေးသားထားခဲ့ပါတယ်။ မ၀ါဒီတွေက နိုင်ငံရေးဆိုတာ နေ့စဉ်လူမှုဘ၀နဲ့ ဆက်စပ်တယ်လို့ အခိုင်အမာ ယုံကြည်ထားကြပါတယ်။ သူတို့အမြင်အရ အိမ်ထောင်ဘက်နှစ်ဦးအကြားက ဆက်ဆံရေး၊ မိဘနဲ့ သားသမီးဆက်ဆံရေး၊ အလုပ်ရှင်နဲ့အလုပ်သမား ဆက်ဆံရေး၊ အစိုးရနဲ့ နိုင်ငံသူနိုင်ငံသားအကြားက ဆက်ဆံရေးစတာတွေမှာ ပါဝါကျင့်သုံးမှုတွေ အပြန်အလှန်ရှိနေတာကြောင့် ဒါတွေကို နိုင်ငံရေးအဖြစ် ယူဆနိုင်ပါတယ်။
ဒါကြောင့်နိုင်ငံရေးဆိုတာ စကားလုံးရဲ့ အနက်အဓိပ္ပာယ်မှာတင် အလွန်ကို ကျယ်ဝန်းနက်နဲတဲ့ စကားလုံးတခုအနေနဲ့ သတ်မှတ်နိုင်ပါတယ်။ ဒီလိုနက်နဲလှတဲ့ နိုင်ငံရေးပညာကို လေ့လာတဲ့အခါမှာကျတော့ သဘောတရားတွေ၊ သီအိုရီတွေ၊ စနစ်တွေ၊ အတွေးအခေါ်တွေ ဘက်ပေါင်းစုံကနေ ပေါင်းစပ်ပါဝင်လာတာကြောင့် ပိုမိုကျယ်ပြန့်သွားပါတယ်။ ရှေးခေတ်တွေမှာတုန်းကတော့ နိုင်ငံရေးကို ပညာရပ်တခုအဖြစ် လေ့လာတဲ့အခါမှာ ဒဿနိကဗေဒ၊ ဥပဒေ၊ သမိုင်းပညာရပ်တွေရဲ့ ဘာသာရပ်ခွဲတခုအနေနဲ့ပဲ သတ်မှတ်လေ့လာခဲ့ကြပါတယ်။ ရည်ရွယ်ချက်ကတော့ လူ့အဖွဲ့အစည်း ဖြစ်တည်မှုရဲ့ အခြေခံစည်းမျဉ်းတွေကို ဖော်ထုတ်လေ့လာဖို့ ဖြစ်ပါတယ်။
နိုင်ငံရေးလေ့လာဆန်းစစ်မှုရဲ့ မူရင်းအစဟာ ရှေးခေတ်ဂရိပြည်လို့ ဆိုနိုင်ပါတယ်။ ပလေတိုနဲ့ အရစ်တိုတယ်တို့ဟာ နိုင်ငံရေးကို ဒဿနိကဗေဒရှူထောင့်ကနေ လေ့လာသုံးသပ်တဲ့ ဒဿနိကဗေဒဆိုင်ရာ အစဉ်အလာ ( Philosophical tradition) ရဲ့ ဖခင်များပဲ ဖြစ်ပါတယ်။ medieval theorists တွေဖြစ်တဲ့ Augustine နဲ့ Aquinas တို့ရဲ့ ရေးသားချက်တွေမှာလဲ သူတို့ရဲ့ အတွေးအခေါ်တွေ လွှမ်းမိုးမှုရှိပါတယ်။ ဒီလို ဒဿနိကဗေဒအစဉ်အလာအရ လေ့လာမှုတွေမှာ တန်ဖိုး၊ စံနှုန်းစံထား၊ ကိုယ်ကျင့်တရား စတာတွေနဲ့ ပတ်သက်တဲ့ အတွေးအခေါ်တွေ၊ မေးခွန်းတွေ (normative questions) အများအပြားပါဝင်ပါတယ်။ ဘာဆိုတာထက် ဘယ်လိုဖြစ်သင့်တယ် ဆိုတာကို ဦးစားပေးဖော်ပြချက် များပါတယ်။ ဥပမာ- ဘာကြောင့် နိုင်ငံတော်က ချမှတ်တဲ့ ဥပဒေကို လိုက်နာသင့်သလဲ၊ ပုဂ္ဂလိက လွတ်လပ်ခွင့်မှာ အများကို မထိခိုက်အောင် ဘယ်လိုကန့်သတ်ချက်တွေ ရှိသင့်သလဲ စတာမျိုးတွေပါ။
နိုင်ငံရေးလေ့လာမှုဆိုင်ရာ နောက်ထပ်အစဉ်အလာတခုကတော့ ကိန်းဂဏာန်း အခြေပြအစဉ်အလာ empirical tradition ဖြစ်ပါတယ်။ ဒီအစဉ်အလာကို ဖွဲ့စည်းပုံအခြေခံဥပဒေအမျိုးအစားတွေကို ခွဲခြားပြခဲ့တဲ့ အရစ္စတိုရဲ့စာ၊ Machiavelli ရေးသားခဲ့တဲ့ realistic account of statecraft နဲ့ Montesquieu ရေးသားခဲ့တဲ့ အစိုးရနဲ့ ဥပဒေဆိုင်ရာ လူမှုဗေဒသီအိုရီ တွေထဲမှာ တွေ့မြင်နိုင်ပါတယ်။၁၇ ရာစုနှောင်းပိုင်းကာလတွေမှာ John Locke နဲ့ David Hume တို့ရဲ့ doctrine of empiricism ပျံ့နှံ့လာပါတယ်။ Doctrine of empiricism က အတွေ့အကြုံဆိုတာ အသိပညာရဲ့ အခြေခံဖြစ်တာကြောင့် သီအိုရီတွေ၊ အဆိုအမိန့်တွေအားလုံးကို လေ့လာစောင့်ကြည်မှုတွေနဲ့ စမ်းသပ်ရမယ်လို့ ဆိုထားပါတယ်။ ၁၉ ရာစုရောက်တော့ ဒီအတွေးအခေါ်တွေဟာ positivism ၀ါဒထွန်းကားလာရေးဆီကို ဦးတည်သွားပါတော့တယ်။
နိုင်ငံရေးကို သိပ္ပံပညာဝေါဟာရတွေနဲ့ ဖော်ပြဖို့ ပထမဆုံးကြိုးပမ်းခဲ့သူကတော့ materialist conception of history ကို အသုံးပြုပြီး သမိုင်းကြောင်းတိုးတက်မှုတွေရဲ့ တွန်းအားကို ဖော်ထုတ်နိုင်ခဲ့တဲ့ Karl Marx ပဲဖြစ်ပါတယ်။ ၁၈၇၀ ကာလတွေမှာ နိုင်ငံရေးကို သိပ္ပံပညာရပ်အနေနဲ့ သတ်မှတ်မှုတွေ ထွက်ပေါ်လာပါတယ်။ အောက်စဖိုဒ့်၊ ပဲရစ်နဲ့ ကိုလံဘီယာတက္ကသိုလ်တွေမှာ နိုင်ငံရေးသိပ္ပံဘာသာရပ်ကို သင်ကြားလာကြပါတယ်။ (၁၉၀၆) ခုနှစ်မှာ အမေရိကန်နိုင်ငံရေးသိပ္ပံလေ့လာရေးစာစောင် ထွက်ပေါ် လာပါတယ်။ (၁၉၅၀-၆၀) ကာလတွေကျတော့ သိပ္ပံနည်းကျနိုင်ငံရေးလေ့လာမှုတွေ အားကောင်း လာပါတယ်။ David Easton ရဲ့ နိုင်ငံရေးဆိုတာ သဘာဝသိပ္ပံနည်းလမ်းတွေကိုပါ သင့်လျော်သလို ဆွဲယူအသုံးပြုနိုင်တဲ့ ပညာရပ်တခုဖြစ်တယ်ဆိုတဲ့ အဆိုထွက်ပေါ်လာပြီးနောက်ပိုင်းမှာ အရေအတွက် အခြေပြုသုတေသနနည်းလမ်းများကို အသုံးပြုပြီး နိုင်ငံရေးလေ့လာဆန်းစစ်ချက်တွေ ပိုပြီး များပြားလာပါတယ်။ ဥပမာ- မဲပေးမှုပြုမူဆောင်ရွက်ပုံတွေ၊ တရားရေးရာပြုမူဆောင်ရွက်ပုံတွေ၊ နိုင်ငံရေးသမားတွေရဲ့ ပြုမူဆုံးဖြတ်ပုံ စတာတွေမှာ ဖြစ်ပါတယ်။ လေ့လာစောင့်ကြည့်ထားတဲ့ ပြုမူဆောင်ရွက်ပုံတွေပေါ်မှာ အခြေတည်ပြီး လူမှုသီအိုရီတွေတည်ဆောက်ရမယ်ဆိုတဲ့ ယုံကြည်မှု (Behaviouralism) ဟာ (၁၉၅၀-၆၀) ကာလတွေရဲ့ နိုင်ငံရေးလေ့လာမှုတွေကို လွှမ်းမိုးထားခဲ့ပါတယ်။
(၁၉၆၀) နောက်ပိုင်းကာလရောက်တော့ Behaviouralism ကို မကျေလည်မှုတွေ ထွက်ပေါ်လာပါတယ်။ နိုင်ငံရေးဆိုတာ ကိန်းဂဏာန်းတွေနဲ့ပဲ တိုင်းတာလို့ မရဘူးဆိုတာကို ငြင်းဆိုမှုတွေရှိလာပါတယ်။ တရားမျှတမှု၊ လွတ်လပ်မှု၊ ညီညွတ်မှု၊ အခွင့်အရေးစတာတွေကို ကိန်းဂဏာန်းနဲ့ တိုင်းတာလို့ မရနိုင်ကြောင်း ပြောဆိုလာကြပါတယ်။ ဒီလိုနဲ့ (၁၉၇၀) ကာလတွေမှာ ကိုယ်ကျင့်တရား၊ စံချိန်စံညွန်းစတာတွေနဲ့ဆိုင်တဲ့ normative questions တွေဆီ ပြန်လှည့်လာကြပါတယ်။ John Rawls နဲ့ Robert Nozick တို့ရဲ့စာတွေမှာ ဒီသဘောတရားတွေ အများအပြား ပါဝင်ပါတယ်။
နောက်ပိုင်းကျတော့ နိုင်ငံရေးလေ့လာမှုတွေမှာ နိုင်ငံရေးဘောဂဗေဒ၊ ပြည်သူ့ရွေးချယ်မှုသီအိုရီ (public-choice theory) ၊ Rational Choice theory စတာတွေ ပေါ်ထွက်လာပါတယ်။ ဒီသီအိုရီတွေက ဘောဂဗေဒ သီအိုရီတွေမှာ အခြေခံထားတာဖြစ်ပါတယ်။ ဒါတွေကို အသုံးပြုပြီး Antony Downs, Mancur Olson နဲ့ William Nikanen တို့က ပါတီယှဉ်ပြိုင်မှု၊ အကျိုးအမြတ်အုပ်စု ပြုမူဆောင်ရွက်ပုံတွေနဲ့ ဗျူရိုကရက်တွေရဲ့ မူဝါဒလွှမ်းမိုးမှုစတာတွေကို လေ့လာခဲ့ကြပါတယ်။ နိုင်ငံရေးလေ့လာမှုတွေမှာ အသုံးများတဲ့ နောက်ထပ်သီအိုရီတခုကတော့ သင်္ချာဘာသာရပ်ကနေ သက်ဆင်းလာတဲ့ ဂိမ်းသီအိုရီဖြစ်ပါတယ်။ နိုင်ငံရေးရှုပ်ထွေးမှုတွေ၊ အကျပ်အတည်းကာလတွေမှာ မှန်ကန်တဲ့ ဆုံးဖြတ်ချက်တွေ ချမှတ်နိုင်ဖို့အတွက် အသုံးပြုသင့်တဲ့ သီအိုရီတခုဖြစ်ပါတယ်။
သင်္ချာနဲ့စီးပွားရေးသီအိုရီတွေကနေ သက်ဆင်းလာတဲ့ နိုင်ငံရေးသီအိုရီအသစ်တွေသာမက ၀ါဒသစ်၊ အတွေးအခေါ်သစ်တွေလဲ အများအပြား ပေါ်ပေါက်လာပါတယ်။ အမျိုးသမီးဝါဒဟာ ကျားမကွဲပြားခြားနားမှုတွေကို ထုတ်ဖော်ရင်း နိုင်ငံရေးဆိုတာ ဘာလဲဆိုတဲ့ အဓိပ္ပာယ်ကို မေးခွန်းထုတ်နေပါတယ်။ Green Politics ဟာ လူသားတွေကို ဦးစားပေးစဉ်းစားမှု (anthropocentric emphasis) မှာ အခြေခံတဲ့ နိုင်ငံရေး၊ လူမှုရေးသီအိုရီတွေကို စိန်ခေါ်ပြီး၊ သဘာဝပတ်ဝန်းကျင် သဘောတရားတွေကို ဦးစားပေးစဉ်းစားမှု (holistic emphasis) ပေါ်မှာ အခြေတည်တဲ့ နိုင်ငံရေး၊ လူမှုရေး နားလည်မှုတွေကို ဖြန့်ဖြူးနေပါတယ်။ ၁၉၂၃ မှာ ပေါ်ပေါက်လာတဲ့ ဖရန့်ဖတ်ကျောင်းတော်ရဲ့ မာ့စ့်လက်သစ်ဝါဒပေါ်မှာ အခြေခံထားတဲ့ critical theory ဟာ လက်ရှိကျင့်သုံးနေတဲ့ လူမှုထုံးတမ်းစဉ်လာတွေကို ဝေဖန်မှုတွေ ပြုလုပ်နေပါတယ်။
ဒီလိုဝါဒတွေ၊ သီအိုရီတွေ အများအပြားအကြားမှာ နိုင်ငံရေးလေ့လာသူတယောက်ဟာ နိုင်ငံရေးသဘောတရားတွေ (political concepts) နိုင်ငံရေးသီအိုရီတွေ (political theories) နိုင်ငံရေးမော်ဒယ်တွေ (political models) အတွေးအခေါ်အိုင်ဒီယော်လော်ဂျီတွေ (ideological traditions/ paradigms) တွေကို ကွဲကွဲပြားပြား သိနားလည်ဖို့ လိုအပ်လှပါတယ်။
(ဆက်လက်ဖော်ပြပါမည်)
ခင်မမမျိုး (၂၁၊ ၁၀၊ ၂၀၀၉)
ကျွန်မ၏ ဆရာများ
Tuesday, October 6, 2009
ကမ္ဘာ့ဆရာများနေ့ဖြစ်တဲ့ အောက်တိုဘာလ (၅) ရက်နေ့ ။
ဒီနေ့မှာ တိုက်တိုက်ဆိုင်ဆိုင် ဆိုသလိုပဲ ကျွန်မ ကော်မတီအဖွဲ့ဝင်အဖြစ် ပါဝင်နေတဲ့ မြို့နယ်ကောင်စီ၊ မိသားစုလေ့လာသင်ယူရေး ကော်မတီရဲ့ လစဉ်အစည်းအဝေး ရှိနေခဲ့ပါတယ်။ ဒါကြောင့်လဲ ညနေပိုင်း အိမ်ပြန်ရောက်တာနဲ့ သားလေးကို မုန့်ကျွေးပြီး အစည်းအဝေးကို ပြန်ထွက်ခဲ့ပါတယ်။ ကျွန်မတို့ ကော်မတီလေးမှာ အမျိုးသမီးလေး၊ ငါး၊ ခြောက်ယောက်ပဲ ပါဝင်တာ ဆိုပေမယ့် အလုပ်က အများသား။ ငယ်ငယ်တုန်းက ကြားဖူးခဲ့တဲ့ အဆိုအမိန့်လေးတွေ ရှိပါတယ်။ “သန်းရှာအတင်းတုပ်၊ မိန်းမအလုပ်“ ဆိုတဲ့ စကား။ ဒီအဆိုအမိန့်တွေဟာ အမျိုးသမီးတွေရဲ့အရည်အချင်းနဲ့ လုပ်ဆောင်နိုင်စွမ်းတွေကို ပြက်ရယ်ပြုတာပဲ ဖြစ်ပါတယ်။
ဘာကြောင့်လဲ ဆိုတော့ ကျွန်မတို့ အမျိုးသမီးအနည်းငယ် စုပေါင်းပြီး တလမှာ တခါ နှစ်နာရီကြာ စုဝေးစည်းဝေးတာ၊ ခြောက်နာရီကြာ အချိန်ပေးပြီး အလုပ်တာဝန်တွေ ခွဲဝေယူဆောင်ရွက်တဲ့ ရလာဒ်ဟာ အခုနှစ်နှစ်အတွင်းမှာ ကလေးသူငယ်ပြုစုပျိုးထောင်ရေးသင်တန်း၊ ပညာအခြေခံနည်းသူ မိဘများအတွက် သားသမီးတွေရဲ့ အိမ်စာကို ကူပေးနိုင်ဖို့ ပို့ချတဲ့ သင်္ချာနဲ့ အင်္ဂလိပ်စာသင်တန်း၊ အိမ်ရှင်မ မိခင်တွေ တချိန်မှာ သားသမီးတွေ ကြီးလာတဲ့အခါ အလုပ်ခွင်ဝင်ဖို့ အဆင်သင့်ဖြစ်အောင် လေ့ကျင့်ပေးတဲ့ သင်တန်း၊ အချိန်အခါနဲ့အလိုက်ကျင်းပတဲ့ ကလေးသူငယ် ပျော်ပွဲရွှင်ပွဲ စတာမျိုးလေးတွေ တစတစ ပေါ်ထွက်လာနေခဲ့ပြီ ဖြစ်ပါတယ်။ အသားအရောင်၊ ဘာသာစကား၊ မွေးဖွားဇာတိ မတူကြပေမယ့် တူညီတဲ့ ရည်မှန်းချက်၊ တူညီတဲ့ ပန်းတိုင်ကို ကိုင်စွဲပြီး ရေသာမခို၊ အချိန်အလဟဿ အဖြစ်မခံပဲ ကိုယ်လုပ်စရာရှိတာကို စေတနာထား လုပ်ကိုင်ကြတာကြောင့် လုပ်ငန်းကြီးတွေရဲ့ အလှူငွေတွေလဲ တိုးတိုးပွားပွား လက်ခံရရှိလာပါတယ်။ ဒါကြောင့်လဲ တချိန်မှာ social enterprise အထိ ဖြစ်ထွန်းအောင် ကြိုးပမ်းဆောင်ရွက်နေကြပါတယ်။
ဘယ်လိုပဲဖြစ်ဖြစ် လစဉ်အစည်းအဝေးတိုင်းကို မပျက်ကွက်အောင် ဂရုတစိုက်နဲ့ ကျွန်မတက်နေမိခဲ့ပါတယ်။ မွေးဖွား ခဲ့တဲ့ အမိမြေ မဟုတ်ပေမယ့်လဲ ဒီမြို့လေးဟာ ကျွန်မကို အရိပ်ခိုခွင့်ပေးထားတဲ့ မွေးစားမြို့လေး။ ဒီမြို့ရဲ့ ရပ်ရေးရွာရေး ဟာ မြို့တွင်းမှာ နေထိုင်သူအားလုံးရဲ့ အရေးပဲလို့ ကျွန်မခံယူမိတယ်။ ခေတ္တနားခိုရာ မြို့လေးဖြစ်တဲ့ ဒီမြို့လေးကိုတောင် ဒီလောက် သံယောဇဉ် ကြီးမိတဲ့ ကျွန်မ။ မွေးဖွားကြီးပြင်း၊ ပညာရည်နို့သောက်စို့ခဲ့ရတဲ့ မြို့လေးကိုဆိုရင်တော့ လွမ်းလိုက်ပါဘိ။ တခါတရံများ အိပ်မက်တွေထဲအထိ မြို့လေးက အလည်ရောက်လာတတ်တယ်။ ဒီအလွမ်းဓာတ်ခံလေးကို ဆွပေးခဲ့တာကတော့ ကျွန်မတွေ့ခဲ့ရတဲ့ ကမ္ဘာ့ဆရာများနေ့ အထိမ်းအမှတ် e-card လေးပါ။ ကော်မတီဝင်တယောက်ဖြစ်တဲ့ ရှိုနာက ဂျီစီအက်စ်အီးသင်တဲ့ ဆရာမ။ သူက သူ့ကွန်ပျူတာထဲက ကတ်လေးကို ကျွန်မကို ပြတယ်။ သူ့တပည့်လေးတယောက်က ပို့ပေးတာဆိုပဲ။ သူလဲ သူ့ secondary school က ဆရာတချို့ရဲ့ အီးမေးလ်တွေဆီ ညကျရင် ပို့ပေးဦးမယ်တဲ့။ ကျွန်မကိုကော မပို့ဖူးလားမေးတယ်။ ပို့ချင်တယ်။ ဖြစ်နိုင်ရင် ပို့ရုံတောင် မဟုတ်ဘူး။ လူကိုယ်တိုင်ကို သွားပြီး Respect ပေးချင်တာပါလို့ ပြောလိုက်မိတယ်။ ဘယ်လိုပဲဖြစ်ဖြစ် ဒါတွေ မလုပ်နိုင်ခင်မှာ ကျွန်မလုပ်နိုင်တာကတော့ ဒီစာစုလေး ရေးတာပဲ ထင်ပါရဲ့။
(၁)
“ခင်မမမျိုး။ အိမ်က ကားမပါဘူးလား“
ရုတ်တရက် လိုင်းကားပေါ်မှာ တွေ့လိုက်ရလို့ အံ့သြဟန်နဲ့ ဆရာမက မေးတယ်။ ကျွန်မကလဲ ဆရာမနဲ့ မမျှော်လင့်ပဲ တွေ့လိုက်ရလို့ အဖြေရခက်သွားတယ်။ ကျွန်မဘေးမှာက ကျွန်မရဲ့ ချစ်သူ။ ကားမောင်းသမားကို ဈေးမှာရပ်ခိုင်း၊ ဈေးဝယ်မယ်ဆိုပြီး စောင့်ခိုင်း၊ ဈေးရဲ့ တခြားအပေါက်ကနေ ထွက်ပြီးမှ ချစ်သူနဲ့ လျှောက်လည်ရတဲ့ ကျွန်မအခြေအနေကို ဆရာမကို ဘယ်လို ပြောရပ။ ဒီကာလက တက္ကသိုလ်တွေ အားလုံးပိတ်ထားတဲ့ ကာလ။ ကျွန်မအတွက်ဆိုရင်တော့ ဘ၀ပင်လယ်ကြီးကို လှေငယ်တစင်းနဲ့ လှော်ထွက်ပြီး အရာရာကို စူးစမ်းနေတဲ့ ကာလ။
“ဟို- ကားမောင်းသမား အလုပ်ထွက်သွားလို့ပါ ဆရာမ။ အသစ်ရှာနေတာ“
“သြော်- ကားမောင်းသမား မရှိလို့လား။ ဟုတ်တယ်။ အခုအချိန်ကလဲ ကားမောင်းသမားတွေ ရှားတယ်။ ဒါနဲ့ သမီး အမေကော နေကောင်းလား“
“ကောင်းပါတယ်ရှင့်“
“ဆရာမနှုတ်ဆက်တယ်ပြောပေးနော်“
ပြန်ပြောဖြစ်မှာ မဟုတ်မှန်းသေချာပေမယ့် ကျွန်မ အလိုလို ခေါင်း ညိတ်မိသွားတယ်။
“မှတ်တိုင်ရောက်ပြီညီမလေး။ ဆင်းရအောင်“
ဘေးက ချစ်သူက ဆရာမကိုလဲ ခေါင်းညိတ်နှုတ်ဆက်ရင်း ကျွန်မကို လှမ်းပြောတာမို့ ဆရာမကို နှုတ်ဆက်လိုက်မိတယ်။ အမြန်ယာဉ်ငယ်လိုင်းကား နောက်ခန်းကနေ ချစ်သူကမ်းပေးတဲ့ လက်ကို အားပြုရင်း ခုန်ဆင်းလိုက်တဲ့ ကျွန်မကို ဆရာမ လှမ်းကြည့်ပြီး ကျန်ရစ်နေမလား။ သူ့တပည့်မတယောက်တောင် အရွယ်ရောက်ပြီး ဘ၀အဖော်ရှိနေပြီပဲ လို့ တွေးနေမလား။ ကျွန်မမသိ။ ဒီတုန်းကတော့ ဘ၀ဆိုတာ ကိုယ်စီမံတဲ့အတိုင်း ဖြစ်လာမှာပဲလို့ မျှော်လင့်ခဲ့မိတာမို့ တချိန် မင်္ဂလာဆောင်တဲ့အခါ ဆရာမကို ဖိတ်ရမယ်လို့တောင် တွေးလိုက်မိသေး။ ဘာပဲဖြစ်ဖြစ် မဖြစ်သာလို့ လိမ်ပြောခဲ့ရတာကို ခွင့်လွှတ်ပါလို့တော့ ရင်ထဲက တောင်းပန်ခဲ့မိတာ အသေအချာပါ။
သူငယ်တန်းဆရာမဖြစ်တာမို့ စာသင်ခန်းအတွေ့အကြုံလေးတွေကိုတော့ မမှတ်မိတော့ပါဘူး။ ငယ်ဘ၀က ဆရာမနဲ့ ပတ်သက်ပြီး တခုတော့ မှတ်မိနေသေးတယ်။ ငယ်ငယ်တုန်းက ကျွန်မအဖိုးက ကျွန်မကို ကမ္ဘာ့သမိုင်း၊ မြန်မာ့သမိုင်းတွေ အမြဲပြောပြတတ်တယ်။ ဒီအထဲမှာ ကေအင်ဒီအိုတို့၊ အင်းစိန်တိုက်ပွဲတို့တွေလဲ ပါတယ်။ ကျွန်မအတွက် အိယ်ယာဝင်ပုံပြင်ဆိုတာတွေက မားဂရက်သက်ချာတို့၊ ဂိုဘာချော့တို့တွေ။ ဒီတော့ ကျွန်မက အဖိုးကို ကေအင်ဒီအို ဆရာမနဲ့ စာသင်ရတယ်လို့ ဆိုဖူးသတဲ့။ အရွယ်ငယ်သေးတော့ လူမျိုးနဲ့ အဖွဲ့အစည်းတွေကို ကျွန်မကွဲကွဲပြားပြား သိဦးမှာ မဟုတ်။ အခု ကျွန်မရဲ့ သားလေး သုံးလေးနှစ်ကျရင်တော့ ဘာတွေ ပြောမယ်မသိ။ ကျွန်မအဲဒီအရွယ်တုန်းကတော့ အိမ်လာတဲ့ ဧည့်သည်တွေကို စစ်အေးတိုက်ပွဲတွေအကြောင်း၊ အိုင်အာအေအကြောင်း ပြောပြီး ဧည့်ခံတယ်လို့ အဖွားက ပြန်ပြောပြဖူးတယ်။ ဘယ်လိုပဲဖြစ်ဖြစ် ကေအင်ဒီအို ဆရာမလို့ ကျွန်မအမည်သတ်မှတ်ခဲ့ဖူးတဲ့ ရိုးသားအေးဆေးတဲ့ ကရင်အမျိုးသမီး ဆရာမ ဒေါ်နော်ထူးဆေးကို ဒီစာလေးနဲ့ ဂါရ၀ပြုမိပါတယ်။
(၂)
တတန်းရောက်တော့ ကျွန်မရဲ့ အတန်းပိုင်ဆရာမက ရှမ်းလူမျိုး ဒေါ်စ၀်သိန်းကြည်။ ဆရာမနဲ့ ပတ်သက်ပြီး နာမည်က လွဲလို့ တိတိပပ မမှတ်မိပေမယ့်၊ အရွယ်ရောက်လာပြီးနောက်ပိုင်း ရှင်ပြုနားသပွဲတွေ၊ မင်္ဂလာ အခမ်းအနားတွေမှာ တခါတရံ ဆရာမနဲ့ ဆုံမိတတ်တယ်။ ငယ်ငယ်တုန်းက အက်စ်အက်စ်အေ ဆရာမလို့များ အဖိုးကို ပြန်ပြောမိခဲ့သလားလို့တော့ သံသယဖြစ်မိသား။ ဆယ်တန်းအောင်ပြီး ငယ်ငယ်တုန်းက စာအုပ်ဟောင်း သေတ္တာတွေ ရှင်းရင်းနဲ့ ဗလာစာအုပ်တခုကို တွေ့မိတယ်။ စာအုပ်ထဲမှာက အဲဒီခေတ်ကာလ စစ်ဆင်ရေးတွေတုန်းက မြေပုံတွေပါတဲ့ သတင်းစာဟောင်းတွေ ဖြတ်ညှပ်ကပ်ထားတာ။ ကြူကုတ်-ပန်ဆိုင်း၊ ပါဂျို-နားဖော့၊ ဘုရားသုံးဆူ၊ မိုးဟိန်းစစ်ဆင်ရေး စတဲ့ စာလုံးလေးတွေကိုလဲ ကလေးလက်ရေးလေးတွေနဲ့ တွေ့ရတယ်။ ကျွန်မငယ်စဉ်ဘ၀မှာ ဒါတွေကို ဘာကြောင့် စိတ်ဝင်စား ခဲ့မိပါလိမ့်။ စဉ်းစားလို့ မရဘူး။
ကျွန်မရဲ့ နှစ်တန်းဆရာမကကျတော့ အင်းသားဆရာမ ဒေါ်ခင်ခင်စိုး။ ဆရာမနဲ့ ပတ်သက်ပြီး သိပ်မမှတ်မိပေမယ့် အရမ်းထက်ပြီး စည်းကမ်းကြီးတဲ့ ဆရာမတယောက်အနေနဲ့ စိတ်ထဲက ခံစားလို့ ရနေခဲ့တယ်။ ဆရာကန်တော့ပွဲမှာ စကားများလို့ဆိုပြီး ကျွန်မနဲ့ တခြားနှစ်ယောက် အရိုက်ခံခဲ့ရတာကိုလဲ မှတ်မိတယ်။ ကျွန်မဘ၀မှာ ပထမဆုံး အရိုက်ခံခဲ့ရဘူးတာ ဖြစ်လိမ့်မယ်။ ဆရာမကနောက်ပိုင်းမှာ ကျောင်းအုပ်ကြီး ရုံးခန်း ဆရာမဖြစ်တာမို့ ရုံးခန်းရောက်တိုင်း ကျွန်မနဲ့ အမြဲ တွေ့ရတယ်။ တကျောင်းလုံး ဖိန့်ဖိန့်တုန်အောင် ကြောက်ရတဲ့ ဆရာမကြီးကို ကျွန်မစိတ်ထဲ ကြောက်စိတ်မ၀င်မိပဲ ဆရာမနဲ့ အ၀င်ဝမှာ တွေ့ရတာကို စိတ်ထဲ ရှိန်နေမိခဲ့တာတော့ ဘာကြောင့်လဲ မသိ။
ကျွန်မသုံးတန်းရောက်တော့ ဆရာမက ဒေါ်အုန်းကြည်။ ညနေကျောင်းဆင်းရင်း ဆရာမဆီမှာ ကျူရှင်သွားတက်ကြရတာလဲ မှတ်မိနေသေးတယ်။ မှတ်မိဆို ဒီလိုကျူရှင်တက်ရတာနဲ့ ပတ်သက်ပြီး ကျွန်မနဲ့ ကျွန်မမိသားစုနဲ့ သဘောထားကွဲလွဲခဲ့ဖူးတာကိုး။ ဆရာမအိမ်က ကျောင်းနဲ့ ငါးမိနစ်လောက် လမ်းလျှောက်ရင် ရောက်တယ်။ ဒါပေမယ့် ကျွန်မအိမ်က မရဘူး။ ညနေကျောင်းဆင်းချိန်ကို တကူးတက လာကြိုပြီး၊ ဒီငါးမိနစ်ခရီးကို ကားနဲ့ ပို့တယ်။ ကျောင်းဆင်းချိန်ဆိုတော့ ကျောင်းသားတွေက အများကြီး။ လူစဲချိန်မှ ကားမောင်းလို့ရတော့ ကျူရှင်ရောက်ရင် ကျွန်မက နောက်ဆုံးမှရောက်တယ်။ သူငယ်ချင်းတွေက ကြိုရောက်နှင့်နေကြပြီ။ တခါတလေ သူငယ်ချင်းတွေက လမ်းပေါ်မှာ။ ကျွန်မကားက traffic စောင့်ရင်း ဆုံကြရော။ ကျွန်မစိတ်ထဲ ဘယ်လိုနေမှန်းကို မသိဘူး။ ခြေထောက်လဲ မပါတာမဟုတ်။ ကိုယ်က ကားပေါ်မှာ ငုတ်တုတ်နဲ့ သူတို့က လမ်းလျှောက်သွားနေတာကို ထိုင်ကြည့်နေရတယ်။ ကျွန်မမိသားစုနဲ့ ကျွန်မအကြားက တချို့သော လူမှုရေးပဋ္ဋိပက္ခလေးတွေက မပြောပလောက်တဲ့ ဒီလိုကိစ္စမျိုးလေးတွေပါ။ ဒါနဲ့ တရက်တော့ ကျွန်မလဲ ကျောင်းအဆင်းမှာ ကားပေါ်မတက်ပဲ သူငယ်ချင်းတွေနဲ့ ဆင်းလျှောက်တယ်။ ကျွန်မက လမ်းလျှောက်၊ အိမ်က ကားက ဘေးကလိုက်၊ နောက်က ကားတွေက ဟွန်းတီးနဲ့ ရှုပ်ပွနေတာပဲ။ နောက်ဆုံးတော့ ဆရာမကို အိမ်ကတိုင်တာမို့ ဒီလိုမလုပ်ရဘူးဆိုပြီး ဆရာမက ကျွန်မကို ရိုက်တာနဲ့ ဒီပဋ္ဋိပက္ခတွေ ပြီးဆုံးသွားပါရော။
ဘယ်လိုပဲ ဖြစ်ဖြစ် ဆရာမတို့ကို စိတ်ထဲက မှန်းရော်ပြီး ဂါရ၀ပြုပါတယ်။
(၄)
“ဒီကုလား-ဗမာ အရေးအခင်းနဲ့တော့ ပြီးမယ်မထင်ဘူးဆရာမ။ ဆယ်တန်းက မ--- တို့လဲ ကျောင်းသား သပိတ်မှောက်မယ်လို့ သမီးကို ပြောတယ်။ ဗိုလ်အောင်ကျော်တို့တုန်းကလဲ ဒီလိုပဲ နေမှာနော်“
ဒီစကားတွေကို ကျွန်မအားရပါးရ ထိုင်ပြောခဲ့တာက လေးတန်းဆရာမ ဒေါ်ခင်ငြိမ်း။ အဲဒီနေ့တုန်းက မြို့ထဲမှာ မွတ်စလင်- မြန်မာ တွေအကြားနားလည်မှုလွဲပြီး တိုက်ခိုက်မှုတွေရှိခဲ့တယ်။ ဒီတုန်းကတော့ ဒါတွေဟာ အရှိန်တညီးညီးဖြစ်နေတဲ့ လူထုအရေးတော်ပုံကြီးကို လမ်းလွှဲဖို့ အစိုးရရဲ့ ကြိုးပမ်းချက်ဆိုတာ မတွေးမိတတ်ခဲ့သေး။ အဲဒီနေ့က မိဘတွေကို ကလေးတွေ လာပြန်ခေါ်ခိုင်းတာမို့ အိမ်က လာအခေါ်ကို စောင့်နေရင်း ဆရာမနဲ့ စကားဖောင်ဖွဲ့နေခဲ့တာပါ။ လေးတန်းကာလမှာ ရှစ်လေးလုံးဖြစ်ခဲ့တာမို့ ဆရာမအတန်းမှာ နှစ်နှစ်နေခဲ့ရတယ်လို့ ဆိုနိုင်ပါတယ်။ ဒီတုန်းက ဘာတွေ ဖြစ်နေမှန်း သေချာ မသိပေမယ့် ကျွန်မမှာ စိတ်ဝင်စားလို့ မဆုံး။ လူအုပ်ကြီးတွေရဲ့ တို့အရေးအသံတွေ၊ တောင်ကြီးဘောလုံးကွင်းထဲက တရားဟောသံတွေက အိမ်ထဲကနေ ကြားနေရတယ်။ ဒီတုန်းက အိမ်မှာ ပါပလစ်ကာ ကားပိုလေးတစင်းရှိတယ်။ မောင်းရတာ ပေါ့ပေါ့ပါးပါးရှိလို့ဆိုပြီး တခါတလေ ကားမောင်းသမား မလာတဲ့အချိန် မေမေမောင်းတာ။ ကျွန်မက မြို့ထဲသွားရင် ကားနောက်ခန်းမှာပဲ တက်စီးတယ်။ ဈေးနား ကားရပ်ချိန်ဆို လက်ကမ်းစာစောင်၊ သတင်းစာတွေ အများကြီးရတာပဲ။ စစ်တပ်က အာဏာမသိမ်းခင်မှာပဲ ကျွန်မအိမ်မှာလဲ အာဏာသိမ်းပွဲဖြစ်တယ်။ ဆုံးသွားပြီဖြစ်တဲ့ အဖိုးရဲ့ အခန်းကို ကျွန်မအပိုင် သိမ်းလိုက်တာပါ။ စာအုပ်တွေ၊ သတင်းစာဟောင်းတွေ အများကြီးပဲ။ စာတွေဖတ်ရလွန်းလို့ ထမင်းမေ့၊ ဟင်းမေ့တောင်ဖြစ်တယ်။ တခြားကစားစရာတွေကို ကျွန်မ စွန့်ခွာလိုက်တယ်။ ကျွန်မရဲ့ ကစားစရာတွေက စာအုပ်တွေပဲဖြစ်လာတယ်။ စာအုပ်တွေကလဲ စုံမှစုံ။ အနာဂတ်သာသနာရေး၊ အရှေ့ဘက်မှ နေ၀န်းထွက်သည့်ပမာ၊ သူမ၊ စစ်နဲ့ ငြိမ်းချမ်းရေး။ ကျွန်မသိပ်ကြိုက်တဲ့ စာအုပ်တွေ။ ဒီတုန်းက ရဲရဲတောက် သီချင်းက သိပ်ခေတ်စားတာ။ ဗမာဆို ဓားကိုဆွဲလို့ ထွက်ဖို့တော်ပြီလေ။ ဆိုတဲ့ အသံကို ကြားရရင် ကြက်သီးမွေးညင်းတွေ ထလာတယ်။ အဖိုးဆီမှာရှိတဲ့ ဂျပန်ခေတ်က ဓားရှည်ကြီးကို သွားသွားမြင်မိတယ်။ အဖိုးမဆုံးခင်တုန်းက ဒီဓားကြီးတွေကို သံချေးမတက်အောင် တသသ ပွတ်တိုက်နေကြ။ ကျွန်မကလဲ ဘေးမှာ ထိုင်ပြီးကြည့်နေကြ။
ဒီလိုနဲ့ အာဏာသိမ်းပွဲဖြစ်လာတယ်။ ညသန်းခေါင်ယံမှာကြားရတဲ့ သေနတ်သံ ဆယ့်ခြောက်ချက်ကို မှတ်မိနေဆဲပဲ။ မေမေက တိုက်ပွဲများဖြစ်တာလား၊ တောင်ကြီးမြို့များ အစီးခံလိုက်ရပြီလားဆိုပြီး သေနတ်သံတွေကို လိုက်ရေတွက်ခဲ့တာကိုး။ နောက်တနေ့ မှာ ပူတင်းစားနေတုန်း သေနတ်သံတွေ ထပ်ကြားရပြန်တယ်။ မေမေ့မိတ်ဆွေက ဖုန်းဆက်တယ်။ ညနေ ဆေးခန်းမသွားပါနဲ့။ ပစ်နေကြပြီ။ ဖမ်းနေကြပြီတဲ့။ မေမေ့မိတ်ဆွေအများကြီးပဲ အဖမ်းခံရတာလဲ မှတ်မိပါသေးရဲ့။
ဒီလိုနဲ့ပဲ လေးတန်းမှာ နှစ်နှစ်ဆိုတော့ ဆရာမနဲ့ ပိုရင်းနှီးခဲ့တယ် ဆိုရမလားပဲ။ ကျောင်းပိတ်ချိန်တွေမှာလဲ ဆရာမဆီ ရောက်ဖြစ်ခဲ့တာကိုး။ ဒါပေမယ့် စည်းကမ်းပိုင်းနဲ့ ပတ်သက်ရင် ဆရာမက တခါမှ လျှော့မပေးခဲ့ဘူး။ ပိုပြီး အထုအထောင်းခံရတယ်။ ဒီတုန်းက အင်္ဂလိပ်စာမှာ verb တွေ အလွတ်ကျက်ရတယ်။ ဆရာမခေါ်လိုက်တဲ့ စကားလုံးကို ချရေးပြီးရင် past tense, present perfect tense တွေပါ ရေးရတယ်။ မှားရင် တလုံးမှားတချက်။ ကျွန်မကိုကျတော့ တလုံးမှား ငါးချက်ဆိုလို့ အသေကျက်လိုက်ရတာ မပြောပါနဲ့တော့။ သီတင်းကျွတ်မှာ သွားကန်တော့တုန်းက အင်္ဂလိပ်စာ သဒ္ဒါစာအုပ်သေးသေးလေး ငါးအုပ်ကို လက်ဆောင်ပေးတယ်။ ငါးတန်းမတက်ခင် ကျောင်းပိတ်တော့ ဒီစာအုပ်လေးတွေက ကျွန်မအတွက် သိပ်အဖိုးတန်လာတယ်။ ဒါလေးတွေကို လေ့ကျင့်ရင်း Readers Digest ထဲက စာလေးတချို့ကို မြည်းစမ်းတတ်လာခဲ့လို့ပါ။ နိုင်ငံခြားထွက်လာပြီး နောက်ပိုင်းမှာ အင်္ဂလိပ်စာလေးတွေ ရေးတိုင်း ဆရာမကျေးဇူးကို အမြဲသတိရနေတာ အသေအချာပါပဲ။
(၅)
ငါးတန်းရောက်တော့ ကျောင်းမှာ ထူးထူးခြားခြားလေးတွေ ဖြစ်လာတယ်။ အရင်တုန်းကလို ဆရာမတယောက်တည်းက မသင်တော့ဘူး။ အတန်းပိုင်ဆရာမ ဒေါ်မြသန်းက သင်္ချာသင်တယ်။ တခြားဘာသာရပ်မျိုးစုံမှာ ဆရာမတွေအများကြီးပဲ။ ဒီနှစ်မှာ မှတ်မှတ်ရရ ဘာမှတော့ သိပ်မရှိ။ စာအုပ်တွေနဲ့ ကျွန်မအလုပ်ရှုပ်နေတယ်။ ကျောင်းစာကိုလဲ သိပ်စိတ်မ၀င်စားတော့ဘူး။ သုံးတန်းတုန်းကလဲ ဒီမင်းတုန်းမင်း၊ သီပေါမင်းပါတော်မူတာတွေပဲ။ ငါးတန်းရောက်တော့လဲ ဒါတွေပဲဆိုတော့ ပျင်းလာတယ်။ ဒါနဲ့ပဲ လူကြီးသူမတွေမေးတော့ ဦးကုလားစာအုပ်ကို ညွှန်းကြတယ်။ ရှာဖတ်ဖြစ်တယ်။ မရောင့်ရဲနိုင်ဘူး။ ပြီးတော့ ကျွန်မက လွတ်လပ်ရေးရပြီးနောက်ပိုင်း သမိုင်းတွေ၊ ကမ္ဘာစစ်အကြောင်းတွေကို သိပ်စိတ်ဝင်စားနေတာ။ ဒါနဲ့ပဲ ကားမောင်းသမားတွေကို စာအုပ်အငှားဆိုင်တွေဆီ ပို့ခိုင်းတော့တာပဲ။ ဘာသာပြန်စာအုပ်တွေဆို သိပ်ကြိုက်တာပဲ။ မောင်ထွန်းသူ ဘာသာပြန်တာတွေ ဖတ်ဖြစ်တာများတယ်။ ကာကွယ်ရေးနဲ့ လူမှုရေး ဆေးပညာစာစောင်ဟောင်းတွေ၊ စစ်ပညာဂျာနယ်ဟောင်းတွေ၊ သွေးသောက်မဂ္ဂဇင်းဟောင်းတွေကိုလဲ ဆိုင်တွေရဲ့ ချောင်ကြိုချောင်ကြားက ရတတ်သေးတယ်။ ဒီစာအုပ်အငှားဆိုင်တွေက အစ်ကို၊ အစ်မတွေဟာ ကျွန်မရဲ့ ဆရာတွေလို့ဆိုရင်လဲ မမှားဘူး။ စာအုပ်ကောင်းတွေကို လမ်းညွှန်ပြကြတယ်။ ကျွန်မဖတ်ဖို့ဆိုပြီး ဆိုင်မှာ အငှားမတင်တဲ့ စာအုပ်တွေပါ ထုတ်ပေးတယ်။ ကျွန်မဘယ်လောက်များ အသည်းအသန်ဖြစ်နေလဲဆို ပုလင်းဝယ်၊ ဒန်ဝယ်သည်တွေကိုလဲ မိတ်ဖွဲ့ပြီး စာအုပ်ဟောင်းတွေ ပိဿာချိန်နဲ့ ရောင်းတဲ့လူတွေရှိရင် ၀ယ်ထားဖို့၊ ကျွန်မဈေးပိုပေးမယ်ဆိုတာ မှာရသေးတယ်။ ကျွန်မရဲ့ ကိုယ်ပိုင်စာကြည့်တိုက်လေးမှာ စာအုပ်လေးတွေများလာတယ်။
ခြောက်တန်းဆရာမတွေနဲ့ကတော့ မှတ်မှတ်ရရလေးတွေ ရှိတယ်။ အတန်းပိုင်ဆရာမက သင်္ချာဆရာမ ဒေါ်ခင်နုနု။ ဆရာမက အတော်ထက်တယ်။ ပြီးတော့ မေမေနဲ့အရမ်းရင်းနှီးနေတဲ့ မိတ်ဆွေတွေ။ ဒီတော့ ကျွန်မကို တော်တော်ဖိတယ်လို့ ဆိုရမယ်။ ကျွန်မကလဲ သင်ရိုးတွေဆို သိပ်စိတ်ဝင်စားတော့တာမဟုတ်ဘူး။ ကျောင်းမှာ ကျွန်မအဆင့်တွေက တရဟောကျနေတာပဲ။ သိပ္ပံဘာသာရပ်ကို ကျွန်မလုံးဝကို မကျက်ချင်တာ။ မနည်းကျိတ်မှတ်ကျက်ရတယ်။ တခြားဘာသာရပ်ဆရာမတွေက သူတို့ဘာသာမှာ ကျွန်မစာမရရင်လဲ အတန်းပိုင်ဆရာမကိုပဲ တိုင်ကြတာ။ ကျွန်မဆိုတာကလဲ ကဗျာတွေ စရေးနေပြီမို့ ဘယ်မဂ္ဂဇင်း ပို့ရင်ကောင်းမလဲပဲ တွေးနေတဲ့လူ။ ညနေကျရင် ဘာသာပြန်စာအုပ်ဖတ်မလား၊ ၀တ္ထုဖတ်မလား၊ မဂ္ဂဇင်းဖတ်မလားပဲ စဉ်းစားနေခဲ့တာ။ ဒီတော့ စိတ်လေနေတယ်ဆိုပြီး ဆရာမက ခဏခဏဆူ၊ ခဏခဏရိုက်။ နောက်ဆုံး ဆရာမနဲ့တင်မက ကျောင်းအုပ်ကြီးရုံးခန်းအထိ ရောက်တဲ့ ပြဿနာတခု တက်တော့တာပဲ။ ပြဿနာက ကုန်ဈေးနှုန်းပြဿနာ။
အဲဒီခြောက်တန်းနှစ်မှာက ကုန်ဈေးနှုန်းတွေ တော်တော်တက်တယ်။ ဆန်ဈေးတွေ အရမ်းတက်တော့မယ်ဆိုပြီး လူကြီးတွေ ပြောတာကြားတော့ ကျွန်မမနေနိုင်ဘူး။ ဒါနဲ့ ဆန်တွေ ဈေးတက်တော့မယ်။ ၀ယ်ထားကြဆိုပြီး လက်လှမ်းမှီရာ ကျောင်းသားကို ပြောတာပဲ။ ဒါကို ဘယ်သူက သွားချွန်တယ်မသိ။ နေရင်းထိုင်ရင်း နိုင်ငံရေးပြောတယ်တွေ ဖြစ်တော့တာပဲ။ အိမ်မှာလဲ လူကြီးတွေက စိုးရိမ်။ ကျောင်းမှာလဲ ဆရာမတွေက စောင့်ကြည့်တွေ ဖြစ်ကုန်တာ။ ဘာသာစုံဆရာမတွေ ၀ိုင်းပြီး ဖိကြတာနဲ့ စာပြန်လုပ်ဖြစ်သွားတယ်။ အဲဒီနှစ်က တကျောင်းလုံးမှာ အဆင့်နှစ်လားမသိဘူး။ ဘာပဲဖြစ်ဖြစ် ကျောင်းစာမှာလဲ မလစ်ဟင်းအောင် လုပ်ပေးခဲ့တဲ့ ဆရာမတို့ကို အမြဲကျေးဇူးတင်နေရပါတယ်။
(၆)
ခြောက်တန်းနှစ်ကနေ ခုနစ်တန်းနှစ် အကြား နွေရာသီရောက်တော့ ကျွန်မဘ၀မှာ အပြောင်းအလဲ တခုဖြစ်လာတယ်။ ကျွန်မရဲ့ စာဖတ်ဝါသနာကို သိနေတဲ့ မေမေက တောင်ကြီးပြန်ကြားရေးနဲ့ ပြည်သူ့ဆက်ဆံရေးက စာကြည့်တိုက်ကို ခေါ်သွားပေးတာပါ။ ကောင်းတာလဲ ရှိသလိုဆိုးတာလဲရှိပါတယ်။ ကောင်းတာကတော့ အဲဒီမှာ ၁၉၅၀ကာလကနေ ၁၉၈၈ ကာလအထိကြားက ထုတ်တဲ့ ၀တ္ထုတွေ၊ စာစောင်တွေ အများကြီး ရှိနေတာပဲ။ ဆိုးတာကတော့ ဒီစာအုပ်တွေက ချောင်ကြိုချောင်ကြားမှာရှိနေပြီး၊ သတင်းနဲ့ စာနယ်ဇင်းက ထုတ်တဲ့ စာအုပ်တွေက စင်တွေပေါ်မှာ ရှိနေတာပဲ။ ဒီတုန်းကတော့ ဘယ်စာကောင်းတယ်၊ မကောင်းဘူးဆိုတာ ဘယ်သိပါ့မလဲ။ စာအကုန်မရွေးတတ်ခင်မှာဆိုတော့ ဒီစာအုပ်တွေလဲ ဖတ်ဖြစ်တာပဲ။ ဒါပေမယ့်လဲ ဒီလိုဖတ်ဖြစ်တာမှာ အကျိုးတခုတော့ထွက်လာတယ်။ ဒီစာတွေက တဘက်သတ်ရေးတာများတော့ တခြားတဘက်ကို စိတ်ဝင်စားလာတာ၊ သိချင်လာတာပဲ။ ဥပမာ- တပ်မတော်သမိုင်း ပထမတွဲကို ဖတ်ပြီးနောက်ပိုင်းမှာ ကျွန်မအင်္ဂလိပ်စာကို ကျွမ်းကျွမ်းကျင်ကျင် သိပ်တတ်ချင်လာတယ်။ မြန်မာဘက်က ရေးတာကတော့ ဟုတ်ပြီ။ ဒီလိုတွေ။ ဒီအကြောင်းအရာတွေကိုပဲ အင်္ဂလိပ်ဘက်က ရေးရင်ရော။ ဘာတွေဖြစ်မလဲ။ ဒီအထဲမှာမှ ဘယ်ဟာက အမှန်တရားတွေလဲ။ ဘယ်ဟာက လိုရာဆွဲရေးတာတွေလဲ စတာမျိုးတွေပါ။ ပြည်တွင်းသောင်းကျန်းမှုသမိုင်းဆိုတာတွေ ဖတ်မိတော့လဲ ဒီအထဲမှာ ညွှန်းဆိုထားတဲ့ တခြားအဖွဲ့အစည်းတွေကို သိပ်စိတ်ဝင်စားမိလာတယ်။ ဒီထဲက သုံးနှုန်းတဲ့ သောင်းကျန်းသူဆိုသူတွေကို တွေ့ချင်လာတယ်။ အဓိကကတော့ သူတို့ဘက်ကရော ဒီသမိုင်းကို ဘယ်လိုမြင်လဲ။ ဒါကို ကျွန်မသိချင်လာတာ။ (အခုတော့ သိပြီလို့ဆိုရမယ်။ ဘာလို့လဲဆို ကျွန်မဒီတော်လှန်ရေးမှာ ပါနေခဲ့ပြီကိုး။ ဘယ်သူက သောင်းကျန်းနေတာတုန်းဆိုတဲ့ အမှန်တရားကို တွေ့နေရပြီ) ဘယ်လိုပဲဖြစ်ဖြစ် အဲဒီတုန်းက ၀ိရောဓိ၊ ၀ိဝါဒဆိုတဲ့ စကားလုံးလေးတွေ ကျွန်မ ကဗျာတွေထဲမှာ ခဏခဏပါနေခဲ့တယ်။ ကျွန်မစိတ်ရှုတ်ထွေးနေခဲ့တယ်။ ဘယ်သူကမှန်ပြီး၊ ဘယ်သူက မှားမှန်း ဝေခွဲလို့ကို မရဘူး။
ခုနစ်တန်း၊ ရှစ်တန်း ကာလတွေမှာကျတော့ ကျွန်မရဲ့ ကဗျာ၊ စာစုလေးတွေ ဟိုနားဒီနားမှာ ပါလာတယ်။ တို့ကျောင်းသား၊ မင်္ဂလာမောင်မယ်၊ ရွက်နုဝေ၊ မှုခင်းမဂ္ဂဇင်း စတာတွေမှာပါ။ ဒီနှစ်တွေက ဆရာမတွေက ကျွန်မရဲ့ စာပေ၀ါသနာကို တွန်းအားပေးခဲ့တဲ့ ဆရာမတွေပါ။ ကျွန်မရဲ့ မတောက်တခေါက် စာလေးတွေပါတဲ့ စာစောင်တွေဆို ဆရာမ အခန်းမှာကို ထားပြီး ကြော်ငြာပေးခဲ့ကြတယ်။ ပုံနှိပ်မဟုတ်တဲ့ ၀တ္ထုလေးတွေကိုလဲ ဖတ်ပြီး အားပေးခဲ့ကြတာ။ ကျွန်မနဲ့ ဆရာမတွေနဲ့ သိပ်တည့်တာပဲ။ ကျောင်းစာသင်ချိန်မဟုတ်တဲ့ အချိန်လေးတွေဆို ဆရာမတွေဆီ ရောက်ရောက်နေတတ်တယ်။ ဆရာမတို့နဲ့ ကျွန်မနဲ့က Deal လုပ်ထားသလိုဖြစ်နေတယ်။ ဆရာမတို့လိုချင်တာက အဆင့်မကျဖို့၊ အမှတ်ပေါင်း မကျဖို့။ ဒါတွေ မဖြစ်ဘူးဆိုရင် ကျွန်မလုပ်တာတွေအားပေးတယ်ဆိုတဲ့ အခြေအနေမျိုး။ ကျွန်မကလဲ ကျောင်းသူသာဆိုရမယ်။ ကျောင်းမှာတောင် အမြဲမရှိဘူး။ ကျောင်းကပေးတဲ့ တာဝန်တွေနဲ့ အပြင်ရောက်ချင်ရောက်နေတာ။ ကျောင်းကပေးတဲ့ တာဝန်ဆိုလို့ ထူးထူးဆန်းဆန်းတွေတော့ မဟုတ်ဘူး။ ကျွန်မတို့ကျောင်းဆိုတာက စာကြမ်းပိုးကျောင်း။ တကုတ်ကုတ်နဲ့ ကျောင်းစာပဲ ကျက်နေကြ၊ အမှတ်ပဲ ပြိုင်နေကြတာ။ ဒီလိုကျောင်းမျိုးမှာ ပြင်ပစာတွေ စိတ်ဝင်စားတဲ့ ကျွန်မကို ဆရာမတွေ သတိထားမိတော့တာပေါ့။
ဒီတော့ တနှစ်ပတ်လည်လုံးကျင်းပတဲ့ ပွဲမှန်သမျှ ကျွန်မချောဆွဲခံရတော့တာပဲ။ ဒီတုန်းက ကျွန်မက အရာရာကို လေ့လာစူးစမ်းနေသူပဲ ရှိသေးတယ်။ နိုင်ငံရေးနဲ့ ပတ်သက်ပြီး ဗဟုသုတသာရှိပေမယ့် တရားမျှတမှု၊ ယုံကြည်ချက်၊ ရပ်တည်ချက်တွေကို မသိသေးဘူး။ ဒီတော့ပြိုင်ပွဲတွေမှာ ပါဖြစ်ခဲ့တယ်။ တပ်မတော်ရဲ့ အစဉ်အလာကောင်းဆယ့်နှစ်ရပ် အချက်တွေကို စာစီစာကုံးတိုင်းမှာ ထည့်ရေးဖြစ်ခဲ့ဖူးတာပဲ။ နောက်ပိုင်းမှာ ဒီအစဉ်အလာတွေကို တပ်မတော်က မထိန်းသိမ်းပါလားဆိုတာ မျက်မြင်ကိုယ်တွေ့တွေ၊ မှတ်တမ်းတွေအရ သိလာရတဲ့အခါ ကျွန်မရင်ထဲ ဘယ်လိုနေမလဲ စဉ်းစားသာကြည့်ပါတော့။ ဒီတုန်းက အတန်းချိန်မဟုတ်ပဲ အတန်းထဲကို မြန်မာဆရာမများ မ၀င်လာလိုက်နဲ့။ ဆရာမက ဘာပြိုင်ပွဲဆိုတာ မပြောရသေးဘူး။ သူငယ်ချင်းတွေက ခင်မမမျိုးလို့ အော်တော့တာပဲ။ ကျောင်းနံရံကပ်စာစောင်မှာလဲ ကျွန်မတာဝန်ယူဖြစ်လာခဲ့တယ်။ မြို့နယ်ပညာရေးရုံး၊ ပြည်နယ်ပညာရေးရုံးတွေမှာ ကျွန်မနာမည် ပေါက်လာတယ်။ By name နဲ့ ပညာရေးရုံးတွေက ပွဲတောင်းမှုတွေ ရှိလာတယ်။
ဘယ်လိုပဲဖြစ်ဖြစ် ကျွန်မရဲ့ စာဖတ်ဝါသနာ၊ စာရေးဝါသနာတွေကို မြေတောင်မြှောက်ပေးခဲ့တဲ့ ဆရာမဒေါ်နော်စာထူး၊ ဒေါ်ခင်သန်းထူး၊ ဒေါ်ခင်နှင်းရီနဲ့ ဘာသာရပ်ဆရာမတွေအားလုံးကို ကျွန်မအမြဲ ကျေးဇူးတင်နေမိမှာ အမှန်ပါပဲ။
(၇)
ကိုးတန်း၊ ဆယ်တန်းကာလတွေဟာ ကျွန်မအတွက် နိုင်ငံရေးအယူအဆနဲ့ ရပ်တည်ချက်ဆိုင်ရာတွေမှာ အားပြိုင်မှုတွေဝင်လာခဲ့တဲ့ နှစ်တွေပဲဖြစ်တယ်။ သတင်းနဲ့ စာနယ်ဇင်းက စာအုပ်တွေလဲ ဖတ်ဖြစ်သလို၊ ဆိုရှယ်လစ်ခေတ်က စာအုပ်တွေလဲ တမင်ကို စုဆောင်း ဖတ်မိလာခဲ့တယ်။ ကွန်မြူနစ်စာပေတွေနဲ့ ရင်းနှီးလာခဲ့သလို အရင်းရှင်စနစ်အကြောင်းတွေ၊ ကမ္ဘာပြုဖြစ်စဉ်တွေ၊ အေအိုင်ဒီအက်စ်နဲ့ ကမ္ဘာ့ကျန်းမာရေး၊ ဘီစီစီအိုင် အရှုပ်တော်ပုံ၊ ဆင်းရဲနွမ်းပါးမှု ပပျောက်ရေး စတာတွေကို ပိုပိုပြီး စိတ်ဝင်စားလာတယ်။ အဲဒီမှာ စာပေ၀ိုင်း တခုနဲ့ ကျွန်မအဆက်အသွယ်ရလာတယ်။ အဲဒီအချိန်က ကန့်သတ်စာအုပ်တွေ၊ ရှားပါးစာအုပ်တွေကို ပေးဖတ်ခဲ့ကြသူတွေကို ကျွန်မသိပ်ကျေးဇူးတင်မိတာပဲ။ စာအုပ်တွေထဲကနေ ကျွန်မရင်ထဲကို ရုရှားက သူရဲကောင်းမလေး ဇိုယာရောက်လာအောင် သူတို့ ထည့်ပေးနိုင်ခဲ့ကြတယ်။ အဓိကက သူမရဲ့ ရဲဝံ့ပြတ်သားတဲ့ စိတ်ဓာတ်။ တညလုံး ညှဉ်းပမ်းနှိပ်စက်ခံရပြီး လည်ပင်းမှာ ကြိုးကွင်းစွပ်ထားခံရတဲ့ အခြေအနေကို တည်တည်ငြိမ်ငြိမ်နဲ့ ရင်ဆိုင်ပြီး၊ ယုံကြည်ချက်ကို မဖောက်မပြန်ပဲ ပြောသင့်တာ ပြောခဲ့တဲ့ အမျိုးသမီးငယ်လေးတယောက်။ သူမဟာ ကျွန်မရဲ့ မမြင်နိုင်တဲ့ ဆရာသမား။ ကျွန်မဘ၀မှာ ကြီးမားတဲ့ အခက်အခဲတချို့ ကြုံလာရတဲ့ အခါတိုင်းမှာ၊ အားလျော့လာတဲ့အခါတိုင်းမှာ ကျွန်မလည်ပင်းကို ပြန်စမ်းကြည့်မိတတ်တယ်။ “ငါ့လည်ပင်းမှာ ကြိုးကွင်းစွပ်ခံထားရတဲ့ အခြေအနေမဟုတ်ဘူး။ မိနစ်ပိုင်းအတွင်းမှာ သေဆုံးတော့မယ်ဆိုတာ သေချာနေတာမဟုတ်ဘူး။ ဒီအခက်အခဲလောက်က မှုစရာမှမဟုတ်တာ“ ဆိုတဲ့ အားအင်တွေကို ကျွန်မကို ပေးနေတတ်တဲ့ ဆရာမလေးတယောက်လို့ ဆိုရမယ်။
ဒီကာလတွေမှာ ကျောင်းမှာလဲ စည်းကမ်း၊ ၀ါသနာ၊ ရည်မှန်းချက်တွေကို မျှမျှတတဖြစ်အောင် ပြုပြင်ဆုံးမပေးခဲ့တဲ့ ဆရာမတွေနဲ့ ထပ်ကြုံတွေ့ရပါတယ်။ ဒီတုန်းက ကိုးတန်းဆရာမတွေက သူ့တပည့်တွေနဲ့အတူ ဆယ်တန်းလိုက်တက်၊ ဆယ်တန်းဆရာမတွေက ကိုးတန်းပြန်ဆင်းနဲ့ လုပ်ထားတဲ့ သင်ကြားရေးပုံစံဖြစ်တာကြောင့် နှစ်နှစ်လုံး လုံး ဆရာမတို့တွေနဲ့ ကြုံခဲ့ရတာပါ။ ဒီတုန်းက အတန်းပိုင်ဆရာမက သင်္ချာဆရာမ ဒေါ်တင်မာညွန့်။ ဆရာမက အိမ်စာပေးရင် သိပ်အပေးကြမ်းတယ်။ ပုစ္ထာတွေအများကြီးကို သင်ရိုးကိုင်ပြီး တရစပ်ပေးတာပါ။ တခါတလေလဲ မေးခွန်းဟောင်းတွေ။ ကျွန်မဆိုတာကလဲ စာကြမ်းပိုးဆိုပေမယ့် ကျောင်းစာကြမ်းပိုးမဟုတ်။ တနေ့နေလို့မှ အနည်းဆုံး စာစောင်လေးတခုမှ မကိုင်ရရင် စိတ်ထဲမှာ တနေ့တာလုပ်ငန်းပြီးတယ်လို့ကို မထင်သူ ဖြစ်နေလေတော့ အတော်ကိုခက်ပါတယ်။ ပြီးတော့လဲ ကျွန်မက ပုစ္ထာဟောင်းတွေ ထပ်တလဲလဲ တွက်ချက်ချင်သူမဟုတ်။ အသစ်တွေလိုက်ရှာနေတဲ့သူ။ နိုင်ငံရပ်ခြား သင်္ချာပုစ္ထာမေးခွန်းလေးတွေပါ လိုက်တွက်ကြည့်နေသူ။ ဒီတော့ ဆရာမပေးတဲ့ အိမ်စာက မပြီးနဲ့မို့ ခဏခဏပြစ်ဒဏ်ခံရပါတယ်။ ကျောက်သင်ပုန်း သုတ်တဲ့ အ၀တ်နဲ့ ကျွန်မခေါင်းပေါ်ဖုန်ခါတဲ့ ပြစ်ဒဏ်ပါ။ တခေါင်းလုံးကို ဖြူဖွေးသွားပါရော။ ဒါပေမယ့် ကျွန်မသူငယ်ချင်းလေးတွေက သိပ်ချစ်ဖို့ကောင်းပါတယ်။ ပြီးရင် ပြန်ခါပေးကြပါတယ်။
အင်္ဂလိပ်စာဆရာမ ဒေါ်တင်ညွန့်ရည်ကျတော့ ကျွန်မက နည်းနည်းကြောက်ပါတယ်။ သူက ကြိမ်လုံးသုံးတတ်သူမို့ပါ။ ပိုဆိုးတာက ရိုက်မယ်ဆိုရင် ဆရာမ တွေ နားနေခန်းကနေ တုတ်သွားယူခိုင်းတတ်တာမျိုးပါ။ ဒီတုန်းက ကျွန်မကလဲ ဆရာမတွေအကြား နည်းနည်း ရေပန်းစားနေလေတော့ ဆရာမ တစ်ရာကျော်ရဲ့ နားနေခန်းထဲဝင်ပြီး၊ တွေ့တဲ့ ကိုယ့်အတန်းဆရာမဆီ တုတ်သွားတောင်းရတာကို စိတ်ထဲ အောင့်သက်သက်။ ဒီလိုနဲ့ပဲ စာလုပ်ဖြစ်သွားပါတော့တယ်။ မြန်မာစာဆရာမကျတော့ ကျွန်မကို သိပ်အလိုလိုက်သူပါ။ မြန်မာစာဆရာမတွေနဲ့ ကျွန်မနဲ့ တော်တော် ရင်းနှီးလေ့ရှိပါတယ်။ သမိုင်းဆရာမ ဒေါ်ကြည်ဝင်းကျတော့ ကျောင်းစာသင်ခန်းပြင်ပမှာ ကျွန်မကိုမြင်ရင် အမြဲပြုံးပြုံးသွားပါတယ်။ ကျွန်မကလဲ သူ့ကို မတွေ့လိုက်နဲ့။ သမိုင်းကြောင်းတွေ အတင်းလိုက်ဆွေးနွေး။ ပြီးတော့ လပတ်စာမေးပွဲတွေမှာ ဖတ်စာအုပ်ထဲက စာတွေ ကျွန်မဖြေနေတာ မဟုတ်ဘူးဆိုတာ ကျွန်မတို့ နှစ်ယောက်ပဲ သိခဲ့ကြတဲ့ ကိစ္စ။ ဆရာမကလဲ အမှတ်လျှော့ပါတယ်။ ကျွန်မကလဲ မရဘူး။ သမိုင်းကို ကျွန်မက ကျက်တာမှ မဟုတ်။ မေးခွန်းလာရင် ကိုယ်သိတာတွေ ချရေးတာကိုး။
ပထ၀ီဆရာမကျတော့ ကျွန်မကို ခဏခဏရိုက်ရပါတယ်။ ကျွန်မက စစ်ပွဲမြေပုံတွေပဲ စိတ်ဝင်စားတာ။ သင်ရိုးထဲက မြေပုံတွေကို စိတ်ဝင်စားတာ မဟုတ်။ ဒီတော့ ဘယ်တော့မှလဲ အိမ်စာပေးဆွဲခိုင်းတဲ့ မြေပုံတွေကို ဆွဲလေ့ဆွဲထမရှိပါ။ အီကိုဆရာမနဲ့ကျတော့လဲ ဒီလိုပါပဲ။ ဆရာမက အလွတ်ကျက်ပြီး ပြန်ခိုင်းလေ့ရှိပါတယ်။ ကျွန်မက စာအလွတ်ကျက်တာမှာ ပါရမီအတော်နည်းတဲ့သူပါ။ အကြောင်းအရာ၊ အချက်အလက်ကိုပဲ ဖတ်ချင်တဲ့သူ၊ ပြီးရင်လဲ ဒီအချက်အလက်တွေကို အသေးစိတ် ထပ်ချဲ့ပြီး သိချင်တဲ့ လူစားမျိုးပါ။ ဒီတော့ ကျွန်မစာမကျက်ဘူးဆိုပြီး ဆရာမကလဲ ဂရုဏာဒေါသနဲ့ အပြင်းအထန် ဆုံးမပါတော့တယ်။
ဓာတု၊ ဇီဝ၊ ရူပ ဘာသာတွေကျတော့ အမှတ်တွေအများကြီး ရနိုင်တဲ့ ဘာသာတွေဖြစ်လို့ ကျွန်မလဲ စိတ်ထဲက မပါပေမယ့် အဓိကထားပြီး ကျက်မှတ်ခဲ့ရပါတယ်။ မချစ်ပေမယ့် အောင့်ကာနမ်းဆိုတာ ဒါမျိုးပဲ ဆိုရမှာပါ။ လုံးဝစိတ်မ၀င်စားပဲ လေ့လာကျက်မှတ်ခဲ့ရတာပါ။ စာကျက်ဖြစ်ပေမယ့် စိတ်မ၀င်စားတော့ စာသင်ချိန်ဆို ကျွန်မအိပ်ငိုက်ပါရော။ ဓာတုဗေဒဆရာမ ဒေါ်စိုးစိုးနိုင်က “ဟေ့။ ဒီအခန်းထဲမှာ ခင်မမမျိုး ရှိသေးရဲ့လား“ လို့ အော်မေးရတဲ့ အထိပါ။ တကယ်တော့ ကျွန်မက ရှေ့ဆုံးမှ ထိုင်နေတာ။ နောက်က သူငယ်ချင်းတွေ အတင်းလှမ်းတွန်းမှ နိုးလာတယ်။ ဆရာမက အပြစ်မယူပါဘူး။ တတန်းလုံးကလဲ ၀ိုင်းရီနေကြလို့ အိပ်ချင်တောင် ပြေသွားခဲ့ရဖူးပါရဲ့။
ကျွန်မတို့တုန်းက ပညာရေးစမ်းသပ်နေတဲ့ ကာလမို့ မဆီမဆိုင် ကိုးဘာသာကို ငါးဘာသာ ပေါင်းပြီး သင်ရတဲ့ ခေတ်ပါ။ ဒီလိုပညာရေးမျိုးနဲ့ ကံကောင်းလို့ ကျွန်မတို့ သူငယ်ချင်းတွေ ဟိုမရောက်၊ ဒီမရောက် တွေ ဖြစ်မကုန်ကြတာပါ။ ဘယ်ဘာသာမှလဲ သေသေချာချာမသိနဲ့ သိပ္ပံစာအုပ်ပဲကိုင်ရမလို၊ အီကိုပဲ ထိုင်ဖတ်ရမလိုနဲ့ တော်တော်ဆိုးတဲ့ကာလပါ။ သင်ရိုးတွေကလဲ အစီအစဉ်တကျ လျှော့ထားတာမဟုတ်ပဲ ရှေ့နှစ် တွေကနေ ကောက်သင်းကောက်ထားတာမို့ ကြားမှာ သဘောတရားတွေက အဆက်ပြတ်နဲ့။ ရှုပ်ယှက်ကို ခတ်နေတာပါပဲ။ ဒီလိုအခြေအနေမျိုးမှာ ကျွန်မတို့ ဆယ်တန်းစီ တခန်းလုံး တန်းလုံးကျွတ် သိပ္ပံဂုဏ်ထူးပါအောင် သင်ပေးခဲ့ကြတဲ့ ဆရာမတွေရဲ့ ကျေးဇူးက အတော်ပဲ ကြီးမားလှပါတယ်။
(၈)
“ဒီကိစ္စက အထက်က နာမည်နဲ့ တောင်းဆိုလာတာ။ မလုပ်လို့ မဖြစ်ဘူး“
ဒီစကားကို ဆိုလာသူက ကျောင်းအုပ်ဆရာမကြီး ဒေါ်အေးချစ်။ ဆယ်တန်းကာလ နံနက်ပိုင်း သင်္ချာအချိန်မှာ ရုံးခန်းက ခေါ်တယ်ဆိုလို့ ရောက်သွားတော့ တပ်မတော်နေ့ ကျပန်းစကားပြောပြိုင်ပွဲမှာ ၀င်ပြိုင်ဖို့ ဆိုလာတာ။ ဒီတုန်းက ဆယ်တန်းစာမေးပွဲ ဖြေဆိုခွင့် ဖောင်တွေတောင် တင်ချိန်နီးနေပြီ။ ကျွန်မရဲ့ ခေါင်းထဲမှာလဲ ကျောင်းစာပဲ စိတ်ဝင်စားတော့တဲ့ကာလ။
“သမီး စိတ်မ၀င်စားတော့ဘူး ဆရာမကြီး။ ဒီကိစ္စတွေ တခန်းရပ်လိုက်ပြီ“
“အဲလိုလုပ်လို့ မရဘူးလေ။ နာမည်နဲ့ တောင်းလာတာ“
“အဲဒီနာမည်နဲ့ဆိုတာကို စိတ်ညစ်တာ ဆရာမကြီး။ နဖားကြိုးထိုးနေတာ“
“ဘာပြောတယ်“
ကျွန်မရဲ့ မှတ်ချက်အဆုံးမှာ ဆရာမကြီး ဆတ်ခနဲ ဖြစ်သွားတာ သတိထားလိုက်မိတယ်။ ထိုင်ပြီးပြောနေရာက မတ်တပ်ရပ်တယ်။ ကျွန်မကို မျက်လုံးပြူးကြည့်တယ်။
“မနှစ်တုန်းကလဲ ဒီလိုပဲ ကျောင်းသူအနေနဲ့ပါတာပဲ ဆရာမကြီး။ ဒါကို ပွဲမတိုင်ခင်မှာ ကြံ့ခိုင်ရေးတံဆိပ်တွေ လာပေးကြတယ်။ သမီးက အသင်းဝင်ထားတာမှမဟုတ်တာ။ ဒါပေမယ့် ဒီတံဆိပ်တွေကြီးတွေနဲ့ ပြောခိုင်းဆိုခိုင်းတော့ အခုအသင်းဝင်တွေလိုဖြစ်နေပြီ။ သမီးတင်မကဘူး။ တခြားပြည်နယ်နဲ့တိုင်းက သမီးလိုကျောင်းသူကျောင်းသားတွေလဲ ဒီအတိုင်းပဲ။ တခြား ကျောင်းသားတွေက လှောင်တာခံရတယ်။ ပိုဆိုးတာက ကျုံးသွင်းတာပဲ“
“ဘာ“
“ကိုးတန်း၊ ဆယ်တန်းကျောင်းသားတွေကို ကျောင်းကနေဆင့်ခေါ်၊ ပြိုင်ပွဲဝင်ခိုင်း၊ တံဆိပ်တပ်ပေး။ ဗဟိုအဆင့်ပြိုင်ပွဲမတိုင်ခင်မှာ စစ်တပ်တွေထဲခေါ်။ ကမ့်တွေသွင်း။ အစိုးရယန္တရားလည်ပတ်ပုံတွေ လာပြော။ဝန်ကြီးပေါင်းစုံက လာတွေ့။ လူကြီးတွေ ပြောခိုင်းတဲ့ အချက်တွေဆိုပြီး ပါအောင်ပြောခိုင်းတာတွေကို ဆိုလိုတာပါဆရာမကြီး။ ဒါနဲ့လဲ မပြီးသေးဘူး။ ကိုယ့်အိမ်ပြန်ရောက်တော့လဲ အိမ်ကို စာအုပ်တွေ လာလာပို့နေကြတယ်“
“ကောင်းတာပဲမဟုတ်ဘူးလား။ သမီးလဲ ဒါတွေ စိတ်ဝင်စားတာပဲ“
“မတူဘူးဆရာမကြီး။ သမီးစိတ်ဝင်စားတာက သမိုင်းကို စိတ်ဝင်စားတာ။ ဒီလိုလုပ်ဖို့မဟုတ်သေးဘူး။ သမီးကိုယ်တိုင်ပဲ ဆုံးဖြတ်ချင်တယ်။ ဒါပေမယ့် အခု သမီးဆယ်တန်းပဲရှိသေးတယ်။ အခုက တိုင်း၊ စစ်ဌာနချုပ် ပွဲတွေကို ခေါ်တဲ့အထိ ဖြစ်နေတယ်။ စစ်ရေးပြအခမ်းအနားတွေမှာဖိတ်၊ တိုင်း၊ တပ်မမှူးတွေနဲ့ နေ့လည်စာစားခိုင်း၊ ညစာစားပွဲတွေတက်ရနဲ့ စာကျက်လဲပျက်တယ်”
ပြောရင်းနဲ့ ကျွန်မအသံတွေ တုန်လာခဲ့တယ်။ ဒီအချိန်တုန်းက ကျွန်မက ဒီမိုကရေစီ နိုင်ငံရေးသမားတွေဆိုတဲ့ အသိနဲ့ ခင်မင်ရင်းနှီးရမယ့်လူတွေ တွေ့ဖူးသေးတာ မဟုတ်ဘူး။ စာပေ၀ိုင်းတွေက အစ်ကိုကြီးတွေကိုတော့ နိုင်ငံရေးသမားတွေများလားလို့ ထင်မိသေးတယ်။ သူတို့ကလဲ ဖွင့်မပြောဘူး။ စာအုပ်တွေပဲ တအုပ်ပြီးတအုပ် ပေးဖတ်နေကြတာ။ (နောက်ပိုင်း သူတို့အဖမ်းခံရပြီး ထောင်ကျသွားတော့မှ သူတို့အကြောင်း သေချာသိရတယ်။ ဘယ်လိုပဲဖြစ်ဖြစ် ကျွန်မကို လမ်းမှန်ပေါ် မသိမသာ တွန်းပို့ပေးခဲ့သူတွေကို ကျေးဇူးတင်နေမိဆဲပါပဲ) ဒီတုန်းကတော့ ကျွန်မပတ်ဝန်းကျင်မှာ နိုင်ငံရေးသမားတွေ လဲရှိနေတယ်ဆိုတာ ဘယ်သိပါ့မလဲ။ ကျွန်မပတ်ဝန်းကျင်မှာ ရှိနေ၊ တွေ့ထိနေရတဲ့ အသိုင်းအ၀ိုင်းတွေက စစ်ဘက်က လူတွေများတယ်။
ဒါပေမယ့် သူတို့ ဆက်ဆံနေတဲ့ ပုံစံတွေက၊ အခြေအနေတွေက ကျွန်မမျှော်လင့်ထားသလို မဟုတ်ဘူး။ တောင်ကြီးမြို့ရဲ့ မင်္ဂလာပွဲ၊ အလှူပွဲများစွာမှာ လူကြီးမိဘတွေနဲ့ သွားဖူးခဲ့စဉ်တွေတုန်းက တချိန်ကျရင် ကိုယ့်ကို တိုက်ရိုက်ဖိတ်ကြားတဲ့ ဖိတ်စာတွေကို ကျွန်မမျှော်လင့်ခဲ့ဖူးတယ်။ ဘယ်သူနှင့် မိသားစုဆိုတာထက် ကျွန်မနာမည်နဲ့ တိုက်ရိုက်လာတာမျိုးပါ။ မိသားစုဆိုတဲ့ စကားလုံးတွေနဲ့သွားရတာ မှီခိုပြီး လိုက်သွားရတဲ့ သဘောပေါက်နေလို့။ ဒါပေမယ့် အသက် ဆယ့်ခြောက်နှစ်ကာလမှာ ကျွန်မဆီကို ပထမဆုံးရောက်လာခဲ့တဲ့ အမည်ရှေ့မှာ ဒေါ်တပ်ထားတဲ့ ဖိတ်စာကတော့ ကျွန်မကို တုန်လှုပ်သွားစေခဲ့ဖူးပါတယ်။ နေရာက သံလွင်ခန်းမ၊ အရှေ့ပိုင်းတိုင်းစစ်ဌာနချုပ်။ ကျွန်မသိပ်စိတ်ရှုတ်ခဲ့ရတယ်။ ငယ်စဉ်က အဖိုးဆီကကြားခဲ့ဖူးတာတွေ၊ မိသားစုနဲ့ ရင်းနှီးတဲ့ တောင်ကြီးမြို့က ရှေ့မှီနောက်မှီ နိုင်ငံရေးသမားဟောင်းကြီးတွေနဲ့ တွေ့ရင် ပြောနေကြတဲ့ စကားတွေ၊ စာအုပ်တွေထဲမှာ သိသိသာသာကွဲပြားနေတဲ့ အယူဝါဒတွေ၊ ဟိုတမျိုး၊ ဒီတမျိုးဖြစ်နေတဲ့ သမိုင်းတွေ။ အကုန်လုံးရောနေတယ်။ ဘယ်လိုပဲဖြစ်ဖြစ် ဆယ်တန်းဖြေပြီးရင် အချိန်ယူပြီး လေ့လာဖို့ကိုတော့ ကျွန်မတွေးနေမိခဲ့ပြီ။
“အင်း၊ ဆက်ပြော“
ဆရာမကြီးက ပြန်ထိုင်ပြီး မေးဆတ်ပြတယ်။
“ဟိုတလောက ကျူရှင်အပြန်မှာ သမီးရဲ့ ဒရိုင်ဘာ ကားတိုက်မှုဖြစ်တယ်ဆရာမကြီး။ ဟိုဘက်က ဆိုင်ကယ်။ ဆိုင်ကယ်သမား လက်ထိသွားတယ်။ ယာဉ်ထိန်းရဲရောက်လာတယ်။ မှားတာ သမီးတို့ဘက်ကမှားတာ။ သမီးက လျော်ပေးမယ်ညှိတယ်။ မကြာခင်မှာပဲ တခြားဆိုင်ကယ်တချို့ရောက်လာတယ်။ ကတ်တွေပြပြီး ဆိုင်ကယ်သမားကို သွားခိုင်းလိုက်ကြတယ်“
အခြေအနေအကြောင်းစုံကို ကျွန်မဆက်ရှင်းပြပါတယ်။ ဒီတုန်းကတော့ ကျွန်မဆီမှာ စိုးရိမ်စိတ်ကလဲ ၀င်နေတယ်။ ကျွန်မကားမောင်းသမား ဆိုတာကလဲ ပျော့စိပျော့ညက်။ တခုခုဆိုရင် ကျွန်မကပဲ ဦးလေးဘာလုပ်၊ ညာလုပ်ဆိုရတာ။ လူတွေများ ချရင် ကျွန်မကတောင် သူ့ကို ပြန်ပြီး ကာကွယ်ပေးရင် ပေးရဦးမလားမသိ။ ပြီးတော့ဆယ်တန်းကျူရှင်ချိန်တွေဆိုတာက ကမောက်ကမ။ တချို့ညနေဆို ခုနစ်နာရီကျော်မှ ပြီးတာ။ စုပြီး ၀ိုင်းရိုက်ရင် မခက်ဘူးလား။ ဖြစ်သွားခဲ့တာကလဲ တရားမှ မတရားတာပဲ။ သူများကို ဒီလို မတရားလုပ်လိုက်သလို ဖြစ်သွားတာလဲ စိတ်ထဲမှာ အားမလိုအားမရဖြစ်မိတယ်။
“ခင်မမမျိုး။ ဒါတွေက သူတို့ကို ငြင်းဖို့ အကြောင်းပြချက် ခိုင်လုံတာမှ မဟုတ်တာ“
“ဘယ်လိုပဲဖြစ်ဖြစ်၊ ဒီတခါတော့ ငြင်းပါရစေ ဆရာမကြီး။ သမီးရှေ့ဆက်မတိုးချင်ဘူး“
“ကျောင်းဂုဏ်သိက္ခာကျလိမ့်မယ် ခင်မမမျိုး။ စပြီးသား ခရီးကို ဆုံးအောင်လျှောက်“
“အဲလိုဆိုရင် သမီး ဒီကျောင်းသူ မဟုတ်တော့ရင် ပိုအဆင်ပြေမယ်ထင်တယ်“
ကျွန်မရွဲ့ပြောလိုက်တာမဟုတ်ပေမယ့် ဆိုစကားက နည်းနည်းတင်းသလိုဖြစ်သွားလို့လားမသိ။ ဆရာမကြီး စိတ်ဆိုးသွားပါတယ်။ ဆရာမကြီးဆိုတာကလဲ တကျောင်းလုံးက ဖိန့်ဖိန့်တုန်အောင်ကြောက်ကြရတာ။ ကျွန်မစိတ်ထဲတော့ ဘာကြောင့်ရယ်မသိ။ အ၀င်အထွက်များပြီး ရင်းနှီးမှုလွန်သွားတာပဲလားမသိ။ ရိုသေလေးစားမှုပဲရှိပြီး ကြောက်စိတ်လုံးဝကို မရှိ။ ဘာပဲဖြစ်ဖြစ် အဲဒီအချိန်မှာ ဆရာမကြီး မဟုတ်ပဲ ပညာရေးဝန်ကြီးဆိုရင်တောင် ကျွန်မပြောဖြစ်ခဲ့မယ်ထင်တယ်။ ကျွန်မက အတင်းအကြပ် စေခိုင်းမှုကို လုံးဝကြိုက်တဲ့လူမျိုးမဟုတ်။ ကျွန်မလုပ်သင့်တယ်ထင်တာကို လုပ်နိုင်ရင် လုပ်မယ်။ အခြေအနေအရ မလုပ်နိုင်ဘူးဆိုရင်လဲ ဘယ်လိုပုံစံမျိုးနဲ့ လုပ်ခိုင်းလုပ်ခိုင်း ကျွန်မစိတ်ဝင်စားတာမဟုတ်။ အသက်ကြီး လာလေလေ၊ ဒီလိုစိတ်က ပိုကြီးလာလေလေ။
“ကောင်းပြီလေ။ အဲလိုဆိုလဲ အပြင်ကဖြေပေါ့“
ကျွန်မလဲ ဘာမှ ဆက်မပြောပဲ ထွက်လာခဲ့ပါတယ်။ ကျွန်မကို သားဦးစနေသမီးမို့ ဇွဲခတ်တတ်တယ်လို့ လူကြီးတွေက ဆိုကြပါတယ်။ ကျွန်မမှန်တယ်လို့ ယူဆရင် ဘာပဲ ဆုံးရှုံးရ၊ ဆုံးရှုံးရ ကျွန်မစိတ်ထဲ မှုကို မမှု။ နောက်နေ့မှာ ကျွန်မကျောင်းမသွား။ ဒီတုန်းက ကျောင်းက အောင်ချက်ကောင်းရာခိုင်နှုန်းမြင့်ဖို့ ကျောင်းပြေးတာတွေကို တင်းကျပ်ထားတဲ့ကာလ။ ကျောင်းပျက်ရင် မိဘတွေ ကိုယ်တိုင် ဆရာမကြီးဆီ ခွင့်လာတိုင်မှ ရပါတယ်။ ဒီလိုနဲ့ ဘုမသိဘမသိနဲ့ ကျွန်မအမေလဲ ကျွန်မနေမကောင်းဘူး အကြောင်းပြချက်နဲ့ ဆရာမကြီးဆီ သွားရပါတော့တယ်။ ဆရာမကြီးဘာပြောလိုက်တယ် ထင်ပါသလဲ။
“ဒေါက်တာ။ ကလေးကို ကျောင်းပြန်တက်ခိုင်းလိုက်ပါ။ ဘာကြောင့်ကျောင်းပျက်လဲ ကျွန်မသိပါတယ်။ သူဖြစ်ချင်တာ ဖြစ်ရပါစေမယ်“တဲ့။
ဒီလိုနဲ့ ကျွန်မလဲ နောက်နေ့က စပြီး ပုံမှန်ပဲ ကျောင်းဆက်တက်ပါတယ်။ ဆရာမကြီး ဘယ်လိုရှင်းလိုက်တယ်မသိ။ စာမေးပွဲပြီးတဲ့အထိ ဘယ်လိုဖိအားမှ မရှိတော့။ အခုအချိန်အထိ ဒီအဖြစ်အပျက်လေးတွေ တွေးမိတိုင်း ဆရာမကြီးကို သတိတရ ရှိနေဆဲပါပဲ။ ဆယ်တန်းအောင်ပြီး နောက်ပိုင်း၊ အာဏာရှင်ဆန့်ကျင်ရေးနဲ့ ထိစပ်မိပြီး ကာလတခုမှာ ဆရာမကြီးကို သွားကန်တော့ဖြစ်ခဲ့ပါတယ်။ သမီးလမ်းကြောင်းတခုကို ဆုံးဖြတ်ရွေးချယ်ပြီးသွားပြီလို့ အပြန်မှာ နှုတ်ဆက်ရင်းပြောတော့ ဆရာမကြီးက ပြုံးပြပါတယ်။ ဘာလဲဆိုတာ ဆရာမကြီး မမေးခဲ့ပါ။ ကျွန်မကို ကားပေါ်အထိ လိုက်ပို့ပေးပါတယ်။ ကားပေါ်အတက်မှာ ပခုံးကို လှမ်းပုတ်ပြီး ဂရုစိုက်လို့ ပြောပါတယ်။ ဒီတုန်းတွေက ဒဏ္ဍာရီလား၊ တကယ်လားလို့ မသိနိုင်ပေမယ့် ဆရာမကြီး ငယ်စဉ်က တောခိုခဲ့ဖူးတယ်လို့ ပြောကြတဲ့ အချက်ကို ကျွန်မစိတ်ထဲကတော့ ဟုတ်မယ်လို့ ခံစားမိဖူးတယ်။ အသေအချာကတော့ ဆရာမကြီးမှပဲ သိမှာပါပဲ။ ဆရာမကြီး သက်ရှိထင်ရှားရှိနေသေးလားဆိုတာ ကျွန်မမသိတော့ပါဘူး။ နှစ်ပေါင်း များစွာကြာခဲ့ပြီမို့ သိနိုင်ဖို့လဲ လမ်းလှမ်းမမှီတော့ပါဘူ။ ဒါပေမယ့် ကျွန်မရင်ထဲမှာတော့ ဆရာမကြီး ရှိနေဆဲ။
နိဂုံး
ကျွန်မရဲ့ ဘ၀မှာ သင်ဆရာ၊ မြင်ဆရာ၊ ကြားဆရာတွေ အများကြီးပါပဲ။ ဆယ်တန်းအောင်ပြီးနောက်ပိုင်း မှာ ပညာသင်ကြားခဲ့တဲ့ တက္ကသိုလ်တွေ၊ သင်တန်းကျောင်းတွေ၊ အလုပ်ခွင်ရေးရာတွေမှာ ကြုံတွေ့ခဲ့ရတဲ့ ဆရာ၊ ဆရာမတွေက အများအပြားပါ။ ယူကေနိုင်ငံကို စတင်ရောက်ချိန်မှာ နောက်ဆုံးနှစ် ဂုဏ်ထူးတန်းတက်ခွင့်ရအောင် မြန်မာပြည်မှာ ဖြေထားရမယ့် စာမေးပွဲနဲ့ သင်တန်းတွေကို လမ်းညွှန် ပြောပြပေးခဲ့တဲ့ ဆရာမဒေါ်သိဂီင်္ကို၊ သုံးနှစ်တာစာမေးပွဲ ဘာသာရပ်နှစ်ဆယ်ကို ကိုးလနဲ့ အပြီးဖြတ်ဖြေဖို့ လုပ်တာမှာ ဂရုတစိုက် အားပေးသင်ကြားပေးခဲ့ကြတဲ့ Thames Business School ဆရာ၊ ဆရာမတွေ၊ မဟာဘွဲ့စာမေးပွဲတခုဖြေရချိန်မှာ သားလေးကလဲ သုံးလမပြည့်သေး၊ ကျွန်မဘေးမှာကလဲ ဘယ်သူမှမရှိ၊ ကလေးထိန်းကျောင်းတွေကလဲ သုံးလကျော်မှ လက်ခံတာမို့ ကလေးကို ဘယ်သူနဲ့ ထားခဲ့ရမှန်းမသိဖြစ်နေချိန်မှာ ကလေးကို သူ့ရုံးခန်းထဲ ခေါ်ယူ ထိန်းပေးပြီး စာမေးပွဲဖြေစေခဲ့တဲ့ ဆရာမ အယ်ရီကာ၊ သားလေးမူလတန်းကျောင်းစတက်တဲ့နေ့မှာ ပါရဂူဘွဲ့ပြန်လုပ်ပါမယ်ဆိုတဲ့ ကတိကို မရမက တောင်းယူထားတဲ့ ပါမောက္ခ၊ နိုင်ငံရေးနဲ့ ပတ်သက်ပြီး စာအုပ်စာတမ်းတွေ ရွေးချယ် ပေးဖတ်ပြီး အသိပညာပေးခဲ့တဲ့ စာပေ၀ိုင်းတခုက ကျောင်းသားတွေ၊ အထွေထွေ ဗဟုသုတနဲ့ နိုင်ငံရေးယူဂျီ ရေးရာတွေ သင်ပေးခဲ့တဲ့ ကျွန်မရဲ့ ပျောက်ဆုံးနေသော ချစ်သူ၊ နိုင်ငံရပ်ခြားရောက်ပြီး မြေပေါ်နိုင်ငံရေးထဲ စရောက်ချိန်မှာ စတိတ်မင့်ရေးသားထုတ်ဝေပုံ၊ ကင်ပိန်းများပြုလုပ်ပုံကစပြီး အသေးစိတ်သင်ပေးခဲ့တဲ့ ကျောင်းသား ခေါင်းဆောင် ကိုမိုးသီးဇွန် တို့အပါအ၀င် နိုင်ငံရေး၊ စီးပွားရေး၊ ပညာရေး၊ လူမှုရေး စတဲ့ ကျင်လည်ခဲ့တဲ့ ဘ၀စုံမှာ ဆရာကောင်းတွေအများကြီးနဲ့ ကြုံတွေ့ခဲ့ရဖူးပါတယ်။ ဒီဆရာကောင်း၊ ဆရာမြတ်တွေအားလုံးကို အခုလို ကမ္ဘာ့ဆရာများနေ့မှာ ဒီစာစုလေးနဲ့ ရိုသေစွာ ဂါရ၀ပြု ဦးညွှတ်မိပါကြောင်း။
ခင်မမမျိုး (၅၊ ၁၀၊ ၂၀၀၉)
Subscribe to:
Posts (Atom)